Proverbios 19:1-29
19 Tumpakuq y mana tantiyakuq runapitaqa mas ali kaykan waktsala karpis respitashqa kashqanmi.*
2 Mana yarpachakuypa imatapis ruraptikiqa mana alimi yarqapäshunki.Imatapis apurädu rurarqa mana alitami ruraykanki.
3 Mana tantiyakuq runaqa imatapis lutantami ruran.Nirkurmi TAYTA DIOSTA jitapan.
4 Rïcu runaqa atska amïguyuqmi kaykan.Waktsa runapitaqa amïgunpis witikunmi.
5 Rantiy testïgutaqa castiganqami.Lulakuq runaqa manami castïgupita qeshpinqatsu.*
6 Yanapakuq runataqa pïmaypis manakunmi.Paywanqa pïmaypis amïgu kaytami munan.
7 Waktsa runata wawqinkuna ajayaykaptinqa rasuntachari amïgunkunapis mana cäsuntsu.Parlarkunalanpaqpis manami amïgunpis kantsu.
8 Yachakushqanno kawaq runaqa kushishqami kawan.Tsay runapaqqa bendicionmi kanqa.
9 Rantiy testïguqa castigashqami kanqa.Lulakuq runataqa wanuyninmi apanqa.*
10 Mana tantiyakuq runa imaykayuqpis rikakushqanqa penqaypaqmi kaykan.Tsaynöpis penqaypaqmi kaykan ashmaykuna mayor runakunapa mandaqnin kaptin.
11 Tantiyakuq runaqa imapitapis manami rabyakuntsu.Achäquita ashipar qayapaptinpis manami mayaq tukuntsu.
12 León qaparashqan mantsakuypaq kashqannömi rey rabyakushqanqa mantsakuypaq kaykan.Kuyapäkuyninmi itsanqa qewakuna janancho shulyano kushikuypaq kaykan.
13 Mana tantiyakuq mözuqa taytanta lakikatsinmi.Runanta achäquita ashipaq warmiqa jutuq wayinömi kaykan.*
14 Runaqa papäninpitami wayita y ima herenciatapis chaskin.Ali yarpayniyuq warmitaqa TAYTA DIOSMI kamaripan.
15 Qela runaqa mana ajayaypami punukun.Tsayno karmi muchuylacho kawanqa.
16 Tayta Diospa mandamientunkunata cäsukuq runaqa alimi kawanqa.TAYTA DIOS nishqanta mana cäsukuq runami itsanqa wanunqa.
17 Waktsakunata yanaparqa TAYTA DIOSTA prestaqnölami qoykun.Tsayno yanapaqtaqa Tayta Diosmi kutitsin.
18 Wamra kashqanyaqla tsurikita shumaq corriginki.Mana corrigishqaykipita lutanta rurar wanuptinqa qammi jutsayuq kankipaq.
19 Aläpa rabyakuq runaqa castigashqami kanqa.Mana castigaptinqa mas peormi mana alikunata ruranqa.
20 Anyapäshushqaykita chaskikuy.Corrigishuptiki cäsukuy.Chaskikurqa tantiyakuqmi kankipaq.
21 Ali kawayta munarmi runaqa tukuyta yarpachakun.Tsayno kaptinpis TAYTA DIOS kamakätsiptinraqmi yarpashqan kamakan.*
22 Promitishqanta cumpliq runataqa pïmaypis yärakunmi.Lulakunanpa trukanqa mas alimi kaykan waktsala karpis rasun kaqta rimashqan.
23 TAYTA DIOSTA mantsakuq runaqa alimi kawan.Tsay runaqa jawka kawarmi ima problëmamanpis mana jatikantsu.
24 Qela runaqa plätun sirvishqa kaykaptinpis mikunalanpaqpis qelami kaykan.*
25 Mana tantiyakuq runaqa shimisapa runata castigashqanta rikakurraqmi tantiyakun.Tantiyakuq runami itsanqa yätsiptilan tantiyakun.*
26 Taytanta suwapaq runapaqa manami penqakuyninpis kantsu.Mamanta wayinpita qarquq runaqa manami yawarninpis kantsu.
27 Anyapäshushqaykita mana chaskikurqa mana tantiyakuq runami kanki, hïju.
28 Rantiy testïguqa jueztapis mana mantsakuypami lulapan.Fiyu runaqa shimin tarishqantami imaykatapis riman.*
29 Shimisapa runataqa wiruypami castigapäkun.Mana cäsukuq runataqa astaypami castigapäkun.
Ichic wilacuycuna
^ 19.1 Prov. 28.6.
^ 19.5 Prov. 19.9.
^ 19.9 Prov. 19.5.
^ 19.13 Prov. 27.15.
^ 19.21 Prov. 16.1, 9; Ecl. 9.1.
^ 19.24 Prov. 26.15.
^ 19.25 Prov. 21.11.
^ 19.28 Prov. 15.28.
