Romanos 13:1-14

GALAYCACHINAPAJ

13 Lapan autoridäkunata Tayta Dios churashqa kaykaptinqa paykunata cäsukäriy. ² Autoridäkunata pipis mana cäsukurqa Tayta Diostapis manami cäsukuykantsu. Autoridäkunata mana cäsukuq kaqtaqa Tayta Diosmi juzganqa. ³ Autoridäkunata cäsukuqkunaqa manami mantsa mantsatsu purin. Mana cäsukuqkunami itsanqa mantsa mantsala purin. Tsayno mana puripäkunaykipaq autoridäkunata cäsukäriy. Cäsukäriptikiqa paykuna alimi rikashunki. ⁴ Lutankunata ruraptintsiqa autoridäkuna castigamäshunmi. Paykunataqa Tayta Dios churashqa ali ruraqkunapa favornin sharkunanpaq y lutan ruraqkunata castigananpaqmi. Manami manakaqlapaqtsu autoridäkuna karkaykan. ⁵ Tsayno kaptinqa autoridäkuna nishqankunata cäsukushun. Manami castigamänantsipaq kaptilantsu cäsukushun, sinöqa Tayta Diosta respitarmi. ⁶ Runakunata yanaparqa Tayta Diostami autoridäkuna sirviykan. Paykunata Tayta Dios churashqa kaykaptinqa impuestukunatapis pägashun. ⁷ Cumplinaykipaq kaqkunata lapanta cumplipäkuy. Impuestuta päganayki kaptinqa pägapäkuy. Pitapis respitanayki kaptinqa respitapäkuy. Pitapis alabanayki kaptinqa alabapäkuy.* ^{Kuyanakunantsipaq nishqan} ⁸ Pipapis jaqan karqa pägapäkuy. Jaqata päganaykipaq yarpachakushqaykinöla kuyanakunaykipaqpis yarpachakäriy. Runa mayintsita kuyarqa Tayta Diospa lapan leyninkunatami cumpliykantsi. ⁹ Tsay leykunacho kayno nirmi qelqaraykan:“Majaykita ama jarukunkitsu.*Runa mayikita ama wanutsinkitsu.*Ama suwakunkitsu.*[Manakaqtaqa pitapis ama tumpankitsu.]*Runa mayikipa imaykankunatapis ama munapankitsu”.* “Kikiki kuyakushqaykino runa mayikita kuyanki” nishqan mandamientuta cumplirqa lapan mandamientukunatapis cumpliykantsimi.* ¹⁰ Runa mayintsita kuyarqa manami contran sharkuntsitsu. Tsaynöpami Tayta Diospa lapan leyninkunata cumpliykantsi. ^{Jutsa ruraykunata kacharinantsipaq nishqan} ¹¹ Jesucristo kutimur salvamänantsipaq kaq junaq cercachönami kaykan. Tsayno kaykaptinqa punukashqano kashqantsipita rikchashun. ¹² Patsa waraqnöna kaykaptinqa jutsa ruraykunata kacharir shumaq yarpachakushun Tayta Dios munashqannöna kawanantsipaq. Tsakäpakushqano kawanantsipa trukanqa atskichönöna kawashun. Espädan kamarikushqa soldädu kaykaqno noqantsipis kamarikushqa kaykäshun. ¹³ Atskichöno kawaykarqa jutsata mana ruraypana kawashun. Wakin runakuna juntakaykur aläpa mikuptinpis y upyaptinpis noqantsiqa ama tsayno kashuntsu. Tsaynöpis majantsita ama jarukushuntsu y majaynaq karpis jukwan jukwan ama kakushuntsu. Ama qayapänakushuntsu ni chikinakushuntsu. ¹⁴ Tsaypa trukanqa qanra röpata loqtikur kacharishqaykino jutsa ruraykunata kacharir Jesucristupa makincho kawapäkuy. Lutanta rurayta munarpis ama rurapäkuytsu.