Salmos 7:1-17
(1) Kay salmuta David cantarqan Benjamín trïbu Cus jutiyuq runa contran sharkushqa kaptinmi.
7 (2) Tayta Diosnilä, qamlamanmi yärakamü.Chikir qatikachämaqkunapita tsapaykalämay.
2 (3) Mana tsapämaptikiqa león rachiqnöchari ushamanqa.Qam mana salvamaptikiqa pipis manami salvamanqatsu.
3 (4) Tayta Dios, ¿imatataq mana alita rurashqä?¿Ima jutsatataq rurashqä?
4 (5) ¿Amïgütatsuraq rabyanätsishqä?¿Conträ runakunatatsuraq jaqayätsishqä?
5 (6) Tsayno kaptïqa conträkuna qatikachämätsun.Taripaykamar qarachashqa puritsimätsun.Pasaypa penqakuyman churamätsun. Selah
6 (7) TAYTA DIOS, rabyashpayki chikimaqnïkunapa contran sharkuykulay.Favornï sharkushpayki paykunata castigaykulay.
7 (8) Maytsay nación runakuna nawpaykiman juntakämutsun.Paykunata juzganaykipaq trönuykiman jamaykulay.
8 (9) Qammi maytsay nación runakunata juzganki.Runakunapa contran mana rurashqa kaykaptïqa favornï sharkuykulay.
9 (10) Pïmaytapis mana jananpaypa juzgaq Tayta Dios,runakuna imata yarpashqantapis musyaykankimi.*Jutsa ruraqkunaqa amana jutsata ruratsunnatsu.Jutsaynaq runakunata yanapaykulay.
10 (11) Mana alikunapita tsapämänanpaq Tayta Diosmi escüdü kaykan.Paymi ali shonqu runakunata salvan.
11 (12) Jutsata rurashqanman tupumi pitapis Tayta Dios castigan.Payqa mana jananpaypami jutsa ruraqkunata imaypis juzgan.
12 (13) Jutsa rurayta mana kachariptinqa castigananpaq espädan aptashqami kaykan.Flëchanwan flëchananpaqpis kamarikushqami kaykan.
13 (14) Jutsa ruraqta ushakätsinanpaqmi armankuna kaykan.Ninawan waylashqa flëchankunapis apuntaraykanmi.
14 (15) Tantiyakäriy jutsa ruraq runakuna imano kawashqantapis.Paykuna yarpachakärin mana alikunata rurapäkunanpaqmi.Runa mayintami imaypis lulaparkaykan.
15 (16) Nakapäkunanpaq kikinkunami jutsayuq karkaykan.Kikin uchkushqan pözuman jeqaqnömi kanqa.
16 (17) Jutsata rurashqanpita castïgumi paykunaman chayanqa.Runa mayinta nakatsishqanpitami kikinkunata nakatsipäkunqa.
17 (18) Pïmaytapis mana jananpaypa juzgashqanpitami TAYTA DIOSTA imaypis alabashaq.Poderniyuq TAYTA DIOSTAMI kushishqa imaypis alabashaq.
Ichic wilacuycuna
^ 7.9 Jer. 17.10; Apoc. 2.23.
