Oseas 3:1-5
3 TAYTA DIOSMI yapay kayno nimarqan: “Warmiki juk runawan jarukuykäshuptikipis paywan amistakuy. Tsaynöpami Israel runakuna tantiyakärinqa runanta jarukuykaq warmino kaykaptinpis paykunata imaypis kuyashqäta. Paykunataqa juk dioskunapa jutincho päsaslan atipay biscöchuta kushishqa mikapäkuptinpis kuyämi”.
2 Tsayno nimaptinmi warmïwan amistanäpaq pägarqä chunka pitsqa siclo qellayta* y kimsa pachak kimsa chunka (330) kïlu cebädata.
3 Amistarkurnami kayno nirqä: “Kananpitaqa noqalapanami warmï kanki. Juk runawanqa amana puriynatsu. Amistarkurpis manami punushunraqtsu, sinöqa atska junaq pasarkuptinraqmi punushunpaq”.
4 Tsaynömi Israel runakunapapis atska watayaq mana kanqatsu mandaqnin reypis ni autoridäninkunapis. Manami Tayta Diospaq sacrificiutapis rupatsinqatsu ni juk diosta adorar wankatapis ichitsinqatsu. Manami ni cürakunapis ni wayinkunacho ïdulunkunapis kanqatsu.
5 Tsaypitaraqmi Israel runakuna perdonta manakur TAYTA DIOSTA *ashipäkunqapaq. Tsaynölami David aylu mandaqnin reytapis cäsukärinqapaq. Shamuq watakunachömi TAYTA DIOSTA *mantsakur bendicionninta kushishqa chaskipäkunqapaq.
Ichic wilacuycuna
^ 3.2 Éxo. 21.32; Lev. 27.4.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
