Romanos 5:1-21
5 Señornintsi Jesucristuman yärakur perdonashqa karmi Tayta Dioswan alina kawaykantsi.
2 Jesucristuman yärakuptintsimi Tayta Dios kuyapämashpantsi perdonamantsi. Tsaymi kushikuntsi gloriaman pushamänantsipaq kashqanta musyar.
3 Tsaynöpis kushikuntsi imano nakarpis payman yärakunantsipaq Tayta Dios tantiyatsimashqantsita musyarmi.
4 Yärakunantsipaq tantiyatsimaptintsimi yachakuntsi Tayta Dios munashqanno kawanantsipaq. Pay munashqanno kawarmi musyantsi gloriaman shuntakamänantsipaq kashqanta.
5 Shuntakamänantsipaq kashqantaqa manami manakaqlapaqtsu shuyaraykantsi. Tayta Dios tsayta musyatsimantsi qomashqantsi Espíritu Santuwanmi. Espíritu Santumi shonquntsicho musyatsimantsi Tayta Dios rasunpa kuyamashqantsita.
6 Salvakuyta mana kamäpakuptintsimi Tayta Dios destinashqan junaq chayamuptin noqantsi rayku Jesucristo wanurqan.
7 Ali runapa trukan pipis wanuyta mana munaptinpis capazchari pilapis paypa trukan wanunman.
8 Jesucristumi itsanqa jutsayuq kaykaptintsipis noqantsi rayku wanurqan. Tsaynöpami Tayta Dios musyatsimantsi kuyamashqantsita.
9 Jesucristo yawarninta jichashqanpita Tayta Dios perdonaykämashpantsiqa ¿manatsuraq castïgunpita salvamäshun?
10 Tayta Diospa contran kaykaptintsi Tsurin wanushqanpita perdonaykämashpantsiqa ¿manatsuraq kawarimushqanpita salvamäshun?
11 Tsaypis manami tsaylatsu, sinöqa Señornintsi Jesucristo wanushqanpita perdonashqana karmi Tayta Diosta kushishqa alabaykantsi.
Adánpita wanuy shamuptinpis Jesucristupita salvación shamushqan
12 Jutsatapis wanuytapis juk runala kay patsaman apamushqanpitami* lapan runakunapis jutsata rurar wanupäkun.
13 Diospa leyninkuna manaraq kaptinpis runakuna jutsata rurarqanmi. Jutsata rurarpis jutsayuq kashqantaqa manami musyapäkurqantsu.
14 Itsanqa Adán kawashqanpita patsami runakuna wanupäkun. Tsayno wanupäkun Adánno jutsata mana ruraykarpis.*
Manami Adánnötsu Jesucristo kaykan.
15 Adán jutsata rurashqanpitami tsaytsika runakuna wanupäkun. Jesucristo wanushqanpitami tsaytsika runakuna salvakärin. Tsayno salvakärin Tayta Diospis y Jesucristupis kuyapäkuq kaptinmi.
16 Jutsata rurashqa karmi Adánqa mana tinkuntsu Tayta Dios kachamushqan Jesucristumanqa. Jutsata Adán rurashqanpitami lapan runa castigashqa kananpaq kaykan. Jesucristo noqantsi rayku wanushqanpitami Tayta Dios perdonamantsi.
17 Jutsata Adán rurashqanpita lapan runakuna wanuptinpis Jesucristuman yärakuqkunaqa *mana ushakaq kawaytami taripäkunqa. Tsayno taripäkunqa Tayta Dios kuyapäkuq kar dembaldila perdonaptinmi.
18 Adán mana cäsukuq kashqanpitami lapan runakuna castigashqa kananpaq karqan. Jesucristo cäsukuq kashqanpitami itsanqa lapan runakuna perdonashqa kar salvacionta taripäkunqa.
19 Tsaymi juk runala Tayta Diosta mana cäsukushqanpita lapan runakuna jutsata rurapäkun. Tsaynölami juk runala Tayta Diosta cäsukushqanpita atska runakunata jutsaynaqtana Tayta Dios chaskinqa.
20 Tayta Diosqa leyninkunata musyatsimashqantsi jutsayuq kashqantsita tantiyakunantsipaqmi. Jutsayuq kaykaptintsipis Tayta Dios kuyapäkuq karmi lapan jutsantsikunata perdonaykämantsi.
21 Runakuna jutsata rurashqanpita wanurkaykaptinpis Tayta Dios kuyapämashpantsimi Señornintsi Jesucristo wanushqanpita perdonamantsi nawpancho imayyaqpis kawanantsipaq.
Ichic wilacuycuna
^ 5.12 Gén. 3.6-19
^ 5.14 Adánqa Tayta Dios nishqanta musyaykarmi jutsata rurarqan (Gén. 2.16-17; 3.11-12). Wakin runakunaqa Tayta Dios nishqanta mana musyarmi jutsata rurapäkun. Tsaymi Adánno jutsata mana rurashqanta nirqa Tayta Dios nishqanta mana musyar jutsata rurashqanta niykan.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
