Romanos 10:1-21
10 Wawqi panikuna, Tayta Diostami lapan shonqüwan ruwakü Israel mayïkuna salvakärinanpaq.
2 Paykunaqa Tayta Diosta cäsukuyta munarpis manami tantiyapäkuntsu
3 imano perdonamashqantsitapis. Tsaymi yarpapäkun Diospa leyninkunata cumplirraq perdonashqa kananpaq kashqanta. Perdonashqa kayta munarpis manami Jesucristuta chaskikärintsu.
4 Jesucristo shamushqana kaptin manami Diospa leyninkunata cumplirtsu perdonashqa kaykantsi, sinöqa Jesucristuman yärakurmi. Payman yärakuq kaqtaqa lapantami Tayta Dios perdonan.
5 Leykunata cumplirraq Tayta Dios munashqanno kawayta munaqkunapaqqa Moisés kaynömi qelqarqan: “Leynïkunata cumpliq kaq runaqa lapantami cumplinman”.*
6 Jesucristuman yärakurraq perdonashqa kashqantsita tantiyarmi kayno nintsi: “Shonquntsicho ama yarpäshuntsu kayno nir:* ‘¿Piraq jana patsaman witsanman?’ ”
(Tsay nishqannölami pipis jana patsamanraqtsu aywanman Jesucristuta kay patsaman pushamunanpaq.)
7 “Tsaynöpis ama yarpäshuntsu kayno nir: ‘¿Piraq patsa rurinman yaykuykunman?’ ”
(Tsay nishqannölami pipis wilakuyninta musyayta munar patsa rurinmanraqtsu yaykunman Jesucristuta kawaritsimunanpaq.)
8 Tsaypa trukanqa kaynömi nintsi: “Tayta Diospa wilakuynin shimikicho y shonquykichömi kaykan”.*
Tsaymi wilakuyninta wilakur kayno nintsi:
9 Jesucristo ämuyki kashqanta nirqa y wanushqanpita Tayta Dios kawaritsimushqanta lapan shonquykiwan criyirqa salvashqami kanki.
10 Lapan shonquykiwan criyipäkuptikiqa Tayta Dios perdonashunkimi. “Señor Jesucristuqa ämümi kaykan” nipäkuptikiqa Tayta Dios salvashunkimi.
11 Tayta Diospa palabranmi kayno niykan: “Pipis payman yärakuq kaqqa manami manakaqlapaqtsu yärakunqa”.*
12 Tsaymi Israel runatapis y mana Israel runatapis yärakuptinqa Tayta Dios perdonan. Lapantsipapis japalan Diosnintsi karmi manakuq kaqtaqa pïmaytapis salvan.
13 Tayta Diosmi palabrancho kayno niykan: “Noqata manakamaq kaqtaqa pïmaytapis salvashaqmi”.*
14 ¿Imanöparaq salvananpaq manakunqa Jesucristo salvamaqnintsi kashqanta manaraq criyirqa? ¿Imanöparaq criyinqa wilakuyninta manaraq mayarqa? ¿Imanöparaq mayanqa pipis mana wilapaptinqa?
15 ¿Imanöparaq wilapanqa wilakunanpaq pipis mana kachaptinqa? Tayta Diospa palabranchöpis kaynömi qelqaraykan: “Ali wilakuyta apamuq runakunaqa pasaypa kushikuypaqmi karkaykan”.*
16 Itsanqa wilakuptinpis manami lapan runakunatsu Jesucristupa ali wilakuyninta chaskikärin. Isaías qelqashqanchöpis kaynömi niykan: “Tayta Dios, wilakärishqäta ¿piraq chaskikushqa?”*
17 Imano kaptinpis Jesucristupa ali wilakuyninta* wiyarraqmi payman pipis yärakun.
18 Tsayno kaptinpis ¿manatsuraq wilakuyninta Israel runakuna mayashqa? Paykuna maynami mayashqa. Tayta Diospa palabranchöpis kaynömi qelqaraykan:“Wilakuyninqa maytsaychömi musyakaykan.Palabrankunaqa patsa kuchunyaqmi chayaykan”.*
19 Tsay wilashqankunata musyaykarpis ¿manatsuraq Israel runakuna tantiyashqa? Paykunaqa tantiyarqanmi*. Moiséspis kaynömi qelqarqan: “Jäpa marka runakunatana yanaparmi qamkunata rabyanätsishayki. Mana tantiyakuq runakunata chaskikurmi qamkunata lakikatsishayki”.*
20 Tsaynölami Isaíaspis kayno qelqarqan: “Mana *ashimaqkunatami parlapashqä. Mana ruwakamaq runakunatami yanapashqä”.*
21 Israel runakunapaqmi itsanqa kayno qelqarqan: “Mana cäsukamaq runakunaman waran waranmi rikräta makyarashqä”.*
Ichic wilacuycuna
^ 10.6-8 Deut. 30.12-14.
^ 10.11 Isa. 28.16.
^ 10.17 Wakin griego copiakunachöqa Diospa ali wilakuyninta ninmi.
^ 10.19 Israel runakuna tantiyarqan mana Israel runakunatapis Tayta Dios salvananpaq kashqanta.
^ 10.19 Deut. 32.21.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
