Salmos 69:1-36
(1) Cantaqkunapa mandaqninpaqmi. Liriu waytakuna nishqan tönuwan kay salmuta cantapäkunki. David qelqashqan salmu.
69 (2) Salvaykalämay, Tayta Dios.Mayucho shenqaykaqnömi kaykä.
2 (3) Siksikyaykaq marpuman* jatikaykaqnömi kaykä.Mayman jarunäpaqpis manami kantsu.Hondu yakucho kaykaqnömi kaykä.Bunyaypa bunyar yaku apaykämaqtanömi mayaykä.*
3 (4) Tsayjina qaparaylawanmi qasmayashqä.Kunkäpis fiyupami nanaykan.Tayta Diosta shuyarar rikachakuykälaptïmi nawïpis tsakarpunna.
4 (5) Chikimaqnïkunaqa aqtsänömi yupayta mana atipaypaq karkaykan.Achäquita mana ashipaykaptïmi paykunaqa chikirkaykäman.Mana suwapaykaptïmi “kutitsimay” nirkaykäman.*
5 (6) Tayta Dios, musyankimi mana cäsukuq kashqäta.Lapan jutsa rurashqätapis musyaykankimi.
6 (7) Lapanta mandaq TAYTA DIOS, jutsata rurashqäpita qamman yärakamuqkunata ama jamurpaykulätsuntsu.Israel runakunata kuyaq Tayta Dios, jutsata rurashqäpita qamman yärakamuqkunata manakaqman ama churaykulätsuntsu.
7 (8) Runakuna ashlimaptinpis qamta kuyarmi upälakushqä.Penqakuylawanmi qaqläpis pasaypa pukayashqa.
8 (9) Wawqïkunapis noqapita witikurmi jäpa runatanöna rikapäman.Panïkunapis manami reqiq tukamantsu.*
9 (10) Templuykitaqa wanuy kawaymi respitatsishaq.*Qamta manakaqman churashushpaykiqa noqatapis manakaqmanmi churaykäman.*
10 (11) Ayunar waqaptïpis runakuna penqapämanmi.
11 (12) Lakikur qachqa röpata jatikuptïpis lapanmi asipäman.
12 (13) Pïmaypis wasäta rimalarmi puripäkun.Shinkashqa runakunapis penqakatsimänan kashqami cantapäman.
13 (14) Tsayno ruramaptinpis qamlatami manakamü, TAYTA DIOS.Jukla yanapaykalämay.Kuyapämashpayki manakamushqäta mayaykalämay.Imaypis salvamashqaykino kananpis salvaykalämay.
14 (15) Marpuman jatikashqano kaykashqäpita jorqaykalämay.Chikimaqnïkunapita tsapaykalämay.Yaku rurincho kaykaqno kaykashqäpita jorqaykalämay.
15 (16) Bunyaypa bunyar aywaykaq yaku apamänanta ama munaykulaytsu.Hondu yaku ultamänanta ama kachaykalämaytsu.
16 (17) Manakamuptï mayaykalämay, TAYTA DIOS.Qamqa pasaypa kuyakuqmi kaykanki.Kuyapämashpayki yanapaykalämay.
17 (18) Sirviqniki kaykaptïqa ama pakakuykulaytsu.Pasaypa nakaychömi kaykä. ¡Jukla yanapaykalämay!
18 (19) Shamur salvaykalämay.Chikimaqnïkunapa makinpita jorqaykalämay.
19 (20) Qam musyankimi achäquita ashipämashqanta, penqayman churapäkamashqanta y manakaqman churapäkamashqanta.Musyaykankimi chikimaqnïkuna mayqan kashqantapis.
20 (21) Qayapämashqanpitami shonqüpis pasaypa jaqayashqa kaykan.Tsaymi imata ruranäpaqpis gänasnï ni kalpäpis mana kannatsu.Kuyapämar yanapamänanpaq mayjina ashirpis manami pitapis tarishqätsu.
21 (22) Mikuynïmanpis venënutami winapämashqa.Yakunaptïpis vinagritami uputsimashqa.*
22 (23) Ali alilata mikupäkunanpaq juntakaptin castigaykulay.Fiestacho mikupäkushqanpis paykunapaq trampa kaykulätsun.
23 (24) Paykunapa nawinkunapis qaprayätsun.Chankankuna imaypis siksikyätsun.*
24 (25) Rabyashpayki paykunata castigaykulay.Paykunataqa chipyaq ushakaykatsilay.
25 (26) Wayinkunapis chunyaq rikakutsun.Tashqan toldukunacho pipis ama tätsunnatsu.*
26 (27) Castigamashqaykita rikaykarmi ashlipäkaman.Nakatsimashqaykita rikarmi asipaykäman.
27 (28) Tsay niraq runakunataqa jutsanman tupu castigaykulay.Paykunataqa ama perdonaykulaytsu.
28 (29) Jutinkuna qelqaraykaqtapis Libru de la Vïdapita börraykulay.*Ali ruraqkunapa jutinkuna qelqarashqan librumanpis jutinkunata ama qelqaytsu.
29 (30) Noqaqa nakaycho karmi pasaypa lakikü.Yanapamar salvaykalämay, Tayta Dios.
30 (31) Tayta Diospa jutinta joqarishpämi alabashaq.Agradëcikushpämi adorashaq.
31 (32) Tsayno alabaptïmi törukunata sacrificiupaq apamushqäpitapis TAYTA DIOS mas kushikunqa.
32 (33) Salvamashqanta rikarmi lakishqa kaykaqkunapis kushikärinqapaq.Tayta Diosta *ashiqkunapis paymanmi yärakärinqa.
33 (34) TAYTA DIOSQA waktsakuna manakushqanta mayanmi.Payman yärakuqkunataqa prësu apakuptinpis manami qonqantsu.
34 (35) ¡Jana patsapis, kay patsapis, Tayta Diosta alabatsun!¡Lamarpis y tsaykunacho lapan kawaqkunapis, Tayta Diosta alabatsun!
35 (36) Tayta Diosmi *Sión jirkancho taq runakunata salvanqa.Tsaynölami Judácho kaykaq markakunata altsatsinqa.Tsaychömi kuyashqan runakuna yapay tanqapaq.
36 (37) Tayta Diospa sirviqninkunapita miraqkunami tsay markakunata chaskipäkunqaTayta Diosta *kuyaqkunami tsaycho tanqapaq.
Ichic wilacuycuna
^ 69.2 Wakin runakunaqa sinigaman o janquman nipäkun.
^ 69.4 Sal. 35.19; Juan 15.25.
^ 69.8 Job 19.13; Sal. 31.11; 38.11; 88.18.
^ 69.22-23 Rom. 11.9-10.
^ 69.25 Hech. 1.20.
^ 69.28 Éxo. 32.32; Apoc. 3.5; 13.8; 17.8.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
