Proverbios 27:1-27
27 “Kaytami waktami wara rurashaq” nir ama alabakuytsu.Manami musyankitsu wara junaq ima pasashunaykipaq kashqantapis.*
2 Kikiki sumätsikushqaykiqa penqakuypaqmi kaykan.Mas alimi kanman juk alabashuptiki.
3 Rumipis aquyshapis aläpami lasan.Tsaypita mas peorraqmi mana tantiyakuq runa rabyashqanqa kaykan.
4 Rabyakuq runaqa manami pitapis kuyapantsu.Piñakuq runaqa imatapis ushakätsinmi.Envidiösu runaqa rabyakuq y piñakuq runapitapis mas peormi kaykan.
5 Wakin runaqa amïguyki karpis lutanta ruraptiki manami imatapis nishunkitsu.Wakin runami itsanqa ali kawanaykipaq anyapäshunki.
6 Jaqayänayki kaptinpis amïguyki corrigishushqaykiqa alimi kaykan.Chikishuqniki runami itsanqa mana alita ruraptikipis alabashunki.
7 Pachan saksashqa karqa abëjapa mishkintapis manami munannatsu.Yarqaykaq runami itsanqa asqaq mikuytapis mishkila mikurkun.
8 Yurishqan markata kachariykur purikuq runaqa qeshwanta kachariykur aywakuq pishqunömi kaykan.
9 Ali asyaq* perfümi kushikuypaq kashqannömi ali amïgupa yätsikuyninpis kushikuypaq kaykan.
10 Ima problëmacho karpis karucho kaykaq wawqikiman aywanaykipa trukanqa amïguykiman o taytaykipa amïgunman ayway wilapänaykipaq.Karucho kaq ayluykipitaqa vecïnuykimi imachöpis jukla yanapashunki.
11 Tantiyakuq kaptikiqa kushishqami kawashaq, hïju.Tsaynöpami manakaqman churamaqkuna upälakunqa.
12 Tantiyakuq runaqa ima peligrupitapis witikunmi.Mana tantiyakuq runami itsanqa peligru kashqanta rikaykarpis jatikan.Tsaynöpami desgracia pasan.*
13 Jäpa runapa garantian yaykuqpataqa röpantapis prenda tsariy*.Tsay prendata tsararanki jaqata pägananyaq.*
14 Tsaka tsakala qayaraypa amïgunta winchikurqa runa mayinta ashliqnömi kaykan.
15 Tamya killacho jutuq wayinömi achäquita ashiq warmiqa kaykan.*
16 Tsay niraq warmitaqa wayrata tsapayta mana kamäpakushqaykino y aceitita maki paltaykicho tsararayta mana kamäpakushqaykinömi upälatsiyta mana kamäpakunkitsu.
17 Lïmanawan fiërruta afilaqnömi tantiyakuq runaqa runa mayinta tantiyatsin.
18 Hïgusta täpaq runaqa wayuyninta mikur kushikunmi.Patronnin nishqanta cäsukuq runapis respitashqa karmi kushikun.
19 Yakucho qaqlantsita rikakushqantsinömi runatapis qaqlalanpa reqintsi imano kashqantapis.
20 Wanuypis ni sepultürapis manami ajayantsu tsaytsika runa pampakuptinpis.Tsaynölami kikilanpaq imaykapaqpis munaq runaqa imaykata shuntarpis contentakuntsu.
21 Qoritapis y qellaytapis ali kashqanta musyantsi ninawan tsulutsirraqmi.Runatapis ali kashqanta musyantsi ali kashqanpita alabapäkuptinmi.*
22 Mana tantiyakuq runaqa trïguta wirushqanno mayjina wiruptinpis tsaynölami kanqa.
23 Uyshaykikunata shumaq mitsiy.Cabraykikunatapis shumaq rikay.
24 Rïcu kaypis corönayuq kaypis pasaqla kashqannömi uywaykikunapis ushakaqla kaykan.
25 Qewa tsintsimur loqyuypa loqyur kaptiny jirkakunacho achushqayki qewata qaraptikiqa
26 röpaykita ruranaykipaq uyshaykikunapa milwanpis atami kanqa.Chakrata rantinaykipapis cabraykikuna atskamanmi miranqa.
27 Cabraykikunapa lëchintapis tsaytsikatami qapinkipaq wayikicho kaqkunawan y arupäshuqnikikunawan upupäkunaykipaq.
Ichic wilacuycuna
^ 27.1 Stg. 4.13-16.
^ 27.9 Wakin runakunaqa mushkuq nipäkun.
^ 27.12 Prov. 22.3.
^ 27.13 Wakin runakunaqa prenda quëdatsiy nipäkun.
^ 27.13 Prov. 6.1-5; 20.16.
^ 27.15 Prov. 19.13.
^ 27.21 Prov. 17.3.
