Salmos 40:1-17
(1) Cantaqkunapa mandaqninpaqmi. David qelqashqan salmu.
40 (2) Yanapamänanpaqmi TAYTA DIOSTA shuyarashqä.Qayakushqäta mayamarmi yanapamashqa.
2 (3) Wanwanyaykaq pözuman jeqashqano kaykaptïmi salvamashqa.Marpuman* jatikashqano kaykaptïmi jorqamashqa.Yapay mana jatikänäpaq rumi jananmanmi ichitsimashqa.Tsaymi mana lutskakaypa puriqnöna kawaykä.
3 (4) Tsayno yanapamaptinmi mushuq alabanzata cantar Tayta Diosnintsita alabaykä.Salvamashqanta rikarmi atska runakuna kushikushpan TAYTA DIOSMAN yärakurkaykan.
4 (5) TAYTA DIOSMAN yärakuqkunaqa kushishqami kawarkaykan.Paykunaqa runa tukuqkunaman manami yärakärintsu.Ïdulukunatapis manami adorapäkuntsu.
5 (6) TAYTA DIOS, atska kutimi mantsariypaq kaqkunata rurar yanapamashqanki.Noqakunata yanapamashqaykita yupaytapis manami atipätsu.Tukuynöpa yanapamashqaykita wilakurpis lapantaqa manami ushämantsu.
6 (7) Qammi tantiyatsimashqanki sacrificiukunawan y tsaki mikuy ofrendakunawan mana kushikushqaykita.Tsaynöpis musyatsimashqanki rupatsina sacrificiukunata y purificación sacrificiukunata mana munashqaykitami.
7 (8) Tsaymi kayno nirqä:“Röllucho noqapita qelqaraykashqannömi cäsukunäpaq kaycho kaykä.
8 (9) Munashqaykita ruranäpaq listumi kaykä, Tayta Dios.Leynikikunatapis lapantami shonqücho yarparaykä”.*
9 (10) Lapan runakuna juntakashqanchömi ali ruraq kashqaykita wilakushqä.Mana upälakushqäta musyankimi.
10 (11) Wilakurmi kayno nirqä: “Tayta Diosqa alilatami ruran.Promitishqanta cumplirmi salvamantsi.Kuyapäkuqmi y rasun kaqlatami nimantsi”.
11 (12) Kuyapaykalämay, TAYTA DIOS.Promitimashqaykinöla kuyapämar imaypis tsapaykalämay.
12 (13) Yupaytapis mana atipaypaq nakaykunawanmi nakaykä.Pasaypa jutsasapa karmi waqaylawan nawïpis tsakarpunna.Aqtsäpitapis mas atskami jutsäkuna kaykan.Tsaymi imata ruranäpaqpis gänasnï kannatsu.
13 (14) TAYTA DIOS, salvaykalämay.Jukla shamur yanapaykalämay.
14 (15) Wanutsimayta yarpaqkunaqa penqaytukushpan uysurpätsun.Mana aliman ishkinäta munaqkunaqa penqaytukushqa qeshpikäritsun.
15 (16) Asipämaqkunapis penqaytukushqa aywakäritsun.
16 (17) Qamta *ashishuqnikikunaqa kushikäritsun.Salvashqaykipita kushikuqkunaqa imaypis kayno nipäkutsun:“TAYTA DIOS alabashqa kaykulätsun”.
17 (18) Noqaqa lakishqa karmi ima ruraytapis mana kamäpakütsu.Jukla shamur salvaykalämay, Tayta.Qammi kanki yanapamaqnï y salvamaqnï.Tayta Diosnilä, jukla yanapaykalämay.
Ichic wilacuycuna
^ 40.2 Wakin runakunaqa sinigaman o janquman nipäkun.
^ 40.8 Heb. 10.5-7.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
