Salmos 32:1-11
(1a) David qelqashqan salmumi.
32 (1b) Kushishqami kawan Tayta Dios perdonashqan runa.Paypa jutsankunataqa Tayta Dios manami yarparannatsu.
2 Kushishqami kawan jutsaynaqtana TAYTA DIOS rikashqan runa.Tsay runaqa jutsa rurashqanta manami pakantsu.*
3 Jutsa rurashqäpita perdonta manaraq manakurqa waran waranmi lakikushqä.Tulükunapis pasaypami qotukarqan.
4 Paqasta junaqta castigamaptikimi fiyupa nakashqä.Usya killacho wayta shushur ushakashqannömi kalpäpis ushakashqa. Selah
5 Tsaymi jutsa rurashqäkunapita perdonta manakushqä.Contrayki rurashqäta manami pakashqänatsu.Yarpaynïchömi kayno nirqä: “TAYTA DIOSTAMI jutsäkunata wilashaq”.Manakamuptïmi perdonamashqanki.* Selah
6 Qamman yärakamuqkunaqa nakashqan höra* imaypis manakamushunkimi.Bunyaypa bunyar yaku aywaqno nakaykuna chayashpanpis paykunata manami ushakätsinqatsu.
7 Qammi kanki pakakunä.Qammi nakaykunapitapis tsapämanki.Tsaymi kushishqa imaypis alabashayki. Selah
8 Tayta Dios kaynömi nin:“Qamtaqa imaypis alimi rikashayki.Imano kawanaykipaqpis kikïmi tantiyatsishayki y yachatsishayki.
9 Mulano y cawalluno mana tantiyakuq ama kaytsu.Mulata y cawallutaqa bozalwan y frënuwanmi manijapäkun.Frënu mana kaptinqa manami manijayta kamäpakuntsu”.
10 Fiyu runakunaqa pasaypami nakanqapaq.TAYTA DIOSMAN yärakuq runakunataqa Tayta Diosmi kuyapar yanapanqa.
11 TAYTA DIOS munashqanno kawaqkuna, pay yanapashushqaykipita kushikäriy.Ali shonqu runakuna, ¡kushikur alabapäkuy!
Ichic wilacuycuna
^ 32.1-2 Rom. 4.7-8.
^ 32.5 2Sam. 12.13; Sal. 51.1-4.
^ 32.6 Tsaynömi nin Septuaginta y Siríaca unay traduccionkunacho. Hebreo idiömachönami kayno nin: de encontrar solamente.
