Romanos 15:1-33
15 Yärakuq mayintsi shumaq mana tantiyar imalapis jutsa kashqanta yarpaptinqa tsayta ama rurashuntsu. Kikintsi munashqantsita ruranantsipa trukanqa
2 imatapis rurashun yärakuq mayintsi Tayta Dios munashqanno kawananpaq.
3 Jesucristupis manami kikin munashqantatsu rurarqan. Tayta Diospa palabranchöpis kaynömi qelqaraykan: “Qamta manakaqman churashushpaykiqa noqatapis manakaqmanmi churaykäman”.*
4 Tayta Diospa palabranqa tantiyatsimänantsipaqmi kaykan. Palabranta yachakurmi payman yärakur musyantsi promitishqankunata cumplinanpaq kashqanta.
5 Mana ajayaypa y mana lakikuypa yärakunantsipaqmi Tayta Dios imaypis yanapaykämantsi. Tsaymi payta manakü Jesucristo kuyamashqantsino jukniki juknikipis kuyanakur kawapäkunaykipaq.
6 Kuyanakur kawashpaykimi Señor Jesucristupa Papänin Tayta Diosta juk shonqula alabarkaykanki.
Mana Israel runakunapaqpis Diospa ali wilakuynin kashqan
7 Tsayno kaykaptinqa Jesucristo kuyamashqantsino yärakuq mayintsikunawan kuyanakushun. Tsayno kawaptintsimi Tayta Diosta alabapäkunqa.
8 Kayta yarpätsishayki: Israel runakunata salvananpaqmi Jesucristo shamurqan. Tsaynöpami Abrahamta, Isaacta y Jacobta promitishqanta Tayta Dios cumplirqan.
9 Tsaynöpis Jesucristo shamurqan mana Israel runakunapis kuyapäkuq kashqanpita Tayta Diosta alabananpaqmi. Tayta Diospa palabranchöpis kaynömi qelqaraykan:“May nacioncho karpis qamta adorashaykimi.Lapan shonqüwan cantarmi qamta alabashayki”.*
10 Tsaynölami kaynöpis qelqaraykan:“Maytsay nacioncho taqkuna,Tayta Dios kuyashqan runakunawan juntu kushikäriy”.*
11 Maspis kayno nirmi qelqaraykan:“Maytsay nacioncho taqkuna,Tayta Diosta alabashun.Maytsaycho tarpis payta adorashun”.*
12 Profëta Isaías qelqashqanchöpis kaynömi niykan:“Isaípita miraqpitami juk runa yurinqa.Maytsay nacioncho taq runakunata mandananpaqmi shamunqa.Mana Israel runakunapis paymanmi yärakunqa”.*
13 Tayta Dios yanapaykuläshunki payman yärakur jukniki juknikipis ali kawapäkunaykipaq, Espíritu Santupa makincho kawapäkunaykipaq y nawpanman chayanaykipaq kashqanta musyar waran waran kushishqa kawapäkunaykipaq.
Maytsaypapis Pablo wilakur purishqan
14 Wawqi panikuna, musyämi ali shonqu kapäkushqaykita, Tayta Diospa wilakuyninta yachakärishqaykita y wakintapis tantiyatsinaykipaq yachaq kapäkushqaykita.
15 Tsayno qamkuna kaptikipis kay cartacho yarpaykätsimü yachakärishqaykita mana qonqanaykipaqmi. Tsayno niykä Tayta Dios kuyamashpan
16 Jesucristupa ali wilakuyninta mana Israel runakunata wilapänäpaq churamashqa kaptinmi. Tsaymi wilakuykä mana Israel runakunapis Espíritu Santu yanapaptin Tayta Diospaq ali sacrificiuno kananpaq.
17 Wilakunäpaq Jesucristo yanapamaptinmi kushikü.
18 Tsaymi alabakunäpa trukanqa pay yanapamashqalanpita maytsaychöpis parlashaq. Yanapamaptinmi wilakuyninta wilakuykä y runakuna rikakunanpaq ali kawaykä. Tsaymi mana Israel runakunapis Tayta Diosta cäsukurkaykan.
19 Espíritu Santupa munayninwan milagrukunata rurarmi Jerusalénpita qalaykur hasta Ilírico provinciayaq Jesucristupa wilakuyninta chayatsishqä.
20 Tsayno karpis wakinkuna wilakushqan markakunaman manami jatikayta munätsu. Tsaymi pipis manaraq wilakushqan markakunacho Jesucristupa wilakuyninta wilakuykä.
21 Tayta Diospa palabranchöpis kaynömi qelqaraykan:“Pipis mana wilapashqantami musyanqa.Imaypis mana mayashqantami mayanqa”.*
Romaman Pablo aywayta yarpashqan
22 Maytsaypapis wilakur purirmi qamkuna kaqman shamuyta kamäpakushqätsu.*
23 Kananqa kay puriykashqä markakunacho Jesucristupa wilakuyninta wilakushqänami. Nawpapita patsa yarpashqänölami qamkunata watukurir
24 Españapa aywayta yarpaykä. Tsayman aywanäpaq imalawanpis yanapaykalämanki.
25 Kananqa Jerusalénparaqmi aywaykä yärakuq mayintsikunapaq shuntashqan ofrendata apar.
26 Macedonia y Acaya provinciakunacho yärakuq mayintsikunami ofrendata shuntashqa Jerusaléncho kaykaq waktsa wawqi panikunapaq.*
27 Ofrendata shuntar alitami rurapäkushqa. Paykunapis Jesucristupa wilakuyninta Jerusalénpita qalaykur wilapaptinmi chaskikärishqa. Wilapashqanpita kushikushpanmi ofrendata shuntashqa Jerusaléncho kaykaq waktsa wawqi panikunaman apanäpaq.*
28 Kay ofrendata Jerusaléncho wawqi panikunata entregaykurnami Españapa aywaqno pasäda qamkunatapis watukushayki.
29 Qamkuna kaqman chayamuptïmi Jesucristo yanapamäshun shakyätsinakur kushikunantsipaq.
30 Wawqi panikuna, Señor Jesucristupa jutincho y kuyamaqnintsi Espíritu Santupa jutinchömi ruwakü lapan shonquykiwan Tayta Diosta noqapaq manakärinaykipaq.
31 Tsayno manakäriy Judea provinciaman chayaptï mana cäsukuq runakunapita Tayta Dios tsapaykamänanpaq. Tsaynöpis manakäriy apashqä ofrendata Jerusaléncho wawqi panikuna kushishqa chaskikärinanpaq.
32 Jerusaléncho lapanpis ali kananpaq Tayta Dios yanapamaptinqa qamkuna kaqman chayamuptï kushishqami qoyäshun.
33 Lapaykitapis Tayta Dios ali kawapäkunaykipaq yanapaykuläshunki. Amén.
Ichic wilacuycuna
^ 15.9 2Sam. 22.50; Sal. 18.49.
^ 15.10 Deut. 32.43.
^ 15.11 Sal. 117.1.
^ 15.12 Isa. 11.10.
^ 15.21 Isa. 52.15.
^ 15.25-26 1Cor. 16.1-4.
^ 15.27 1Cor. 9.11.
