Romanos 3:1-31
3 Tsayno kaptinqa Israel runa kashqanpis y señalakushqa kashqanpis ¿alitsuraq kaykan?
2 Aw, alimi kaykan. Tsayno ali kaykan Israel runakunata Tayta Dios wilakuyninta puntata musyatsishqa kaptinmi.*
3 Musyaykarpis manami lapantsu Tayta Dios nishqanta cumplipäkurqan. ¿Paykuna mana cumpliptintsuraq Tayta Diospis promitishqankunata cumplinqatsu?
4 Ama tsayno yarpäshuntsu. Runakuna lulakuptinpis Tayta Diosqa lapan promitishqankunatami cumplin. Tayta Diospa palabranchöpis kaynömi qelqaraykan: “Nishqaykita cumplirmi rasun kaqlata juzgaykämanki. Juzgamaptiki imano tsapakuytapis manami kamäpakütsu”.* *
5 Tsayno kaptinpis wakin runakuna mana tantiyarmi kayno nipäkun: “Jutsata rurashqäpita Tayta Dios perdonamar alitami ruraykan. Castigamarmi itsanqa mana alita ruraykan”.
6 Runakuna tsayno niptinpis manami tsaynötsu kaykan. Runakunata juzgananpaq kashqanta musyaykarqa ¿imanirtaq mana tantiyapäkunkitsu castigarpis alita rurashqanta?
7 Tsaynölami wakin runakunapis lutanta yarpar kayno nipäkun: “Tayta Diosta promitishqäta mana cumpliptïpis perdonamaptinmi runakuna tantiyapäkun kuyapäkuq kashqanta. Tsayno kaykaptinqa ¿imanirtaq jutsata rurashqäpita Tayta Dios juzgamanqa?”
8 Tsay runakuna yarpashqanno rasunpa kaptinqa jutsata rurashun Tayta Dios kuyapäkuq kashqanta tantiyapäkunanpaq. Tsayno yarpashqanqa manami alitsu kaykan. Tsayno yachatsir purishqäta wakin runakuna niptinpis manami tsaynötsu yachaykätsï. Tsayno niq runakunataqa Tayta Dios juzgar mana kuyapaypami castiganqa.
Lapan runakuna jutsayuq kashqan
9 ¿Wakin runakunapita mas jutsaynaqtsuraq Israel runakuna karkaykan? Manami. Kay cartacho nishqänöpis Israel runapis mana Israel runapis jutsayuqmi karkaykan.
10 Tayta Diospa palabranchöpis kaynömi qelqaraykan:“Manami juklaylapis jutsaynaqqa kantsu.
11 Pipis manami tantiyakuntsu.Pipis manami Tayta Diosta *ashintsu.
12 Lapan runakunapis jutsatami rurarkaykan.Lapanpis lutankunatami rurarkaykan.Pipis manami kantsu alita ruraqqa.Ni juklaylapis manami kantsu.*
13 Shiminpis kicharaykaq sepultüranömi kaykan.Lulakunanpaqqa mamalan wachashqami karkaykan.*Rimashqanpis culebrapa venënunnömi kaykan.*
14 Runa mayintapis maldicionarmi ashlirkaykan.*
15 Runa mayinta wanutsinanpaqpis warakaylami aywapäkun.
16 Maypa aywarpis lutankunata rurarmi runa mayinkunata lakikatsin.
17 Ali kaway imano kashqantapis manami musyapäkuntsu.*
18 Tayta Diosta *mantsakunanpaq manami yarpaylapis yarpapäkuntsu”.*
19 Tayta Diospa palabrancho tsayno niptinmi musyantsi leyninkunata musyaq runakunapis jutsayuq kashqanta. Tsaymi runakunata Tayta Dios juzgaptin pipis tsapakuyta kamäpakunqatsu.
20 Tayta Diospa leyninkunata cumplishqanwanqa manami pipis jutsankunapita perdonashqatsu kanqa. Tayta Diospa leyninkunaqa manami salvamänantsipaqtsu kaykan, sinöqa jutsayuq kashqantsita tantiyatsimänantsipaqmi.*
Jesucristuman yärakuptintsi Tayta Dios salvamashqantsi
21 Kananmi itsanqa Tayta Dios musyatsimashqantsi leyninkunata cumpliyta mana kamäpakuptintsipis imanöpa salvamänantsipaq kashqanta. Tsaytami Moisés y profëtakuna qelqashqankunachöpis musyatsimantsi.
22 Jesucristuman yärakuptintsimi Tayta Dios perdonamashpantsi salvamantsi pï kaptintsipis.*
23 Lapan runakuna jutsayuq karmi Tayta Diospa nawpanman chayayta kamäpakärintsu.
24 Tsayno kaykashqapis Jesucristo rantimaptintsimi Tayta Dios kuyapäkuq kashpan perdonamantsi.
25 Tsayno perdonamantsi Jesucristuman yärakuptintsimi. Paymi noqantsi rayku sacrificiu kar yawarninta jicharqan. Tsaynöpami Tayta Dios musyatsimantsi ali juzgaq juez kashqanta*. Unaypitana runakuna jutsayuq kaptinpis Tayta Dios manami castigarqantsu.
26 Tsayno mana castigarqantsu runakunapa trukan Jesucristuta cruzcho castigananpaq karmi. Tsaynöpami tantiyatsimantsi ali juzgaq juez kashqanta y Jesucristuman yärakuq runakunata perdonashqanta.
27 Tsayno kaptinqa ama alabakushuntsu kayno nir: “Alikunata ruraptïmi Tayta Dios salvamashqa”.
Manami alikunata rurashqantsipitatsu Tayta Dios salvamashqantsi, sinöqa Jesucristuman yärakushqantsipitami.
28 Tsaymi kayno nï: Manami leyninkunata cumplishqantsipitatsu Tayta Dios salvamashqantsi, sinöqa Jesucristuman yärakushqantsipitami.
29 ¿Tayta Diosqa Israel runakunalapatsuraq Diosnin? ¿Manatsuraq mana Israel runakunapapis Diosnin? Payqa mana Israel runapapis Diosninmi.
30 Tayta Diosqa juklaylami.* Tsaymi Israel runatapis y mana Israel runatapis Jesucristuman yärakuptinqa salvaykan.
31 Jesucristuman yärakuylapa salvacionta tariykarqa ¿Diospa leyninkunata manakaqmantsuraq churaykantsi? Manami manakaqmantsu churaykantsi, sinöqa Jesucristuman yärakuptintsimi tsay leykunata cumpliqtano Tayta Dios chaskimantsi.
Ichic wilacuycuna
^ 3.2 Sal. 147.19.
^ 3.4 Kay textucho niykan juzgarpis promitishqankunata Tayta Dios cumplishqanta.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 3.10-12 Sal. 14.1-3; 53.1-3.
^ 3.13b Sal. 140.3.
^ 3.15-17 Isa. 59.7-8.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 3.25 Ali juzgaq juez karqa jutsayuq runata karpis o paypa trukanta karpis castiganmi. Tsaymi jutsata rurashqantsipita Jesucristuta trukantsi castigarqa ali juzgaq juez Tayta Dios kaykan. Mana ali juzgaq juez karqa runatapis ni trukantapis manami castiganmantsu.
