Proverbios 6:1-35
6 Reqinakushqaykitapis o jäpa runatapis garantizashqa karqa
2 kikilaykimi trampaman jeqarpuqno kaykanki, hïju.
3 Garantizashqaykipita salvakunaykipaq penqayta jitaykur amïguykita ninki garantian manana kanaykipaq.
4 Tiempu pasananta ama shuyaraytsu, sinöqa jukla pägananpaq ninki.
5 Runapita luychu qeshpishqanno y trampapita pishqu salvakushqanno garantizashqaykipita salvakunki.
Qela runata yätsishqan
6 Qela runa, pitishkuna mana qelanaypa arushqanta rikakuy.Imano arupäkushqantapis rikakur yachakuy.
7 Pitishpaqa manami mandaqnin ni patronnin ni capatazninpis kantsu.
8 Tsayno kaykarpis usya killacho cosëcha kashqanyaqmi mikuyninta pirwakärin.
9 Qela runa, ¿imay hörayaqraq punuräkunki?¿Imay hörayaqraq jitaräkunki?
10 Junaq intiyaq punukurqa, jamakuylapaq wanurqa y ruyru maki karqa
11 pasaypa waktsami rikakunkipaq.Ali armashqa suwa imaykaykikunatapis apakuptin jinayla quëdashqaykinömi waktsayankipaq.*
Lutan ruraq runakuna imano kashqan
12 Fiyu runa y lutan ruraq runaqa pïmaytapis lulapälarmi purin.
13 Tsayno runaqa nawinwanpis, chakinwanpis y dëdunwanpis sëñapayta yachanmi.
14 Lutankunata yarpachakurmi pïmaytapis rimanakatsir y pelyatsir purin.
15 Tsayno kashqanpitami paytaqa ima desgraciapis elaqpita pasanqa.Mana yarpashqan hörami chipyaq ushakanqa.
Tayta Diosta rabyanätsishqan kaqkuna ima kashqan
16 TAYTA DIOSTA pasaypa rabyanätsishqankunaqa qanchismi kaykan:
17 runa mayinta manakaqman churashqan,lulakushqan,jutsaynaq runakunata wanutsishqan,
18 lutankunata rurananpaq yarpachakushqan,jutsa rurayman uman churakashqa kashqan,
19 rantiy testïgu kashqany wawqipurata chikinakatsishqan.
Jukpa warminwan mana pununanpaq yätsishqan
20 Taytayki yätsishushqaykita imaypis yarparay, hïju.Mamayki yachatsishushqaykitapis ama qonqaytsu.
21 Nishushqaykikunata shonquykicho imaypis yarparay.Kunkaykimanpis tsaykunata walqakuy.*
22 Tsaykunami maypa aywaptikipis alita ruranaykipaq yätsishunkipaq.Punuptikipis tsapäshunkimi.Rikcharkuptikipis ali yarpaytami qoshunkipaq.
23 Yätsikuykunaqa rataykaq mechëruno y yachatsikuykunaqa atskinömi kaykan.Tantiyatsikuykuna y anyapäkuykunaqa ali kawaymanmi apan.*
24 Yätsikuykunata chaskikurqa runanta jarukuq warmipita witikunkipaqmi.Tsay niraq warmi parlapäshuptikipis manami cäsupankipaqtsu.
25 Kuyaylapaq kaptinpis manami rikapankipaqtsu.Qewsapäshuptikipis manami cäsupankipaqtsu.
26 *Wayrapakuq warmiwan kakurqa waktsa kayman chayanki.Runanta jarukuq warmiwan kakurmi itsanqa wanuyman chayanki.
27 Pipis shanshaykaq carbonta oqlakurqa ¿manatsuraq röpanta rupakunman?
28 Shanshaykaq carbonta jarurqa ¿manatsuraq chakinta rupakunman?
29 Tsaynölami juk runapa warminwan punuq runapis mana ali kawayman chayanqa.
30 Suwa yarqanar suwakuptinqa imanir suwakushqantapis runakuna tantiyapäkunmi.
31 Tsayno kaykaptinpis suwakuykaqta taripaykurqa qanchis kuti mastami pägatsinqa.Tsaymi lapan imaykantapis rantikuykur pägapakunqa.
32 Mikunanpaq mana kaptin suwakuqta mana kuyaparqa jukpa warminwan punuq runataqa peor manami kuyapanqatsu.Tsayno kaq runaqa mana tantiyakuq karmi wanuyta ashiykan.
33 Tsay runataqa ashlirmi maqapäkunqa.Wanunanyaqmi pïmaypis payta jamurpanqa.
34 Warmipa runan musyaykurqa pasaypa rabyakushpan manami perdonanqatsu.Tinkushqanchömi mana kuyapaypa maqanqa.
35 Aykata pägaptinpis ni imata qaraptinpis* manami rabyaynin pasanqatsu.
Ichic wilacuycuna
^ 6.10-11 Prov. 24.33-34.
^ 6.20-21 Prov. 1.8-9.
^ 6.23 Sal. 119.105.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 6.35 Wakin runakunaqa regalaptinpis nipäkun.
