Rut 3:1-18
3 Tsaypitanami lumtsuyninta Noemí kayno nirqan: “Hïja, manami runaynaqlaqa täkunkimantsu.
2 Runäpa aylunraq kaptinmi Boozwan tätsiyta yarpaykä. Palapakuq aywaptikipis payqa alimi chaskishushqanki. Kanan tsakaymi cebädata wayrananpaq ëraman aywanqa.
3 Qampis shumaq armakurir, alinnin kaq röpaykita jatikurkur y perfümita winakurkur ayway. Chayaykurna pakakunki mikuyta upuyta ushashqanyaq.
4 Mayman punuq aywashqantapis shumaq rikaykur chaki jaytalanpa punukuykunki. Tsaychönami parlapäshunkipaq qamwan tayta munarqa”.
5 Tsayno niptin Rut kayno nirqan: “Yätsimashqaykinölami rurashaq”.
6 Tsaymi ëraman aywaykur suedran yätsishqannöla Rut rurarqan.
7 Booznami tsay ëracho kushishqa mikurkur upurkur cebäda qoturaykashqan kaq nawpancho punurqan. Tsaycho punuykaptinmi qatarashqanta yachaylapa qarirkur Boozpa chaki jaytanpa Rut punukuykurqan.
8 Pulan paqas rikcharkamur Booz tikrapakushqanchömi tantiyarqan chaki jaytancho warmi punuraykaqta.
9 Tsaymi tapurqan kayno nir: “¿Pitaq kaykanki?”
Tapuptinmi kayno nirqan: “Rutmi kaykä, tayta. Runäpa aylun kaptikimi costumbri kashqanno shuntakamänaykita munaykä”.
10 Tsayno niptinmi Booz kayno nirqan: “Noemípa wawankuna wanur ushakashqa kaptinpis qamqa alimi yarpachakushqanki tsay aylun mana elqänanpaq.* Tsayno yarpachakushqaykipita Tayta Dios yanapaykuläshunki. Wakin warmikunano karqa mözuwanmi pobri kaptinpis, rïcu kaptinpis tankiman karqan.
11 “Ama lakikuytsu, hïja. Kay markacho lapanmi musyan ali warmi kashqaykita. Tsaymi manakamashqaykino lapanta rurashaq.
12 Runaykipa aylun kaptïpis* juk kaykanraqmi mas legïtimu kaq aylun.
13 Kananqa tsaylapa punukuy. Warami musyashun tsay runa shuntashunaykipaq o mana shuntashunaykipaq kashqantapis. Pay shuntashuptikipis alimi kanqa. Mana shuntashuptikiqa noqami shuntashaykipaq. Nishqätaqa TAYTA DIOS mayaykämanmi. Rasunpami promitishqäta cumplishaq”.
14 Tsay tsakayqa Boozpa chaki jaytalanchömi Rut punurqan. Tsaycho punushqanta pipis rikananta Booz mana munaptinmi tsaka tsakala Rut sharkurqan aywakunanpaq.
15 Manaraq aywakuptinmi Booz kayno nirqan: “Jakuykita kamay cebädata qepipänäpaq”.
Tsawraqa jakunta kamapaptin ishkay arröbatano cebädata qepiparqan. Joqariparkuptinmi aparikurkur wayinman kutikurqan.
16 Wayinman Rut chayaykuptinmi suedran kayno tapurqan: “Hïja, ¿ima nishushqankitaq Booz?”
Tsawraqa Rut wilaparqan Booz lapan nishqankunata.
17 Nirkurmi kayno nirqan: “ ‘Jinaylaqa manami suedraykiman chayankimantsu’ nirmi kay cebädata qepipämashqa”.
18 Tsawraqa Noemí kayno nirqan: “Mä, shuyäshun, hïja. Imanöshi kanqa. Nishushqaykita manaraq rurarqa tsay runa jamaytapis manami tarinqatsu”.
Ichic wilacuycuna
^ 3.10 Israel runakunapa costumbrin kashqanno Boozpa tsurin Rutcho yuriptin Noemípa wawanpa tsurinnömi karqan. Tsay costumbrinpita masta musyanaykipaq liyinki Deut. 25.5-6.
