Tito 3:1-15
3 Wawqi panikunata yachatsinki mandaqkunata y autoridäkunata respitar cäsukunanpaq y alilata imaypis rurananpaq.
2 Tsaynöpis yachatsinki wasarima mana kananpaq, pitapis achäquita mana ashipänanpaq, ali shonqu kananpaq y pïmaywanpis ali kawapäkunanpaq.
3 Jesucristuta manaraq chaskikurqa noqantsipis wakin runakunanölami mana tantiyakushpantsi Tayta Diosta cäsukurqantsitsu. Jutsa ruraykunata kachariytapis manami kamäpakurqantsitsu. Chikinakur y rimanakularmi kawarqantsi.
4 Tsayno kawaykaptintsimi Tayta Dios kuyakuq kar
5 salvamashqantsi. Manami alita rurashqantsipitatsu salvamashqantsi, sinöqa jutsayuq kaykaptintsipis kuyapämashpantsimi salvamashqantsi.* Jutsantsita maylamashpantsimi Espíritu Santuta kachamur mushuq kawayta qomashqantsi.
6 Espíritu Santuta tsayno kachamushqa salvamaqnintsi Jesucristo noqantsi rayku wanushqa kaptinmi.
7 Jutsayuq kaykaptintsipis dembaldilami perdonamashqantsi herenciantsita chaskir paypa nawpancho imayyaqpis kawanantsipaq.
8 Kay nishqäkuna lapanpis rasun kaqla kaykaptinqa wawqi panikunata mana qelanaypa yachatsinki. Tsayno yachatsiptikimi tantiyakärinqa Tayta Dios munashqanno imaypis alikunata rurapäkunanpaq. Kay yachatsishqäkunaqa lapan runakunapaq alimi kaykan.
9 Wakin runakunaqa rimanakärin unay aylunkuna pï kashqanpita y Israel runakunapa costumbrinkunalapitami. Tsaykunapita piwanpis ama rimanakuytsu. Rimanakushqaykiqa manakaqlapaqmi kanqa.
10 Tsay rimanakatsiqkunataqa ishkay kutila tantiyatsinki. Tsayno tantiyatsiptikipis mana cäsushuptikiqa qarqurinki.*
11 Musyashqaykinöpis tsay runakunaqa jutsa ruraylacho kawarmi Tayta Diosta mana cäsukärintsu. Tsayno kashqanpitami Tayta Dios castiganqapaq.
Carta ushanan
12 Noqa yarpaykä wawqintsi Artemasta karpis o Tíquicuta* karpis qam kaqman kachamuytami. Mayqanpis chayamuptinqa Nicópolisman jukla shamunki tsaycho tinkunantsipaq. Tamya killa pasananyaq tsaycho tänäpaqmi yarpaykä.
13 Abogädu Zenas y Apolos* viäjipa aywaptin ima nistashqantapis lapayki kamaripanki.
14 Tsayno yanaparmi wawqi panikuna yachakärinqa wakin kaqtapis yanapananpaq. Tsayno rurarqa Tayta Dios munashqannömi kawapäkunqa.
15 Noqawan kaykaq wawqi panikunapis lapanmi salüdunta apatsikamun. Tsaynöla noqapa salüdütapis wawqi panikunata qoykulanki. Lapaykipis ali kawanaykipaq Tayta Dios kuyapäshushpayki yanapaykuläshunki. [Amén.]
