Salmos 63:1-11
(1) David qelqashqan salmu. Judá nacionpa chunyaqnincho kashqanta yarparmi kay salmuta qelqarqan.*
63 (2) ¡Tayta Dios, qamlami Diosnï kanki!Tsaka tsakalami qamta *ashï.Yakunaypanöraqmi nawpaykicho kayta munä.Wanunayparaqmi qamwan kawayta munä.Pasaypa tsaki chakranömi kaykä.*
2 (3) Templuykicho qamta rikaytami munaykä.Lapanpaq munayniyuq kashqaykitami tantiyakuyta munaykä.
3 (4) Kuyamashqaykimi mas ali kaykan kawashqäpitapis.Tsaymi lapan shonqüwan imaypis alabashayki.
4 (5) Kawashqäyaq qamtami agradëcikushayki.Makïta joqarkamurmi manakamushaq.
5 (6) Lapan shonqüwan kushishqa alabarmi contentakushaq.Ali alilata mikur kushikushqänömi kushikushaq.
6 (7) Cämächöpis qamlapaqmi yarparaykä.Punuyta mana tarirpis qamlapaqmi shonqü yarparaykan.
7 (8) Lapanchöpis qammi yanapamashqanki.Älayki rurincho karmi pasaypa kushikü.*
8 (9) Lapan shonqüwanmi qamman qelikamü.Alawqa kaq makikiwanmi imaypis jancharämanki.
9 (10) Wanutsimayta munaqkunaqa kikinkunami puntata wanupäkunqa.
10 (11) Paykunataqa espädawanmi wanutsipäkunqa.Ayantapis *chacalkunami mikunqapaq.
11 (12) Reymi itsanqa Tayta Dios yanapashqanpita kushikunqa.Tayta Diospa jutinta joqariqkunaqa kushishqami alabapäkunqa.Lulakuqkunami itsanqa ima niytapis mana kamäpakunqatsu.
Ichic wilacuycuna
^ 63.0 1Sam. 23.14-29.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 63.1 Sal. 42.1-2; 143.6.
^ 63.7 Sal. 17.8; 91.4.
^ chacal Chacalqa atuq niraq jirka uywami kaykan. Chacalqa atuqpita mas jatulanmi. Atuqkunaqa castankunawanmi puripäkun. Chacalkunami itsanqa majanwan majanwan puripäkun (Isa. 13.22; Jer. 9.11; Lam. 4.3).
