Proverbios 8:1-36
8 Tantiyakuymi qayaykäshunki.Yachaymi mayanaykita munaykan.*
2 Jirkanchöpis y tinkuq nänikunachöpis shuyaraykäshunkimi.
3 Marka yaykuna jatun punku nawpanchöpis shuyaraykäshunkimi.Tsaykunapita qayakurmi kayno nin:
4 “Taytakuna, lapayki mayamänaykipaqmi qayakaykämü
5 Mana tantiyakuq mözukuna y jipashkuna, tantiyakuq kanaykipaq noqapita yachakäriy.
6 Shumaq mayapäkamay.Mas yachakunaykipaq kaqkunatami tantiyatsishayki.Yätsishqäkunaqa lapanpis alimi kaykan.
7 Rasun kaqlatami yachatsishayki.Imaypis manami lulakütsu.
8 Lapan yätsishqäkunapis Tayta Dios munashqannömi kaykan.Pitapis manami engañätsu.
9 “Shumaq tantiyakuq runaqa rimashqäkunata juklami tantiyan.Paykunaqa tantiyanmi yätsishqäkuna ali kashqanta.
10 Qellaypaq y qoripaq yarpachakunaykipa trukanqa tantiyakuq y yachaq kanaykipaq yarpachakäriy.
11 Tantiyakuq kayqa kuyaylapaq perlaskunapitapis mas alimi kaykan.Yachatsishqäkunamanqa manami imapis tinkuntsu.
12 “Noqaqa yachaywan juntumi kaykä.Yätsishqäkuna lapanpitapis mas alimi kaykan.
13 TAYTA DIOSTA *mantsakuqkunaqa jutsa rurayta kacharinmi.Runa tukuqkunata y alabakuqkunata rabyapämi.Jutsata rurar kawaqkunata y lulakuqkunata manami rikaytapis munätsu.
14 “Yätsishqäkunata chaskikurraqmi runa imatapis shumaq ruran.Noqapitaraqmi yachaqpis y munayniyuqpis rikakun.
15 Noqa yanapaptïraqmi reypis shumaq mandan y autoridäkunapis shumaq arreglan.
16 Tsaynölami noqa yanapaptïraq mayor runakunapis y yanapaqninkunapis shumaq mandan.
17 “Kuyamaqkunataqa noqapis kuyämi.Ashimaqkunaqa tarimanmi.
18 Noqa yanapaptïmi rïcuyan y respitashqa rikakun.
19 Tantiyatsishqäkunaqa alinnin kaq qoripitapis mas alimi kaykan.Yätsishqäkunaqa yoraq qellaypitapis mas alimi kaykan.
20 Imatapis ali kaqkunalatami rurä.Manami imatapis mana ali kaqkunataqa rurätsu.
21 Kuyamaqkunataqa rïcuyänanpaqmi yanapä.Wayinkunacho imapis manami pishinqatsu.
22 “Imatapis manaraq kamarmi TAYTA DIOS noqata kamamarqan.*
23 Kay patsa manaraq kaptinmi noqaqa kaykarqäna.
24 Lamarkunatapis manaraq kamarmi noqata kamamarqan.Tsay höraqa mayukunapis y pukyukunapis manami karqanraqtsu.
25 Jirkakunata manaraq kamarmi puntata kamamarqan.
26 Patsatapis, chakratapis y alpatapis manaraq kamarmi puntata kamamarqan.
27 Lamar jananman jana patsata kamaptinpis tsaychömi kaykarqä.
28 Ciëlucho pukutayta kamaptinpis y lamarman yakuta juntatsiptinpis tsaychömi kaykarqä.
29 Kuchunpita lamar mana pasananpaq mandaptinpis y patsapa cimientunta churaptinpis*
30 payta yanaparmi tsaycho kaykarqä.Noqata rikamarmi kushikurqan.Paypa nawpanchömi waran waran kushikurqä.
31 Kamashqan patsachömi pasaypa kushikurqä.Runakunata rikarmi kushikurqä.
32 “Kuyay wamräkuna, lapayki mayapäkamay.Noqata cäsukamarqa kushishqami kawapäkunkipaq.
33 Yätsishqäta shumaq chaskikäriy.Manakaqman ama churapäkuytsu.
34 Yätsishqäkunata chaskikuqkunaqa kushishqami kawapäkunqa.Paykunami waran waran wayi punkücho shuyarpäman yätsishqäkunata mayapäkunanpaq.
35 Noqata chaskikamaqkunaqa ali kawaytami tarinqapaq.Paykunataqa TAYTA DIOS yanapanqami.
36 Noqapita witikuqkunataqa imapis pasanqami.Noqata mana cäsukamaqkunaqa wanuymanmi chayanqa”.
Ichic wilacuycuna
^ 8.1-3 Prov. 1.20-21.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 8.22 Apoc. 3.14.
^ 8.29 Job 38.8-11; Sal. 104.6-9; Jer. 5.22.
