Romanos 8:1-39
8 Tsaymi Jesucristucho kaqkunaqa mana condenashqatsu kanqa. [Jutsata rurar kawananpa trukanqa Espíritu Santu tantiyatsishqannömi kawarkaykan.]
2 Jutsa ruraypa munaynincho kashqantsipitami Espíritu Santu jorqamashqantsi. Jutsa ruraypa munaynincho wanushqano karpis Jesucristo salvamaptintsimi ali kawaytana tarintsi.
3 Jutsa ruraypa munaynincho kaptintsimi Tayta Diospa leyninkuna mana salvamarqantsitsu. Tsayno kaptinmi Tsurin Jesucristuta Tayta Dios kachamurqan noqantsino runa kananpaq. Paymi sacrificiupaq apapäkushqan uywano noqantsi rayku wanurqan. Tsaynöpami Tayta Dios salvamashqantsi jutsa ruraypa munaynincho kashqantsipita.
4 Salvamashpantsimi leyninkunata cumpliqtanöna Tayta Dios chaskimantsi. Tsaymi jutsata rurar kawanantsipa trukanqa Espíritu Santu tantiyatsimashqantsinöna kawaykantsi.
5 Jutsa ruraypa munaynincho kawaqkunaqa shonqun munashqanta rurananpaqmi yarpachakärin. Espíritu Santupa munaynincho kawaqkunami itsanqa Espíritu Santu tantiyatsishqanno kawananpaq yarpachakärin.
6 Jutsa ruraypa munaynincho kawaqkunaqa manami Tayta Diospa nawpanman imaypis chayanqatsu. Espíritu Santupa munaynincho kawaqkunami itsanqa Tayta Diospa nawpancho imayyaqpis kushishqa kawapäkunqapaq.
7 Jutsa ruraypa munaynincho kawaqkunaqa Tayta Diospa contran karmi leyninkuna nishqanno kawayta munapäkuntsu ni kamäpakunpistsu.
8 Yapaymi nï: Tsay runakunaqa manami Tayta Dios munashqanno kawayta kamäpakuntsu.
9 Noqantsimi itsanqa jutsa ruraypa munayninchönatsu kawaykantsi. Tayta Diospa Espïritun noqantsicho kaptinmi paypa munayninchöna kawaykantsi. Jesucristupa Espïritun* noqantsicho mana kaptinqa manami Jesucristupatsu kaykantsi.
10 Jesucristo noqantsicho kaptinmi perdonashqana kaykantsi. Tsaymi jutsata rurashqantsipita wanunantsipaq kaptinpis Espíritu Santu kawayta qomantsi.
11 Tayta Diospa Espïritun noqantsicho kaptinmi* wanushqanpita Jesucristuta kawaritsimushqanno noqantsitapis Tayta Dios kawaritsimäshun. Tsayno kawaritsimäshun noqantsicho kaykaq Espíritu Santupa munayninwanmi.
12 Wawqi panikuna, tsayno kaykaptinqa jutsa ruraypaq shonquntsi rapipa rapiptinpis jutsata ama rurashuntsu.
13 Jutsa ruraylacho kawaptintsiqa infiernumanmi Tayta Dios qaykamäshun. Espíritu Santu tantiyatsimashqantsino jutsa ruraypaq wanushqano karmi itsanqa *mana ushakaq kawayta taripäkushun.
14 Tayta Diospa Espïritun tantiyatsishqanno kawaqkunaqa lapanpis Tayta Diospa wamrankunami karkaykan.
15 Wamran kanantsipaqmi Espíritu Santu shuntakamashqantsi. Espíritu Santuta chaskikushqana karmi patronninta ashmay mantsa mantsala manakushqannötsu Tayta Diosta manakuntsi, sinöqa mana mantsakuypana manakur “¡Abba, Papä!” nintsi.*
16 Kikin Espíritu Santumi tantiyaykätsimantsi Diospa wamran kashqantsita.
17 Tayta Diospa wamran karmi pay promitishqan herenciata Jesucristo chaskishqanno noqantsipis chaskishunpaq. Imano nakarpis Jesucristuman yärakurqa paywanmi gloriacho kawashunpaq.
Lapanpis mushuqman tikrananpaq nishqan
18 Kay patsacho nakashqantsikunaqa rätulami kaykan. Gloriacho kushikunantsipaq kashqanmi itsanqa imayyaqpis mana ushakaq kanqa. Tsaytaqa lapan shonqüwanmi criyï.
19 Tsayno kaptinmi Tayta Dios wamrankunata nawpanman shuntananta lapan kamashqankuna shuyarpaykan.
20 Shuyashqanyaqqa pay kamashqankuna maldicionädumi kaykan. Manami kikinpitatsu maldicionädu kaykan, sinöqa Tayta Dios maldicionashqanpitami.* Kanan maldicionädu kaptinpis
21 wamrankunata mushuqman Tayta Dios tikratsishqannölami lapan kamashqankunatapis mana ushakänanpaq mushuqman tikratsinqa.
