Romanos 9:1-33
9 Pasaypa lakikushqätapis kanan wilashayki. Lakikushqätaqa Jesucristupis y Espíritu Santupis musyanmi.
2 Israel mayïkunapaq pasaypami lakikü. Paykunapaq lakikuptïmi shonqu nanaypis tsariman.
3 Israel mayïkuna Jesucristuman yärakur salvakunantami munä. Salvakunanpaq kaptinqa alimi kanman paykunapa trukan infiernuman qaykamaptinpis.
4 Israel runakunataqa Tayta Dios akrarqan wamrankuna kananpaqmi.* Munayniyuq kashqantapis paykunatami musyatsirqan. Paykunawan *pactuta rurarmi leyninkunatapis entregarqan. Imano adorananpaqpis yachatsirqanmi. Promitishqankunapis paykunapaqmi kaykan.
5 Paykunaqa Abrahampita, Isaacpita y Jacobpita miraqkunami karkaykan. Jesucristupis Israel aylupitami yurirqan. ¡Payqa lapanpaq munayniyuq Diosmi kaykan! ¡Imayyaqpis alabashqa kaykulätsun! Amén.
Akrashqan kaqkunalata Tayta Dios salvashqan
6 Jesucristuta Israel runakuna mana chaskikuptinpis ama yarpäshuntsu Tayta Dios promitirkur mana cumpliykashqanta. Manami lapan Israel runakunatsu Tayta Dios promitishqankunata chaskipäkunqa.
7 Tsaynöpis manami lapantsu Abrahampita miraqkuna wamrankuna karkaykan. Abrahamtami Tayta Dios kayno nirqan: “Qamta promitishqäqa tsuriki Isaacpaq y paypita miraqkunapaqmi kaykan”.*
8 Tsayno niptin manami lapantsu Abrahampita miraqkuna Tayta Diospa wamrankuna kaykan, sinöqa promitishqanta chaskikunanpaq Tayta Dios akrashqan kaqkunalami.
9 Abrahamta promitirmi Tayta Dios kayno nirqan: “Watan kutimuptï olqu wawayuqnami Sara kaykanqa”.*
10 Tayta Dios nishqanno yuriq wamraqa unay ayluntsi Isaacmi karqan. Isaacwan Rebeca taptinmi wawan milïshu yurirqan.
11 Manaraq yuriptinmi Rebecata Tayta Dios kayno nirqan: “Punta yuriq kaqmi qepa yuriq kaqpa munaynincho kanqa”.*
12 -
Payta tsayno nirqan tsay milïshukuna alita y mana alita manaraq ruraptinmi. Manami alita rurashqanpitatsu Tayta Dios pitapis akran, sinöqa kikin munashqan kaqtami.
13 Tayta Diospa palabranchöpis kaynömi qelqaraykan: “Jacobtami kuyarqä y Esaútanami chikirqä”.*
14 Tsayno karqa Tayta Dios ¿lutantatsuraq rurarqan? ¡Manami!
15 Moiséstapis Tayta Dios kayno nirmi tantiyatsirqan: “Kuyapashqä kaqta kuyapämi. Perdonayta munashqä kaqtaqa perdonämi”.*
16 Tsayno kaptinqa manami kikin runa munashqanpitatsu o imatapis alita rurashqanpitatsu Tayta Dios akran, sinöqa kuyapashqan kaqtami pitapis akran.
17 Egiptupa mandaqnin Faraónpaqpis Tayta Diospa palabran kaynömi niykan: “Maytsaychöpis taq runakuna munayniyuq kashqäta musyananpaqmi mandaq kanaykipaq qamta churashqä”.*
18 Tsaynömi Tayta Dios wakin runakunata kuyapan y wakintanami shonqunta chukruyätsin.
19 Tsayno niptï capazchari kayno nipäkamankiman: “Runakunapa shonqunta kikin chukruyaykätsirqa ¿imanirtaq jutsayuq kashqanta Tayta Dios niykan? Kikin tsayno ruraptinqa ¿piraq michanman?”
20 Tsayno nirqa qam ¿pitaq kanki Tayta Dios imata rurashqantapis manakaqman churanaykipaq? Mitu mankapis ruraqninta manami kayno nintsu: “¿Imanirtaq tsaynöqa ruramarqayki?”*
21 Manka ruraqqa munashqannömi mitupita ruran. Tsay mitulapitami juk wichita ruran fiestacho manijananpaq y juk wichitana waran waran manijananpaq.*
22 Tsaynölami Tayta Diospis wakin runakunata destinarqan castigananpaq. Jutsata rurashqanpita rabyakur castigananpaq karpis manami juklatsu castigan, sinöqa pacienciakurmi shuyaran.
23 Wakin runakunatanami destinarqan gloriaman pushananpaq. Tsayno destinarqan kuyapäkuq kashqanta musyatsimänantsipaqmi.
24 Tsay kuyapashqan runakunaqa noqantsimi kaykantsi. Paymi akramashqantsi Israel runa kaptintsipis y mana Israel runa kaptintsipis.
25 Profëta Oseas qelqashqanchöpis kaynömi niykan: “Jäpa marka runakuna kaptikipis wamräkuna kashqaykitami nishayki. Mana kuyashqä runakuna kaptikipis kananqa kuyapäshaykimi”.*
26 Kaynöpis qelqaraykanmi: “ ‘Qamkunaqa manami noqapatsu’ nishushqayki partichöpis runakuna kaynömi nipäkunqa: ‘Paykunaqa imayyaqpis kawaq Tayta Diospa wamrankunami karkaykan’ ”.*
27 Wakin Israel runakunala salvashqa kananpaq kashqantami Isaías kayno qelqarqan: “Lamar kuchuncho aquyshanöraq Israel runakuna tsaytsika kaptinpis walkaqlatami Tayta Dios salvanqa.
28 Ichiklanami pishiykan Tayta Dios lapan runakunata juzgananpaq”.*
29 Isaías mastapis kaynömi qelqarqan: “Lapanta mandaq Tayta Dios juk ishkaylatapis kawaykaqta mana kachamaptintsiqa Sodomano y Gomorranömi ushakashwan karqan”.*
Jesucristuta Israel runakuna mana chaskikushqan
30 Tantiyakushun. Mana Israel runakunaqa Diospa leyninkunata cumplinanpaq mana yarpachakuykarpis Jesucristuman yärakurmi salvakurkaykan.
31 Israel runakunami itsanqa “Tayta Diospa leyninkunata cumplirmi salvakushun” nirpis mana salvakärintsu.
32 ¿Imanirmi tsayno mana salvakärintsu? Jesucristuman mana yärakurmi. Payman yärakunanpa trukanqa tsay leykunata cumplishqanmanmi yärakärin. Tsaynöpami tunitsikuq rumiman takakar ishkipäkun.
33 Tayta Diospa palabranchöpis kaynömi qelqaraykan:“*Siónmanmi takakätsikuq y tunitsikuq rumita churä.Tsayman takakarmi atska runakuna ishkinqa.Pipis payman yärakuq kaqqa manami manakaqlapaqtsu yärakunqa”.*
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 9.7 Gén. 21.12.
^ 9.9 Gén. 18.10, 14.
^ 9.11-12 Gén. 25.23.
^ 9.13 Mal. 1.2-3.
^ 9.15 Éxo. 33.19.
^ 9.20 Isa. 29.16; 45.9.
^ 9.21 Jer. 18.4-6.
^ 9.27-28 Isa. 10.22-23.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 9.33 Isa. 28.16.
