Oseas 8:1-14
8 “¡Marka täpaq runakuna, *cornëtata tukapäkuy!¡Kuyashqä runakunata atacananpaq contran runakuna ankanömi aywarkaykämun!*Pactu rurashqäta y leynïkunata mana cumplishqanpitami Israel runakunataqa castigashaq.
2 Israel runakunaqa kayno nirmi manakarkaykäman:‘¡Yanapaykalämay, Tayta!¡Qammi kanki Tayta Diosnï!¡Noqakunaqa kuyashqayki Israel runakunami karkaykä!’
3 Tsayno manakamarpis ali kawapäkunanpaq nishqäta manami chaskikärishqatsu.Tsaymi castigaptï chikiqninkuna atacar qatikachanqapaq.
4 Paykunaqa mana tapukamaylapami mandaqnin reykunata churapäkushqa.Mana manakamaylapami autoridäninkunatapis churapäkushqa.Qellaypita y qoripitami ïdulukunatapis rurapäkushqa.Tsayno rurashqanpitami ushakanqapaq.
5 “Samaria runakuna, qoripita rurashqayki turituta adorapäkuptiki pasaypami melanä.*Tsayno rurapäkushqaykipita fiyupa rabyashqami kaykä.¡Imayyaqraq penqakuypaq jutsasapa kapäkunkipaq!
6 ¡Israel runakuna, wiyakäriy!Tsay adorashqayki turituqa manami Diostsu, sinöqa runa rurashqalami kaykan.Tsaymi pasaypa talamar ushakätsishaqpaq.
7 “Israel runakunaqa wayrata muruqno karmi shukukuy wayralatami cosechanqapaq.* *Murushqankunapis mana wayuptinmi aqatsikunanpaqpis mana kanqatsu.Ichiklata cosechashqantapis jäpa runakunami mikupäkunqapaq.
8 ¡Israel nación ushakanqapaqmi!Juk lädu nación runakunaqa mana sirviq puyñutanömi rikapäkunqa.
9 Israel runakunaqa chucaru bürruno karmi Asiria nación runakunaman aywarkaykan.Paykunaqa waynäkuq warminömi karkaykan.
10 Asiria nacionta y wakin nacionkunata tsayno pägaptinpis tsay nacionkunatami shuntashaq atacananpaq.Munayniyuq reypa munaynincho karmi juk tiempuyaq nakapäkunqa.
11 “Efraín runakunaqa atska *altarkunatami rurapäkushqa tsaycho perdonta manakamänanpaq.Manakamänanpaq ruraykarpis tsay altarkuna kaqcho ïdulukunata adorarmi jutsata mas rurarkaykan.
12 Paykunapaq atska leykunata qelqatsishqa kaptïpis manami cäsukärintsu.
13 Sacrificiukunata altarcho rupatsirmi aytsata kushishqa mikurkaykan.Tsayno ruraptinpis tsay sacrificiukunaqa manami shonqü munashqannötsu kaykan.Jutsa rurashqankunataqa manami imaypis qonqashaqtsu.Perdonanäpa trukan castigaptïmi Egiptuman kutipäkunqapaq.*
14 Kamaqnin Tayta Dios kaykaptïpis Israel runakunaqa manami yärakamantsu.Yärakamänanpa trukanqa amparakunanpaq palaciukunatami sharkaykätsin.Judá runakunapis ali murallashqa markankunamanmi yärakurkaykan.Nina rupar ushashqannömi murallashqa markankunata y ali sharkatsishqan palaciunkunatapis ushakätsishaq”.*
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 8.5 1Rey. 12.28-32.
^ 8.7 Wayrata muruqno kashqanta nirqa alita ruraykashqanta yarpar manakaqkunata rurashqantami niykan. Tsaynöpis shukukuy wayralatami cosechanqapaq ninanqa fiyupa desgraciami paykunata pasanqapaq ninanmi.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 8.13 Egiptuman kutipäkunqapaq nirqa kaynömi niykan: Unay aylunkuna Egiptucho nakashqanno paykunapis juk nacioncho nakapäkunqapaq.
