Romanos 14:1-23
14 Jesucristuman yärakuq mayintsikuna shumaq mana tantiyakuptinpis ama jamurpaytsu. Tantiyashqaykino mana tantiyaptinpis paykunawan ama rimanakäriytsu.
2 Wakinkuna yarpapäkun aytsata mikur jutsata mana rurashqanta y wakinkunanami yarpan aytsata mikur jutsata rurashqanta.*
3 Aytsata mikuqkunapis Tayta Diospa wamranmi karkaykan. Tsayno kaptinqa aytsata mana mikuq kaqqa ama jamurpätsuntsu aytsata mikuq kaqta. Aytsata mikuq kaqpis ama jamurpätsuntsu aytsata mana mikuq kaqta.
4 Qam ¿pitaq kanki Jesucristupa ashmayninta juzganaykipaq? Jutsata ruraptinqa patronnin Jesucristumi juzganqapaq. Imano kaptinpis jutsata mana rurananpaq Jesucristumi yanapaykan.
5 Tsaynölami wakin yärakuq mayintsikuna yarpan Tayta Diosta alabanantsipaq reqishqa junaqla juntakänantsipaq kashqanta. Wakinnami yarpan Diosta alabanantsipaq lapan junaqpis ali kashqanta. Reqishqa junaq juntakarpis o wakin junaq juntakarpis shumaq yarpachakäriy mayqan junaq juntakänaykipaq kashqanta.
6 Juntakaykur Tayta Diosta alabapäkunaykipaq juk junaq mas ali kashqanta yarpaq runapis Tayta Diosta cäsukuyta munarmi tsayno yarpan. [Diosta alabapäkunaykipaq lapan junaq ali kashqanta yarpaq runapis Tayta Diosta cäsukuyta munarmi tsayno yarpan.] Aytsata mikuqpis Tayta Diosta agradëcikuykur paypa jutinchömi mikun. Aytsata mana mikuqpis Tayta Diosta agradëcikurmi aytsaynaq mikuykunatana paypa jutincho mikun.*
7 Manami kikilantsipaqtsu kawantsi y manami kikilantsipaqtsu wanuntsi.
8 Kawarpis Tayta Diospaqmi kawaykantsi. Wanurpis Tayta Diospaqmi wanushun. Tsaymi kawarpis wanurpis Jesucristupa makincho kaykantsi.
9 Kawaqkunapapis y wanuqkunapapis Señornin kananpaqmi Jesucristo wanushqa y wanushqanpita kawarimushqa.
10 Lapantsipis paypa makincho kaykarqa ¿imanirtaq yärakuq mayintsikunata juzgarkaykanki? Tayta Diospa nawpanman* chayaptintsi lapantsitami juzgamäshun.*
11 Tayta Diospa palabranchöpis kaynömi qelqaraykan:“Noqa Tayta Diosmi jurar kayno nï:Lapanmi nawpäman qonqurpakamunqa.Lapanmi cäsukamänanpaq nimanqa”.*
12 Tsayno kaptinqa lapantsimi Tayta Diosta cuentata qoshun.
Yärakuq mayintsita jutsata mana ruratsinantsipaq nishqan
13 Tayta Dios juzgamänantsipaq kaykaptinqa yärakuq mayintsikunawan ama juzganakushunnatsu. Yärakuq mayintsi imatapis rurashqantsita rikar qepaman kutikunanpaq kaptinqa tsayta ama rurashuntsu.
14 Jesucristo discïpulunkunata yachatsishqa kaptinmi* lapan mikuypis aytsapis ali kashqanta musyä. Tsayno kaptinpis wakin yärakuq mayintsikuna mana tantiyarmi yarpapäkun aytsata mikur jutsata rurashqanta. Tsayno yarparqa aytsata mikur jutsatami rurarkaykan.
15 Yärakuq mayiki lakikärinanpaq kashqanta musyaykar aytsata mikurqa manami paykunata kuyarkaykankitsu. Paykunatapis salvananpaq Jesucristo wanushqa kaykaptinqa aytsata ama mikupäkuytsu. Mikuptikiqa Jesucristuman manami yärakunqanatsu.
16 Tsaynöpis yärakuq mayiki contrayki rimananpaq kaptinqa aytsata ama mikupäkuytsu.
17 Tayta Dios *mandaykashqancho kawayqa manami munashqantsita mikunantsipaqtsu ni upunantsipaqtsu kaykan, sinöqa alilata ruranantsipaq, pïmaywanpis ali kawanantsipaq y Espíritu Santu yanapamaptintsi kushishqa kawanantsipaqmi.
18 Jesucristuta sirvir tsayno kawarqa Tayta Dios munashqannömi kawaykantsi. Tsayno kawaptintsiqa manami pipis jamurpämäshuntsu.
19 Tsayno kaptinqa shumaq yarpachakushun yärakuq mayintsikunawan ali kawanantsipaq y shakyätsinakur Tayta Dios munashqanno kawanantsipaq.
20 Tayta Dios kamashqan lapan mikuy ali kaptinpis salvashqan kaqkuna qepaman kutikunanpaq kaptinqa tsay mikuyta ama mikupäkuytsu. Mikurqa mana alitami rurapäkunki.
21 Yärakuq mayintsi [lakikunanpaq] o qepaman kutikunanpaq kaptinqa aytsatapis ama mikupäkuytsu ni vïnutapis ama upupäkuytsu. Tsaynöla imapis jutsa kashqanta yarpaptinqa ama rurapäkuytsu.
22 Imatapis mikur jutsata mana rurashqaykita tantiyarqa mana wilakuylapa shonqulaykicho tsararäkuy. Mikunaykipaq ali kashqanta tantiyarqa kushishqami kankipaq.
23 Aytsapis o ima mikuypis mana ali kashqanta yarparqa ama mikupäkuytsu. Mana ali kashqanta yarpaykar mikurqa jutsatami rurarkaykanki. Tsaynölami mana ali kashqanta yarpaykar imatapis rurarqa jutsata rurarkaykanki.
Ichic wilacuycuna
^ 14.2 Tsay witsan uywakunata pishtapäkuq ïdulukunapa jutinchömi. Israel runakuna yarparqan pipis tsay aytsata mikurqa supaykunata adoraykashqantami. Tsaymi Jesucristuta chaskikurpis mikuyta mana munarqantsu. Jesucristuta chaskikuq mana Israel runakunami itsanqa tantiyakurqan tsay aytsata mikurpis supaykunata mana adoraykashqanta. Tsaymi paykunaqa ïdulukunapaq pishtashqan aytsata mikurqan.
^ 14.10 Wakin griego copiakunachöqa Cristupa nawpanman nipäkun.
^ 14.10 2Cor. 5.10.
^ 14.11 Isa. 45.23.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
