Romanos 1:1-32
1 Noqa Pablo Jesucristupa sirviqninmi kaykä. *Apostolnin kanäpaq Tayta Dios churamashqa kaptinmi paypa ali wilakuyninta wilakuykä.
2 Tayta Dios promitishqan ali wilakuy wilakushqa kananpaqqa unay profëtakunami qelqarqan. Tsay qelqashqanqa Tayta Diospa *sagrädu palabranmi kaykan.
3 Tsay ali wilakuyqa Tayta Diospa Tsurin [Señor Jesucristupami] kaykan. Paymi rey David aylupita yurirqan.*
4 Runakuna wanutsishqa kaptinpis Espíritu Santumi munayninwan kawaritsimushqa. Tsaynöpami musyantsi Señornintsi Jesucristo Tayta Diospa Tsurin kashqanta.
5 Jesucristo noqantsi rayku wanushqa kaptinmi Tayta Dios kuyapämar apostolnin kanäpaq churamashqa. Tsaymi maytsay nacionkunacho pïmaytapis wilapä Jesucristuman yärakur y Tayta Dios munashqanno kawar payta alabapäkunanpaq.
6 Qamkunatapis Tayta Diosmi akrashushqanki Jesucristupa makincho kawapäkunaykipaq.
7 Romacho taq yärakuq mayikuna, Tayta Dios kuyashushpaykimi qayashushqanki wamrankuna kanaykipaq. Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Romaman Pablo aywayta munashqan
8 Wawqi panikuna, Jesucristuman yärakärishqaykita maytsaychöpis parlaptinmi Jesucristupa jutincho Tayta Diosta qamkunapita agradëcikü.
9 Waran waran qamkunapaq manakushqäta Tayta Dios musyanmi. Paytami sirvï Tsurin Jesucristupa ali wilakuyninta lapan shonqüwan wilakur.
10 Tsaymi manakuykä Tayta Dios munaptinqa imanöpapis qamkunaman watukuq shamunäpaq.
11 Qamkunawan tinkuytami munaykä. Espíritu Santu tantiyatsimashqannömi Jesucristuman shumaq yärakärinaykipaq shakyätsishayki.
12 Tsaynöpis juknintsi juknintsimi shakyätsinakushun Jesucristuman shumaq yärakunantsipaq.
13 Wawqi panikuna, atska kutimi qamkunaman watukuq shamuyta munashqä.* Shamuyta munarpis tsapa kaptinmi mana shamushqätsu. Juk lädu markakunacho wilakuptï mana Israel runakuna Jesucristuta chaskikushqanno qamkuna kaqchöpis Jesucristuta chaskikärinanpaqmi wilakuyta munaykä.
14 Griego o mana griego kaptinpis, yachaq o mana yachaq kaptinpis lapantami Jesucristupa wilakuyninta wilapänä kaykan.
15 Tsaymi Jesucristupa ali wilakuyninta qamkunatapis wilapänäpaq imaykanöpapis Romaman shamuyta munaykä.
16 Noqa manami penqakütsu Tayta Diospa ali wilakuyninta wilakur. Tsay wilakuyqa Tayta Diospa poderninmi kaykan lapan chaskikuqkunata salvananpaq.* Puntataqa Israel runakunatami musyatsirqan y tsaypitanami mana Israel runakunatapis musyatsirqan.
17 Ali wilakuyninchömi Tayta Dios tantiyatsimantsi jutsantsikunata perdonamashqantsita. Tsayno perdonamantsi payman yärakuptintsimi. Palabranchöpis kaynömi qelqaraykan: “Munashqäno kawaq runaqa noqaman yärakamarmi kawanqa”.*
Runakuna jutsasapa kashqan
18 Jana patsapita patsami Tayta Dios rabyakushpan pïmaytapis jutsa ruraqkunata castiganqa. Tsay runakuna jutsata rurarmi tsapata churapan wakin runakunapis Tayta Diospa wilakuyninta mana chaskikärinanpaq.
