Oseas 2:1-23
2 (3) Tsawraqa olqu kaqkunata kayno nipäkunkipaq: ‘Tayta Diospami karkaykanki’.Warmi kaqkunatanami kayno nipäkunkipaq: ‘Tayta Dios kuyapashqankunami karkaykanki’ ”.
Israel nacionta wayrapakuq warmiman tinkutsishqan
2 (4) TAYTA DIOSMI Israel runakunata kayno nin:“Mamaykita mana kuyapaypa olqüpay.Kananpitaqa manami warmïnatsu kanqa.Noqapis manami runannatsu kashaq.Noqawan amistayta munarqa *wayrapakuq warmi kayta kacharitsun.Makalarashqan waynankunatapis kacharitsun.*
3 (5) “Mana kachariptinqa penqakunanpaqmi yurishqantanöla qarapacharir kacharishaq.*Pasaypa chunyaqmanmi tikratsishaq.Usyawan castigaptïmi yakunaylapita wanunqa.
4 (6) Qamkunatapis wachapakuy kaptikimi* mana kuyapäshaykinatsu.
5 (7) Mamaykiqa mana penqakuq wayrapakuq warmi karmi kayno nirqan:‘Aywashaq waynäkunaman.Paykunapitami tarï mikuyta, yakuta, milwata, lïnuta, aceitita y upyanäpaq kaqkunatapis’.*
6 (8) “Mamayki tsayno kashqanpitami purinan nänikunatapis kashakunawan tsapashaq.*Nänipis mana aywaränanpaqmi tumariq qenchashaq.
7 (9) Pasaypa löcutayparaqmi waynankunata ashinqa.Mana tariykurmi yarpachakur kayno ninqa:‘Jina amistakushaq punta kaq runäwan.*Paywanqa alimi kawakurqä’.
8 (10) “Tsayno niykarpis mamaykiqa manami cuentata qokuntsu trïguta, vïnuta y aceitita kamaripashqäta.Noqami qellaytapis qoritapis kamariparqä.Tsayno kaykaptinpis tsay qellaypita y qoripita *Baal ïdulukunata ruraykurmi adorarqan.
9 (11) Tsaymi kananqa trïguta cosechananpaq kaykaptinpis shuntakushaq.Tsayraq rurashqa vïnutapis kutitsikushaqmi.Röpanta rurananpaq kamaripashqä milwata y lïnutapis shuntakushaqmi.
10 (12) “Kananqa waynankuna rikaykaptinmi penqaypaq qarapachashaq.Makïpitaqa manami imanöpapis qeshpinqatsu.
11 (13) Fiestankunata rurar kushikushqanpis ushakanqami.Manami lulu killa fiestatapis ni jamay junaqtapis ni wakin fiestakunatapis ruranqanatsu.*
12 (14) Payqa niykan üva chakrankunata y hïgus yörankunata waynankuna qarashqantami.Tsay üva chakrankunata y hïgus yörankunata ushakätsishaqmi.Pasaypa muntiyaptinmi munti uywakuna tsaycho mikunqa.
13 (15) Tsayno rurashaq Baal diosninkunata inciensuwan qoshtatsishqanpitami.Payqa qonqaykamarmi walqankunata y sortëjankunata jatikurkur waynankunaman aywaykan”.TAYTA DIOSMI tsayno nin.
Israel runakunata shuntananpaq Tayta Dios nishqan
14 (16) “Tsayno kaptinpis noqawan yapay namurädu rikakunanpaqmi chunyaq jirkaman pushaykur ali shimiläpa parlapäshaq.
15 (17) Üva chakrankunatapis kutitsishaqmi.Acor Pampata* tikratsishaq bendición punku kananpaqmi.*Tsaymi yapay cäsukamanqa jipash kar Egiptupita jorqamushqä witsan cäsukamashqanno”.
16 (18) Tayta Diosmi kayno nin: “Tsay witsanmi ‘Tayta Baal’ nimänaykipa trukanqa ‘qammi runä kanki’ nimankipaq.*
17 (19) *Baalpa jutinkunata manami imaypis joqarinkipaqnatsu.
18 (20) Tsay witsanmi mana atacashunaykipaq *pactuta rurashaq jirka uywakunawan, päriqkunawan y pachanpa y lätaypa puriqkunawanpis.Espädapis, flëchapis ni guërrapis qam kaqcho manami kanqanatsu.Jawkalanami punukunkipaq.
19 (21) Noqapa warmïmi imayyaqpis kankipaq.Qamwan majatsakarmi* imaypis kuyashayki.Manami yapapakuy warmïtsu kankipaq, sinöqa legïtimu warmïmi.
20 (22) Warmï kaptikimi imaypis mana kachashaykipaqtsu.Kuyapäkuq TAYTA DIOS kashqäta tantiyarmi kuyamankipaq”.
21 (23) TAYTA DIOSMI kayno nin: “Tsay witsanmi tamyamunanpaq manakamaptiki ciëluta nishaq tamyatsimunanpaq.
22 (24) Tamyaptinmi trïgupis, üvapis y olïvupis alina wayunqa.Tsaynöpami Jezreelpaq* bendición kanqapaq.
23 (25) Muruta muruqnöpis nacionnikimanmi kutitsimushayki noqalatana adoramänaykipaq.Lo-ruhama* jutiki kananpaq nishqa karpis kananqa kuyapäshaykimi.Lo-ammi* jutiki kananpaq nishqa karpis kananqa ‘noqapanami kanki’ nishaykimi.*Qamkunanami kayno nimankipaq: ‘Japalaykimi Diosnï kaykanki’ ”.
Ichic wilacuycuna
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 2.2 Israel runakunapa mamanpaq parlarqa nacionninpaqmi parlaykan. Waynankunapaq parlarqa Baal dioskunapaq y ïdulukunapaqmi parlaykan. Tsaykunata runakuna adoraptinmi wayrapakuq warmino kashqanta Tayta Dios nirqan.
^ 2.4 Diosta adorananpa trukan Israel runakuna ïdulukunaman yärakuptin manami Tayta Diosnatsu papänin karqan, sinöqa tsay ïdulukunami. Tsaymi Israel runakuna wachapakuy kashqanta nirqan.
^ 2.5 Jer. 2.23-25; 3.1-2; Ose. 4.12-14.
^ 2.6 Purinan nänikunapaq parlarqa kawayninpaqmi parlaykan.
^ 2.7 Punta kaq runanpita parlarqa Tayta Diospitami parlaykan.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 2.11 Isa. 1.12-14; Amós 5.21-23.
^ 2.15 Jos. 7.24-26.
^ 2.15 Acor ninanqa desgracia ninanmi. Tsaymi Acor Pampata tikratsishaq bendición punku kananpaqmi nishqanqa desgracia pasashqanta tikratsishaq bendición kananpaqmi ninanmi.
^ 2.16 Tsay witsanmi Baalpa jutinta joqarir Tayta Diosta adoraykashqanta Israel runakuna yarpapäkurqan.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 2.19 Wakin runakunaqa casararmi nipäkun.
^ 2.22 Jezreel nirqa Israel runakunapaqmi parlan. Jezreel ninanqa Diosmi murun ninanmi.
^ 2.23a Lo-ruhama ninanqa mana kuyashqa ninanmi.
^ 2.23b Lo-ammi ninanqa manami noqapatsu ninanmi.
^ 2.23 Zac. 13.9; Rom. 9.25; 1Ped. 2.10.
