Proverbios 2:1-22
2 Nishqäkunata shumaq wiyakuy, hïju.Mandamientükunata imaypis yarparay.
2 Tantiyakuq kanaykipaq wiyakuy.Yachaq kanaykipaq yarpachakuy.
3 Cäsukuq kanaykipaq lapan shonquykiwan manakuy.
4 Qellayta y qorita ashishqaykino tantiyakuq kayta ashiy.
5 Tsaynöpami TAYTA DIOSTA *reqir payta *mantsakunaykipaq tantiyakunki.
6 Tantiyakuq kanaykipaqqa TAYTA DIOSMI yachayta qoshunki.Paypitaraqmi tantiyaytapis y yachaytapis chaskinki.
7 Pay munashqanno kawaqkunataqa imapitapis tsapanmi.Alita rurar kawaqkunataqa yanapanmi.
8 Payta cäsukuqkunataqa imaypis cuidanmi.Paylaman yärakuqkunataqa imaypis rikanmi.
9 Tsaynöpami ali kaqta y mana ali kaqtapis tantiyankipaq.Tsaynöpis alcäbumi kankipaq ali kaqkunata ruranaykipaq.
10 Tantiyakuq y yarpayniyuq karmi kushishqa kawankipaq.
11 Yarpayniyuq karqa manami lutankunata rurankipaqtsu.Tantiyakuq kashqaykimi mana alikunapita tsapäshunkipaq.
12 Tantiyakuq karqa manami jutsata rurankipaqtsu ni engañakuq runakunapis criyitsishunkipaqtsu.
13 Tsay runakunaqa alita rurananpa trukan mana ali ruraykunalamanmi jatikashqa karkaykan.
14 Jutsata rurarpis pasaypami kushikärin.Mana alita rurarkurpis taqlapänakunmi.
15 Imaypis lutanta rurarmi puripäkun.Alita rurananpa trukanqa manakaqkunata rurarmi kawapäkun.
16 Tantiyakuq karqa runanta jarukuq warmipitapis witikunkipaqmi.Kirunta rikatsiparraq parlapäshuptikipis manami cäsupankipaqtsu.*
17 Tsay niraq warmiqa jipashlanpita tashqan runantapis kachariykurmi munashqanno kawakun.Tsayno karmi runanta imaypis respitananpaq Tayta Diosta promitishqantapis qonqaykun.
18 Tsay niraq warmiwan jatikarqa wanuytami tarinkipaq.
19 Tsay warmiwan kakuqkunaqa ali kawayta imaypis manami tarinqatsu.
20 Tayta Dios munashqanno kawaq runakunata rikakushpayki paykunano kaway, hïju.
21 Jutsata mana ruraq runakunaqa Tayta Dios rikatsishqan nacioncho atska watami jawka kawanqapaq.
22 Fiyu runakuna y Diosta promitirkur mana cumpliqkunami itsanqa elaqpita wanunqa.*
Ichic wilacuycuna
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