19 Jutsata rurarpis runakuna musyapäkunmi Tayta Dios kashqanta. Pay kashqantaqa kikin Tayta Diosmi musyatsin.
20 Kamashqankunata rikarmi unaypita patsa runakuna musyapäkun Tayta Dios kashqanta y lapanpaq munayniyuq kashqanta.* Tsaymi Tayta Diospa nawpancho pipis mana tsapakunqatsu kayno nir: “Noqa manami musyashqätsu qam kashqaykita”.
21 Tayta Dios kashqanta musyarpis runakuna manami payta cäsukärintsu ni agradëcikärintsu. Tsaypa trukanqa manakaqkunata yarpaptinmi yarpayninkunapis pasaypa upatakashqa kaykan.*
22 Kikinkuna yachaq kashqanta yarparpis senqan maycho kashqantapis manami musyantsu.
23 Tsaymi imayyaqpis kawaq Tayta Diosta adorananpa trukanqa ïdulukunata adorapäkun. Tsay ïdulukunata rurapäkun runa niraqta, päriqkuna niraqta, uywakuna niraqta y lashtaypa puriqkuna niraqtami.
24 Ïdulukunata adoraptinmi Tayta Dios rabyashpan paykunata kacharishqa shonqun munashqanno melanaypaq kaqkunata rurapäkunanpaq y jukwan jukwan penqaypaq kaqkunata rurapäkunanpaq.
25 Tsay runakunaqa kamamaqnintsi Tayta Dioslata adorananpaq kashqanta musyaykarmi pay kamashqankunalata adorapäkun. Tsaymi rasun kaqta adorapäkunanpa trukanqa manakaqkunata adorapäkun. Tayta Dios imayyaqpis adorashqa kaykulätsun. Amén.
26 Tsaymi tsay runakunata Tayta Dios kacharishqa shanaripakur penqakuypaq jutsakunata rurananpaq. Kachariptinmi warmikunapis runawan tänanpa trukanqa kikinpura olquwannöpis punukärin.
27 Tsaynölami runakunapis warmiwan tänanpa trukan olqupura warmiwannöpis penqakuypaq kakun. Jutsata rurashqanman tupumi paykunata Tayta Dios castigaykan.
28 Tayta Dios munashqanno kawayta mana munaptinmi mana penqakuypa jutsata rurar kawapäkunanpaq Tayta Dios kachariykushqa.
29 Tsayno kawarmi imayka jutsata rurar [*fornicación jutsata rurapäkun,] fiyu kapäkun, kikilanpaq imatapis munapäkun, chikinakärin, envidiösu kapäkun, runa mayinta wanutsipäkun, achäquita ashipäkun, engañapäkun, mana alikunata rurapäkun y wasarima kapäkun.
30 Tsaynölami pitapis jamurpan, [runa mayinta tumpapäkun,] Tayta Diospa contran kapäkun, pïmaywanpis rimanakärin, runa tukärin, alabakärin, lutankunata rurananpaq yarpachakärin y mamanta y taytantapis manami respitapäkuntsu.
31 Imata yätsiptinpis manami chaskikärintsu, awnishqantapis manami cumplipäkuntsu, manami kuyapantsu y perdonakuytapis manami yachapäkuntsu.
32 Paykunaqa musyanmi tsayno kawaqkuna wanutsishqa kananpaq Tayta Dios nishqanta. Tsayta musyaykarpis mana mantsakuypami jutsata rurapäkun. Tsaynölami wakinkunapis lutanta ruraptin kushikärin.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ sagrädu Liyinki santupita tantiyatsikuyta.
^ 1.13 Hech. 19.21.
^ 1.16 Mar. 8.38; 1Cor. 1.18.
^ 1.20 Hech. 17.24-25.
^ 1.21 Efe. 4.17-18.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
