Santiago 3:1-18
3 Kuyay wawqi panikuna, lutanta yachatsiptikiqa Tayta Diosmi juzgashunki. Tsayno kaykaptinqa juntakashqaykicho lapayki yachatsikuq kaylataqa ama munapäkuytsu.
2 Pipis shiminta dominakurqa jutsaynaqmi kanman. Tsay runaqa cuerpuntapis jutsa ruraypita dominakunmanmi. Shimintsita dominakuyta mana kamäpakurqa jutsatami ruraykantsi.
3 Musyashqantsinöpis cawallupa shiminman frënuta churaparkurmi munashqantsipa puritsintsi.
4 Jatunkaray *büquita wayra apaptinpis taksha timonlawanmi munashqanpa apan.
5 Upinaykaqla shanshapis ratarkurqa jatun jirkata ruparmi usharin. Tsaynölami shimintsipis takshala kaykarpis imaykatapis rimatsimantsi.*
6 Noqantsi parlashqantsipis ninanömi kaykan.* Mana alikunata parlarmi ali kawakuq runatapis rimanakatsintsi. Shimintsi takshala kaykarpis dominamaptintsimi pasaypa mana ali kawapäkuntsi. Nina imatapis rupar ushashqannömi mana ali parlashqantsipis kaykan. Lutankunata parlarqa *Satanás munashqantami ruraykantsi.
7 Ima uywakunatapis runaqa manshuyätsinmi: chucaru kaqkunata, päriqkunata, culebrakunata y lamarcho kaqkunatapis.
8 Shimintami itsanqa pipis dominakuyta kamäpakuntsu. Runapa shiminqa kaykan chucaru uywano y venënunömi.
9 Tsay shimilantsiwanmi Tayta Diospa jutintapis joqarkuntsi y runa mayintsipa wasantapis rimantsi. Kikin niraqta Tayta Dios kamaykämaptintsiqa manami tsayno rimashwantsu.*
10 Tsay shimilantsiwanmi alitapis mana alitapis parlantsi. Kuyay wawqi panikuna, ama tsayno kashuntsu.
11 ¿Juk pukyulapita yarqamunmantsuraq pochquq yaku y mishkiq yaku?
12 ¿Hïgus yörapis wayunmantsuraq aceitünasta? ¿Üvapis wayunmantsuraq hïgusta? ¡Manami! Tsaynöpis manami juk pukyulapitaqa pochquq yaku y mishkiq yakupis yarqamuntsu. Tsayno kaykaptinqa lutankunata parlanantsipa trukan alilata parlashun.
Rasunpa yachaq kar imano kawanantsipaqpis nishqan
13 Qamkuna kaqcho mayqanpis yachaq y tantiyaq karqa mana yachaq tukuylapa alikunata ruratsun. Tsayno kawaptinraqmi yachaq kashqan musyakanqa.
14 Runa mayinta chikiparqa y shonqulanchöpis nanapararqa ama yarpätsuntsu yachaq kashqanta. Tsayno alabakurqa manami rasun kaqtatsu parlaykan.
15 Yachaq tukuyqa manami Tayta Diospitatsu kaykan, sinöqa runapa yarpayninpita y *Satanáspitami.
16 Chikinakur y nanaparänakur kawarqa pasaypa mana alimi kawantsi.
17 Tayta Dios yachayta qomaptintsimi itsanqa pay munashqanno kawantsi. Tsaymi pïmaywanpis ali kawantsi, kuyanakuntsi, ali shonqu kantsi, kuyapantsi, alikunata imaypis rurantsi, pïmaytapis ali rikantsi y rasun kaqlata parlantsi.*
18 Runa mayintsiwan ali kawashqantsita rikakurmi wakin runakunapis tantiyakunqa runa mayinwan ali kawapäkunanpaq. Tsaynöpami lapantsipis Tayta Dios munashqanno kawapäkushun.
Ichic wilacuycuna
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 3.5 Prov. 18.21.
^ 3.6 Prov. 16.27.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 3.13-17 Luc. 6.36; Rom. 12.9.