Proverbios 7:1-27
7 Nishqäkunata cäsukuy, hïju.Yätsishqäkunata mana qonqaypa yarparay.
2 Yätsishqäkunata chaskikurqa ali kawaytami tarinkipaq.Nawi nïñuykita cuidashqaykino nishqäkunata cumpliy.
3 Imaypis yarparänaykipaq makikiman watakuy.Mana qonqanaykipaq shonquykiman qelqakuy.
4 Yachayta kayno ninki: “Panïmi kaykanki”.Tantiyakuytapis kayno ninki: “Kuyashqä amïgämi kaykanki”.
5 Tsayno paniki y amïgayki karmi runan jarukuq warmipita tsapäshunkipaq.Ali shimilanpa parlapäkuq warmipitapis cuidashunkipaqmi.*
6 Juk kutimi wayïpa ventänanpita rikachakuykarqä.
7 Tsaypitami rikarqä mana tantiyakuq mözukunata.Paykunawanmi aywaykarqan wakin mözupitapis mas mana tantiyakuq mözu.
8 Paymi esquïnaman chayaykur cällita pasarqan.Nirkurmi jukwan jukwan kakuq warmipa wayin kaqpa aywarqan.
9 Tsay höra karqan räpis räpisnami.
10 Elaqpitami warmi yarqapämurqan *wayrapakuq warmino röpan jatishqa miluykachar y qewsaykachar.
11 Tsay warmiqa shanaripakushqa karmi wayinchöpis jamayta tarintsu.
12 Tsaymi cällikunachöpis, pläzakunachöpis y esquïnakunachöpis ichiran pitapis kirunta rikatsipashpan.
13 Tsay mana tantiyakuq mözutami makalakurkur mutsarqan.Nirkurmi mana penqakuypa kayno nirqan:
14 “Tayta Diosta promitirqä jawka kawakuy sacrificiuta rupatsinäpaqmi.Promitishqäta kanan junaq cumplirmi yanukushqä aytsa mikunantsipaq kamarishqa kaykan.
15 Tsaymi qamwan tinkunäpaq yarqamushqä.Tinkuyta munashqänölami kanan tinkuykushqantsi.
16 Lïnupita rurashqa kuyaylapaq fresädawanmi cämatapis qeshtashqä.Tsay fresädaqa Egiptupita apamushqan fïnu lïnupita rurashqami kaykan.
17 Cämä ali asyänanpaqmi* mïrrata, áloeta y canëlata winashqä.
18 Kanan jukla yaykushun waraylata kuyanakur yamashqantsiyaq* kakunantsipaq.
19 Runäpis manami kaychötsu.Payqa ilaykanmi.
20 Atska qellayta apakurkurmi aywashqa.Llena killachöraqmi kutimunqa”.
21 Tsayno shakya shakya parlapaykälarmi tsay mözuta awnitsirqan.
22 Tsaymi jinan höra tsay mözuqa warmipa qepanta yaykurqan.Pishtananpaq töru camalman aywashqanno,trampaman luychu yaykushqanno
23 y wanunanpaq kashqanta mana tantiyakuypa redman pishqu yaykushqannömi aywarqan.Luychupa shonqunpa flëcha elaqpita tuksishqannömi paytapis wanutsinqa.
24 Yätsishqäkunata shumaq tantiyakuy, hïju.Nishqäkunata chaskikuy.
25 Tsay niraq warmiwanqa ama jatikaytsu.
26 Payta qatirarqa wanuymanmi chayankipaq.Atskaqnami tsayno engañaptin wanushqa.
27 Paypa wayinman aywaqkunaqa ushakanqami.
Ichic wilacuycuna
^ 7.5 Prov. 2.16.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 7.17 Wakin runakunaqa mushkünanpaqmi nipäkun.
^ 7.18 Wakin runakunaqa ajayashqantsiyaq nipäkun.
