Salmos 112:1-10
112 ¡Aleluya!Kushishqami kawan Tayta Diosta *mantsakuq runaqa.Tsay runaqa Diospa mandamientunkunata cumplirmi kushikun.
2 Paypita miraqkunami Israel nacioncho munayniyuq kanqapaq.Paykunaqa bendiciontami chaskinqapaq.
3 Wayincho imaykankunapis putsuy putsuymi kanqapaq.Paykunaqa pïmaypaqpis ali shonqumi kanqapaq.
4 Wakin runakuna tsakäpakushqano kaykaptinpis ali runaqa atskichönömi kaykan.Payqa ali shonqumi, kuyapäkuqmi y alilata ruraqmi kaykan.
5 Pipis manakuptin ali runaqa juklami makyaykun.Ima ruraykunatapis shumaq yarpachakuykurmi ruran.
6 Manami imaypis lutanta rurantsu.Paytaqa pïmaypis yarparkunmi.
7 Mana ali noticiata mayarpis manami mantsakuntsu.Ima kaptinpis TAYTA DIOSLAMANMI yärakun.
8 Imaypis jawkalami kawan.Manami imatapis mantsakuntsu.Contrankuna ushakashqantapis rikanmi.
9 Waktsakunata imaypis yanapanmi.Alilatami imaypis ruran.Pïmaypis paytaqa respitanmi.
10 Tsayta rikarmi fiyu runaqa payta chikin.Rabyashpan kiruntapis uchunraqmi.Lutanta rurananpaq yarpachakushqankunaqa manami kamakanqatsu.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
