Rut 4:1-22
4 Tsaypitanami marka yaykuna punkuman aywaykur Booz jamaraykaptin Rutpa runanpa mas legïtimu kaq aylun pasaykarqan. Paytami Booz qayarqan kayno nir: “Shamuy parlanantsipaq”.
Tsayno niptinmi tsay runaqa aywaykur jamakurqan.
2 Nirkurnami tsay markacho taq chunka mayor runakunata Booz qayaykatsir jamakärinanpaq nirqan.
3 Aylun runatami Booz kayno nirqan: “Moab nacionpita kutimuq Noemími runanpa chakranta rantikuyta munaykan. Tsay chakraqa ayluntsi Elimelecpa kaqmi kaykan.
4 Tsaymi mas legïtimu aylun kaptiki qamta wilä rantiyta munarqa kay mayor runakunapa nawpancho rantinaykipaq. Mana rantiyta munarqa wilamay noqapis aylun kaykarqa rantinäpaq”.
Tsayno niptin tsay runa nirqan: “Rantishaqchari”.
5 Tsawraqa Booz kayno nirqan: “Noemípa chakranta rantishpaykiqa Moab nacionpita shamuq viüda Rutwanpis tänaykimi. Tsaynöpami Rutpa wawan yurir wanuq runanpa tsurinno kanqa tsay chakrapa duëñun kananpaq”.
6 Tsawraqa tsay runa kayno nirqan: “Tsayno kaptinqa manami rantïmantsu. Rutwan taptïqa tsay rantinäpaq kaq chakra manami herenciänatsu kanqa, sinöqa paypa wawanpaqmi. Noqa rantinäpa trukanqa qam rantiy”.
7 Tsay witsanmi Israel nacioncho pipis aylunpa chakranta rantiyta mana munarqa lanqinta loqtirir qoykuq chakra rantiyta munaq kaqta. Tsaynöpami runakuna musyapäkuq lanqinta chaskiq kaqna chakrata rantinanpaq kashqanta.
8 Tsaymi lanqinta loqtirir Boozta aptaparkur kayno nirqan: “Ayluntsipa chakrantaqa qam rantiy”.
9 Tsayno niptinmi Boozqa mayor runakunata y tsaycho kaykaq wakin runakunata kayno nirqan: “Qamkuna rikarkaykankimi Elimelecpa, Queliónpa y Mahlónpa chakranta Noemípita rantiykashqäta.
10 Tsaynöpis qamkuna musyapäkunkimi Mahlónpa viüdan Rut noqapa warmïna kananpaq kashqanta. Tsaynöpami Rutpa wawan Mahlónpa tsurinnöna kanqa y Mahlónpa chakranpis Rutpa wawanpaqna kanqa.* Nishqäkunataqa lapaykimi mayarkaykanki”.
11 Tsawraqa mayor runakuna y tsaycho wakin runakunapis kayno nipäkurqan: “Nishqaykitaqa lapantami mayaykä. TAYTA DIOS bendicionninta Rutman churaykulätsun. Raquelpa y Leapa wawankuna atska kashqanno paypapis wawankuna atska kaykulätsun. Paykunapita miraqlami lapantsipis Israel runakunaqa kaykantsi. Qamtapis TAYTA DIOS yanapaykuläshunki Efrata nishqan Beléncho pïmaypis respitashunaykipaq.
12 Tsaynöpis TAYTA DIOS bendicionninta qoykuläshunki Tamarcho Judápa tsurin Farespita* miraqkuna atska kashqanno qampapis tsurikikuna Rutcho atska kananpaq”.
13 Tsaynöpami Rutwan Booz tarqan. TAYTA DIOS bendicionninta qoptinmi Rut qeshyaq rikakur olqu wamrata wachakurqan.
14 Tsaymi warmikuna Noemíta kayno nirqan: “¡TAYTA DIOS alabashqa kaykulätsun! Paymi munashqa Rut wawayuq kananta. Tsay wawan wilkaykino kar Israel nacionnintsicho respitashqa kaykulätsun.
15 Chakwanyaptikipis tsay wilkaykimi yanapashunkipaq y ashmashunkipaq. Kuyashuqniki lumtsuynikipa wawan karmi qanchis olqu wawaykipitapis mas ali rikaykäshunki”.
16 Noemínami wilkanta pasaypa kuyar ashmarqan.
17 Tsaymi Noemípa vecïnankuna kayno nirqan: “¡Noemíqa wamran aparishqami puriykan!”
Tsay wamrapa jutintami churaparqan Obed jutin kananpaq. Obedmi Isaípa* taytan karqan. Isaínami Davidpa taytan karqan.
Davidpa unay aylunkuna
18 Kaykunami Farespita Davidyaq miraqkuna karqan:Farespa tsurinmi karqan Hezrón.
19 Hezrónpa tsurinmi karqan Ram.Rampa tsurinmi karqan Aminadab.
20 Aminadabpa tsurinmi karqan Naasón.Naasónpa tsurinmi karqan Salmón.
21 Salmónpa tsurinmi karqan Booz.Boozpa tsurinmi karqan Obed.
22 Obedpa tsurinmi karqan Isaí.Isaípa tsurinnami karqan David.*
Ichic wilacuycuna
^ 4.10 Deut. 25.5-6.
^ 4.12 Gén. 38.27-30.
^ 4.17 Wakin traduccionkunachöqa Jesépa ninmi.
^ 4.18-22 1Crón. 2.5-15; Mat. 1.3-6.
