Rut 1:1-22
1 Israel nacioncho juezkuna mandashqan witsanmi fiyupa muchuy karqan. Tsaymi Judá trïbu runakuna tashqan Belén markapita juk runa warminta y tsurinkunata pushakurkur Moab nacionman* aywakurqan.
2 Tsay runapa jutinmi karqan Elimelec. Warminpa jutinmi karqan Noemí. Tsurinkunapa jutinmi karqan Mahlón y Quelión. Paykunaqa Judácho kaq Belén markapita Efrata aylu runakunami karqan. Moabman chayaykurmi tsaycho tarqan.
3 Tsaypita Moab nacioncho Elimelec wanuptin Noemí viüda rikakur ishkan wawankunalawanna quëdarqan.
4 Tsay wawankunami mözuyarkurna warmita ashirqan jinan Moab nación markapita. Queliónpa warminpa jutinmi karqan Orfa y Mahlónpa warminpa jutinmi karqan Rut. Moab nacionman chayashqanpita chunka watata
5 Mahlón y Quelión wanurqan. Runan y wawankuna wanuptinmi Noemí japalanna rikakurqan.
Rutwan Noemí Belénman kutishqan
6 Tsaypitana Noemí mayarqan Israel runakunaman TAYTA DIOS bendicionninta churaptin mikuy alina wayuykashqanta.
7 Tsaymi Noemíqa ishkan lumtsuyninkunata pushakurkur Moab nacionpita Judáman kutikurqan.
8 Aywarkaykashqanchömi lumtsuyninkunata kayno nirqan: “Mamayki kaqman kutikäriy. Noqata y wawäkunata ali rikamashqaykipita TAYTA DIOS qamkunatapis yanapaykuläshunki.
9 Tsaynöpis TAYTA DIOS yanapaykuläshunki juk runawan taptiki ali kawanaykipaq”.
Tsayno nirkushpan lumtsuyninkunata despidikur mutsarqan. Tsawraqa lumtsuyninkuna pasaypa lakikur waqashpan
10 kayno nipäkurqan: “Manami kutikuyta munapäkütsu. Markaykiman qamwan aywakushun”.
11 Tsawraqa Noemí kayno nirqan: “Kutikäriyna, hïja. ¿Imapaqnataq qatirämankipis? Aywaptintsipis wawä manami kanqanatsu winaptin paywan tänaykipaq.
12 Wayikipa kutikäriy. Noqaqa chakwannami kä runawan yapay tänäpaqpis. Kanan tsakay runawan punur qeshyaq rikakuptïpis
13 wawä mözuyänanyaqqa shuyarankitaqku. Manami runaynaqlaqa kankimantsu. Wawäkunatapis y runätapis TAYTA DIOS qechumashqa kaptinmi pasaypa lakishqa kaykä. Qamkuna noqawan aywar nakaptiki peorraqchari lakikushaq”.
14 Tsayno niptin lumtsuyninkuna iktsuypa iktsurmi waqapäkurqan. Waqaykashqanpitami Orfaqa suedranta mutsarkushpan wayinpa kutikurqan. Rutmi itsanqa suedranta kacharqantsu.
15 Tsawraqa Rutta Noemí kayno nirqan: “Lumtsuy mayikiqa markaykimanmi kutikuykan. Markaykichöqa diosnikikunapis kaykanmi. Qampis paylawan yanaqänakur kutikuy”.
16 Tsayno niptin Rut kayno nirqan: “Imata nimaptikipis manami kacharishaykitsu, mamay. Noqaqa qam aywashqaykipami aywashaq. Tashqaykichömi täshaq. Markaykipis markämi kanqa. Diosnikipis Diosnïmi kanqa.
17 Maychöpis qam wanushqaykichömi noqapis wanushaq. ¡Kawaykarraq qamta kachariykur aywakuptïqa mana kuyapaypa TAYTA DIOS castigamätsun!”
18 Tsayno niptinmi Noemí imatapis mana nirqannatsu.
19 Tsawraqa ishkan aywakurmi Belénman chayarqan. Chayaptinmi lapan kushikurqan. Warmikuna juknin jukninpis kayno parlapäkurqan: “¡Noemími kutimushqa!”
20 Tsawraqa Noemí kayno nirqan: “Kananqa amana Noemí* nipäkamaytsu. Tsaypa trukanqa Mara* nipäkamay, lapanpaq munayniyuq Tayta Dios pasaypa lakikuyman churamashqanpita.
21 Kaypita aywakuptï runäpis wawäkunapis y imaykäpis karqanmi. Kananqa waktsayashqami kutimushqä. Lapanpaq munayniyuq TAYTA DIOS lakikuyman churamaptinqa amana Noemí nipäkamaynatsu”.
22 Tsaynömi Moab nacionpita lumtsuynin Rutwan Noemí kutirqan. Belénman paykuna chayarqan cebäda cosëcha qalaykuykaptinmi.
Ichic wilacuycuna
^ 1.1 Moab nacionqa ishkay chunka (20) lëwanömi Belén markapita karqan. Moab nacionpita masta musyanaykipaq liyinki Gén. 19.37; Núm. 22—24; Deut. 2.9; 23.3-6; Jue. 11.17.
^ 1.20a Noemí ninanqa kushishqa ninanmi.
^ 1.20b Mara ninanqa asqaq ninanmi. Hebreo runakunaqa ima desgraciapis pasaptin vïdan asqaq kashqantami nipäkuq.
