Romanos 4:1-25
4 Yarpäshun unay ayluntsi Abrahamta Tayta Dios imano perdonashqantapis.
2 Alikunata rurashqanpita Tayta Dios perdonaptinqa Abraham alabakunmanmi karqan. Itsanqa manami alikunata rurashqanpitatsu payta perdonarqan, sinöqa pay nishqanta criyishqanpitami.
3 Tayta Diospa palabranpis kaynömi niykan: “Nishqanta criyiptinmi jutsaynaqtana Abrahamta Tayta Dios chaskirqan”.*
4 Musyashqantsinöpis arupakuq runa arushqanpita pägunta chaskinmi. Mana aruykar imalatapis chaskirmi itsanqa regälulata chaskin.
5 Tsaynölami jutsantsikunata Tayta Dios dembaldila perdonamantsi. Manami alikunata rurashqantsipitatsu perdonamantsi, sinöqa payman yärakushqantsipitami.
6 Tayta Dios dembaldila perdonashqan runa kushishqa kashqanpitami rey Davidpis kayno qelqarqan:
7 “Kushishqami kawan Tayta Dios perdonashqan runa. Paypa jutsankunataqa Tayta Dios manami yarparannatsu.
8 Kushishqami kawan jutsaynaqtana Tayta Dios rikashqan runa”.*
Manaraq señalakuptin Abrahamta Tayta Dios perdonashqan
9 ¿*Señalashqa Israel runakunalatsuraq perdonashqa kaykan? ¿Manatsuraq señalaküni mana Israel runakunapis perdonashqa kaykan? Yarpachakushun Abrahamta Tayta Dios perdonaptin imano kashqanta. Nishqänöpis yärakuptinmi Abrahamta Tayta Dios jutsaynaqtana chaskirqan.
10 ¿Señalakuptinraqtsuraq Abrahamta perdonarqan? Manami. Manaraq señalakuptinmi perdonarqan.
11 Perdonarkurraqmi Tayta Dios Abrahamta nirqan señalakunanpaq.* Tsayno señalakurqan Tayta Diosman yärakushqanpita perdonashqanta mana qonqananpaqmi. Tsaymi señalaküni kaqkunapis Abrahamno yärakur paypa aylun karkaykan. Tsaynöpami Tayta Dios paykunatapis perdonaykan.
12 Tsaynölami señalakushqa kaqkunapis Abrahamno yärakurqa Abrahampa aylun karkaykan. Abrahampa aylunqa kaykan manami señalakushqa kashqanpitatsu, sinöqa Abrahamno manaraq señalakur yärakushqanpitami.
Abrahamno yärakuptintsi salvamänantsipaq nishqan
13 Manami leykunata cumplishqanpitatsu Abrahamta y paypita miraqkunatapis Tayta Dios promitirqan kay patsata qoykunanpaq*, sinöqa Tayta Diosman yärakushqanpitami.
14 Leykunata cumpliqkunala Tayta Dios promitishqanta chaskinanpaq kaptinqa manakaqlapaqmi kanman karqan Tayta Diosman yärakushqanpis. Tayta Dios promitishqanpis manami välinmantsu karqan.*
15 Leyninkunata mana cumpliqkunataqa Tayta Dios castiganmi. Tsayno kaptinpis tsay leykunata musyaykarpis manami cumplintsitsu.
16 Tsaymi leyninkunata cumplishqantsipitatsu Tayta Dios promitimashqantsi salvacionta chaskintsi, sinöqa payman yärakushqantsipitami. Tsaynöpami Israel runa kaptintsipis mana Israel runa kaptintsipis Abrahamno yärakuptintsiqa Tayta Dios kuyapämashpantsi salvamantsi. Abraham yärakushqanno Tayta Diosman yärakurqa Abrahampa aylunmi kaykantsi.*
17 Abrahampaqqa Tayta Diospa palabranchöpis kaynömi qelqaraykan: “Atska nación runakunapa taytan kanaykipaqmi qamta churashqä”.*
Tayta Dios tsayno nirqan payman Abraham yärakushqa kaptinmi. Tayta Diosmi wanushkunata kawaritsimun y imapis mana kashqanpita imatapis kaman.
Tayta Dios promitishqanta Abraham criyishqan
18 Abrahamta promitirmi Tayta Dios kayno nirqan: “Atska nación runakunapa taytan kaptikimi qampita miraqkunaqa yupaytapis mana atipaypaq kanqa”.
Tsay promitishqanta Tayta Dios imanöpa cumplinanpaq kashqanta mana tantiyarpis Abrahamqa criyirqanmi.*
19 Tsayno promitishqan witsanqa Abraham kaykarqan pachak (100) watayuqnami. Tsuriyuq kananpaqpis awkinnami karqan. Warmin Sarapa killa qeshyanpis chawashqanami karqan. Tsayno kaptinpis Abrahamqa Tayta Diosmanmi yärakurqan.
20 Manami janan shonqulatsu yärakurqan, sinöqa agradëcikurmi promitishqanman lapan shonqunwan yärakurqan.
21 Payqa criyirqan promitishqanta Tayta Dios cumplinanpaq munayniyuq kashqantami.
22 Tsayno yärakushqanpitami Tayta Dios jutsaynaqtana chaskirqan.
23 Qelqaraykashqancho nishqanno manami Abrahamlatatsu Tayta Dios perdonarqan,
24 sinöqa noqantsitapis payman yärakushqami perdonamantsi. Paymi Señornintsi Jesucristuta munayninwan kawaritsimurqan.
25 Jutsayuq kashqantsipita noqantsi rayku wanunanpaqmi Jesucristuta Tayta Dios kachamurqan.* Perdonamänantsipaqmi Tayta Dios kawaritsimurqan.
Ichic wilacuycuna
^ 4.3 Gén. 15.6; Gál. 3.6.
^ 4.7-8 Sal. 32.1-2.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 4.11 Gén. 17.10.
^ 4.13 Gén. 17.4-6; 22.17-18.
^ 4.25 Isa. 53.4-5.