22 Tsayyaqmi Tayta Dios lapan kamashqankunapis warmi wachayta nakar lakikushqanno lakikurkaykan.
23 Manami kamashqankunalatsu tsayno lakikurkaykan, sinöqa Tayta Dios jukla shuntamänantsita munarmi noqantsipis lakikuykantsi. Espíritu Santuta *primiciatano chaskikushqa karmi* shuyarpaykantsi cuerpuntsitapis mushuqmanna tikratsinanpaq.*
24 Mushuqman tikratsimänantsipaqmi Tayta Dios salvamashqantsi. Itsanqa tsay höra manami chayamunraqtsu. Mushuqman tikratsishqana kaykarqa ¿imatanataq shuyarashwan?
25 Mushuqman manaraq tikrarmi imano nakarpis shuyaraykantsi.
26 Tayta Diosta manakurpis manami shumaqlaqa kamäpakuntsitsu pay munashqanno manakuyta. Tsayno kaptintsimi Espíritu Santu Tayta Diosta waqapaypa favornintsi ruwakun.
27 Ruwakurmi Tayta Dios munashqannöla imaypis manakun. Espíritu Santu noqantsipaq manakushqankunata Tayta Dios musyanmi. Payqa shonquntsi imata yarpashqankunatapis musyanmi.
Tayta Dios kuyamashqantsita pipis mana michänanpaq nishqan
28 Musyantsimi ima pasaptinpis Tayta Diosta *kuyaqkunapaqqa lapanpis ali kananpaq kashqanta. Paykunataqa Tayta Dios qayarqan kikin munashqanno kananpaqmi.
29 Unaypita patsa reqirmi destinarqan Tsurin Jesucristuno kananpaq. Tsaynöpami Jesucristuqa lapan yärakuqkunapa mayor wawqin kaykan.
30 Destinashqan kaqkunatami Tayta Dios qayarqan. Qayashqan kaqkunatami perdonarqan. Perdonashqan kaqkunatanami gloriaman pushanqa.
31 Tsayno kaykaptinqa ¿imatanataq munashun? Tayta Dios favornintsi kaykaptinqa ¿pitaq contrantsi sharkunqa?
32 Noqantsi rayku wanunanpaq kuyay Tsurintapis kachaykämurqa ¿manatsuraq lapan promitimashqantsitapis paywan Tayta Dios cumplinqa?
33 Kikin Tayta Dios akraykämaptintsiqa y jutsa rurashqantsikunata perdonaykämaptintsiqa ¿piraq nawpancho acusamäshun?
34 Jesucristo wanushqanpita kawarirkamur Tayta Diospa alawqa kaq nawpancho jamashpan favornintsi parlaykaptinqa ¿piraq castigashqa kanantsipaq ninqa?
35 Jesucristupa kuyakuyninpita ¿piraq rakimäshun? Payqa kuyamantsimi nakaptintsipis, lakikuptintsipis, runakuna chikimaptintsipis, yarqanaptintsipis, röpaynaq kaptintsipis, peligrucho kaptintsipis y runakuna wanutsimaptintsipis.
36 Tayta Diospa palabranchöpis kaynömi qelqaraykan:“Munashqaykino kawaptïmi runakuna chikimashpan noqakunata imaypis wanutsipäkaman.Pishtananpaq kaq uyshanömi karkaykä”.*
37 Tsaykuna pasamaptintsipis Tayta Dios kuyamaptintsimi kushishqa imaypis yärakuykantsi.
38 Tayta Dios kuyamantsimi kawaptintsipis, wanuptintsipis, ima pasamaptintsipis y ima pasamänantsipaq kaptinpis. Tsaymi *angilkunapis, ni *supaykunapis, ni ima munayniyuq kaqkunapis,
39 ni jana patsacho kaqkunapis, ni patsa rurincho kaqkunapis, ni Tayta Dios ima kamashqankunapis paypa kuyakuyninpita mana rakimäshuntsu. Tsayno kuyamashqantsita tantiyatsimashqantsi noqantsi rayku wanunanpaq Señornintsi Jesucristuta kachamurmi.
Ichic wilacuycuna
^ 8.9 Tayta Diospa Espïritunpaq y Jesucristupa Espïritunpaq parlarqa Espíritu Santupaqmi parlaykan.
^ 8.11 1Cor. 3.16.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 8.15 Mar. 14.36; Gál. 4.6.
^ 8.20 Gén. 3.17; Rom. 5.12.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 8.23 Primiciaqa punta poquqkunami kaykan. Punta poquqta rikar cosëcha kananpaq kashqanta musyashqantsinömi Espíritu Santuta chaskikur musyantsi gloriaman chayanantsipaq kashqanta.
^ 8.23 2Cor. 5.2-4.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 8.36 Sal. 44.22.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
