Oseas 9:1-17
9 Israel runakuna, *wayrapakuq warmi runanta kacharishqannömi qamkunapis Tayta Diosta kacharishqanki.Cosëchayki ali kananta munarmi juk diosman yärakurkaykanki.Päguta chaskinanpaq wayrapakuq warmi juk runawan punushqannömi qamkunapis karkaykanki.Tsayno kaykarqa cosëchata shuntashqaykipita ama kushikäriytsu.Wakin nación runakunanöqa kushikuypita ama saltaykachäriytsu.
2 Trïgupis mikupäkunaykipaq ni vïnupis upupäkunaykipaq manami aypanqatsu.
3 TAYTA DIOS rikatsishushqayki nacioncho tänaykipa trukanqa Egiptumanmi kutipäkunkipaq.*Asiriachöna tashpaykimi mana mikunaykipaq kaq *impüru mikuykunata mikupäkunkipaq.
4 Tsaychöqa manami TAYTA DIOSPAQ vïnuta *altarman winapankipaqnatsu.Sacrificiuta rupatsiptikipis manami chaskishunkipaqnatsu.Ayata yataq runa impüru kashqannömi mikuynikipis impüru kanqa.Tsay mikuyta pipis mikurqa impürumi rikakunqapaq.Manami TAYTA DIOSPA templunman apanaykipaqnötsu kanqa, sinöqa kikikikuna mikunalaykipaqmi.
5 Tsayno kaptinqa ¡imataraq rurapäkunki TAYTA DIOSTA adorar fiestata rurapäkunayki junaq!
6 Asiria runakuna mana ushakätsishunaykipaq qeshpir aywakurmi Egiptuchöna täpäkunkipaq.Wayikipita apurädu yarqurmi qellaynikitapis kacharinkipaq.Qellayniki kashqancho ishankalami jeqamunqapaq.Wayikikunachöpis kashalami winanqapaq.Egiptucho wanupäkuptiki Menfis jäpa markamanmi pampashunkipaq.
Profëtakuna wilakushqanta Israel runakuna mana chaskishqan
7 Israel runakunata Tayta Dios castigananpaq kaq junaqkuna chayamushqanami.*Jutsa rurashqaykiman tupumi qamkunata juzgashunkipaq.Pasaypa nakarraqmi Tayta Dios castigashushqaykita tantiyapäkunkipaq.Qamkunaqa nirkaykanki profëtakuna mana tantiyakuq kashqantami.Tsaynöpis nirkaykanki Tayta Diospa wilakuqninkuna löcu kashqantami.Tsayno nirkaykanki pasaypa jutsasapa y chiki kashpaykimi.
8 Kikin Tayta Diosmi profëtata churashqa Israelcho rikachakuqno kananpaq.*Tsayno kaptinpis mana aliman tuninanpaq trampata churapaqnömi karkaykanki.Profëtakunata chikirmi Tayta Diospa templunchöpis contran sharkurkaykanki.
9 Gabaacho unay runakuna pasaypa jutsasapa kashqannömi* qamkunapis jutsasapa karkaykanki.Tsayno kashqaykitaqa Tayta Dios yarparaykanmi.Paymi lapan jutsa rurashqaykikunapita castigashunkipaq.
Israel runakunapa wamrankuna nakananpaq nishqan
10 TAYTA DIOSMI kayno nin:“Chunyaq tsaki jirkacho üvata tariykur kushikuqnömi unay Israel runakunata tariykur kushikurqä.Unay ayluykikunaqa punta poquq hïgusnömi kushikuypaq karqan.Baal-peor partiman chayaykurmi itsanqa tsaycho adorapäkushqan diosta adorar pasaypa penqaypaq rikakärirqan.*Adorapäkushqan dios mana väliq kashqannömi paykunapis mana väliq rikakärirqan.
11 “Pishqukuna elaqpita pärir aywakuqnömi noqapis paykunata kacharir aywakushaqpaq.Tsaymi warmikunapis manana chichu rikakunqanatsu ni wawatapis manana tarinqanatsu.
12 Yuriq wamralantapis lapantami ushakätsishaq.¡Wawalaw! Kachariykuptï kuyapaypaqmi nakapäkunqapaq.
13 Israel nacionta rikashqä kuyaylapaq Tiro markatanömi.Tsayno kaptinpis mana cäsukamar tsurinkunata castïguman pushaqnömi karkaykan.Castigaptïmi tsurinkunapis wanupäkunqapaq”.
14 Jutsata rurashqanman tupu Israel runakunata castigay, Tayta Dios.Paykunapa warminpis qoluq rikakäritsun.Wawan yuriptinpis chuchunanpaq lëchin ama katsuntsu.
15 TAYTA DIOSMI kayno nin:“Gilgalchömi jutsa rurayta qalaykärirqan.*Tsaychömi Israel runakuna rabyanätsimarqan.Tsaynöla jutsata rurapäkuptinmi wayinpita pitapis qarqushqanno noqapis nacionnïpita qarqushaqpaq.Autoridäninkunapis mana cäsukärimaptinmi Israel runakunata mana kuyashaqnatsu.
16 Efraín runakunaqa qarwashtashqa yöranömi karkaykan.Sapin tsakishqa yöra mana wayushqannömi paykunapa wamrankunapis mana kanqapaqnatsu.Wamrankuna kaptinpis lapantami wanutsir ushashaqpaq”.
17 Efraín runakuna mana cäsukuq kashqanpitami Tayta Dios kacharinqapaq.Nacionninpita qarquptinmi wak lädupa kay lädupa purikärinqa.*
Ichic wilacuycuna
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 9.3 Egiptumanmi kutipäkunkipaq nirqa kaynömi niykan: Unay ayluykikuna Egiptucho nakashqannömi qamkunapis juk nacioncho nakankipaq.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.7 Luc. 21.22.
^ 9.8 Jer. 6.17; Eze. 3.16-21; 33.7-9.
^ 9.9 Jue. 19.22-26.
^ 9.10 Núm. 25.1-5.
^ 9.15 1Sam. 13.8-15; 15.10-23.
^ 9.17 Deut. 28.64-65.
