Salmos 96:1-13
96 Mushuq alabanzawan TAYTA DIOSTA alabapäkuy.Kay patsacho taqkuna, lapayki TAYTA DIOSTA alabapäkuy.
2 Tayta Diospa jutinta joqarir cantapäkuy.Salvakuq kashqanta waran waran wilakäriy.
3 Munayniyuq kashqanta maytsay nacionkunachöpis wilakäriy.Mantsariypaq rurashqantapis maytsay markakunachöpis wilakäriy.
4 Tsayno wilakäriy TAYTA DIOS alilata ruraq kashqanpita.Lapan runakuna payta alabananpaq wilakäriy.Payqa ima diospitapis mas mantsaypaqmi kaykan.
5 Wakin markakunapa diosninkunaqa ïdulukunalami kaykan.TAYTA DIOSQA munayniyuq karmi jana patsatapis kamashqa.
6 Espantaypaq kaqkunata ruraptinmi nawpancho pïmaypis alabapäkun.Munayniyuq karmi templuntapis kamarätsin.
7 Maytsay markacho taqkuna, TAYTA DIOSTA alabapäkuy.Munayniyuq kashqanpita payta adorapäkuy.
8 TAYTA DIOSPA jutinta joqarir adorapäkuy.Ofrendata apakurkur templunman aywapäkuy.
9 Munayniyuq *santu TAYTA DIOSTA adorapäkuy.Intëru patsacho taq runakuna nawpancho siksikyätsun.
10 Maytsay nacionkunacho taq runakunata kayno wilapäkuy:“TAYTA DIOS japalanmi rey kaykan.Paymi kay patsata kamashqa mana kuyukuq kananpaq.Paymi lapan runakunatapis mana jananpaypa juzganqa”.
11 Jana patsapis kay patsapis kushikäritsun.Lamarpis y tsaycho kaykaqkunapis bunyaypa bunyar kushikäritsun.
12 Chakrakunapis y tsaycho kaykaqkunapis kushikäritsun.Munticho kaq yörakunapis kushikäritsun.
13 TAYTA DIOSPA nawpancho kushishqa cantapäkutsun.Paymi aywaykämun kay patsacho juzgananpaq.Paymi lapan nación runakunata mana jananpaypa juzganqapaq.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
