Proverbios 15:1-33
15 Mayjina rabyashqa kaptinpis ali shimilanpa parlaparqa rabyayninta pasatsinmi.Shimi shimi qayapänakurmi itsanqa pasaypa rabyanätsinakun.
2 Tantiyakuq runa parlaptinqa mayaqkuna alimi tantiyapäkun.Mana tantiyakuq runaqa shimin tarishqantami imatapis riman.
3 TAYTA DIOS maytsaychöpis karmi runakuna alita y mana alita rurashqantapis rikaykan.
4 Shakya shakya rimaq runaqa runa mayinta kushikatsinmi.Ayaq shiminpa* rimaq runami itsanqa pïmaytapis jaqayätsin.
5 Mana tantiyakuq mözuqa papänin yätsishqanta manami chaskikuntsu.Tantiyakuq mözumi itsanqa anyapashqanta chaskikun.
6 Ali runapa wayinchöqa imaykanpis putsuy putsuymi kaykan.Fiyu runapaqa tarishqalanpis yakunölami ushakan.
7 Tantiyakuq runaqa pïmaytapis ali kaqkunatami tantiyatsin.Mana tantiyakuq runaqa ali kaqkunata tantiyatsinanpaq manami yarpaylapis yarpantsu.
8 Fiyu runapa ofrendanta TAYTA DIOS manami chaskintsu.*Ali runa manakushqantami itsanqa kushishqa chaskin.
9 Fiyu runataqa manami TAYTA DIOS rikaytapis munantsu.Pay munashqanno kawaq runatami itsanqa kuyan.
10 Lutan ruraq runataqa astanqami.Astaptinpis mana wanakurqa* ushakanqami.
11 TAYTA DIOS musyanmi wanuqpa alman maycho kashqantapis.Tsaytsuraq mana musyanmantsu runakunapa shonqun imata yarpashqantapis.
12 Urkus* runaqa pï corrigiptinpis rabyakunmi.Tantiyakuq runawanqa manami juntakayta munantsu.
13 Shonqun kushishqa kaptinqa qaqlanpis chipchipyanmi.Lakishqa kaptinmi itsanqa qaqlanpis jukaqyashqa kaykan.
14 Tantiyakuq runaqa imaykanöpapis mas tantiyakuq kaytami munan.Mana tantiyakuq runami itsanqa manakaqkunata parlar kushikun.
15 Jaqayashqa runapaqqa mayqan junaqpis manami alitsu kaykan.Kushishqa kawaq runapaqmi itsanqa lapan junaqpis ali kaykan.
16 Riquëzapaq yarpachakur kawananpa trukanqa mas ali kaykan waktsala karpis TAYTA DIOSTA mantsakur kawashqanmi.*
17 Wera wäkata mikurpis chikinakur kawananpa trukanqa mas ali kaykan tulpulata upurpis kuyanakur kawashqanmi.
18 Jukla rabyakuq runaqa piwanpis tinkuypami tinkun.Mana rabyakuq runami itsanqa piwanpis mana rimanakuntsu.
19 Qela runapaqqa ima ruraypis kasha kasha näninömi kaykan.Arukuq runapaqmi itsanqa ima ruraypis pitsashqa nänino kaykan.
20 Wamran tantiyakuq kaptinqa maman y taytan kushikärinmi.Mana tantiyakuq kaptinmi itsanqa penqakärin.*
21 Mana tantiyakuq runaqa lutanta rurarpis kushikunmi.Tantiyakuq runami itsanqa lutanta rurarpis yarpachakurir wanakun*.
22 Yätsikuqkunata mana tapukuypa imatapis ruraptinqa manami shumaqtsu kanqa.Yätsikuqkunata tapukurir ruraptinmi itsanqa ali kanqa.
23 Tapukushqanta shumaq tantiyatsirqa kushikunmi.Tiempulancho yätsishqanqa alimi kaykan.
24 Tantiyakuq runaqa ali kawaytami tarin.Tsaynöpami wanuypitapis salvakun.
25 Runa tukuqkunapa wayintaqa TAYTA DIOSMI ushakätsin.Viüdakunapataqa chakrankunatapis shumaqmi rikan.
26 Fiyu runa mana alita yarpashqanpitami TAYTA DIOS rabyakun.Ali runa parlashqanpitami itsanqa kushikun.
27 Kikilanpaq imatapis munaq runaqa aylunkunawan chikinakurmi kawan.Mana chaskipakuq runaqa jawkami kawan.
28 Ali runaqa shumaqraqmi yarpachakun imata ninanpaqpis.Fiyu runami itsanqa shimin tarishqanta imatapis riman.*
29 Fiyu runa manakushqantaqa TAYTA DIOS manami mayaq tukuntsu.Ali runa manakushqantami itsanqa wiyan.
30 Kushishqa kaykaqta rikarqa pipis kushikunmi.Ali wilakuyta mayaptinqa shonqunpis atsikyarkunmi.
31 Yätsiqnin anyapashqanta chaskikuq runaqa tantiyakuqmi rikakunqa.
32 Anyapashqanta mana chaskikuq runaqa mana ali kawaymanmi chayan.Anyapashqanta chaskikuq runami itsanqa mas yachaq rikakun.
33 TAYTA DIOSTA mantsakuq runaqa tantiyakuqmi kaykan.Respitashqa kayta munarqa humildi katsun.
Ichic wilacuycuna
^ 15.4 Wakin runakunaqa toscu shimi nipäkun.
^ 15.8 Prov. 21.27.
^ 15.10 Wakin runakunaqa wiyakurqa nipäkun.
^ 15.12 Wakin runakunaqa respëtuynaq nipäkun.
^ 15.16 Sal. 37.16.
^ 15.20 Prov. 10.1.
^ 15.21 Wakin runakunaqa corrigikun nipäkun.
^ 15.28 Prov. 19.28.
