Canan tiempo runacunaga ali cajtami mana alitano rican y mana ali cajcunatanami alitano (Is 5:20). Chaymi Jehová chiquishgancunata rurar, olgupura o warmipura cacuyta normaltano rican. Capazchi colegancuna o pipis wamranchita inquitanman paycunano lutanta rurananpaj. Taytacuna, ¿imanotaj wamrayquicunata yachachinquiman washäcunanpaj?

Jehovata gustashgancunata yachachiy (Le 18:3). Jehová munashganta winashganmanno wamrayquicunata yachachiy pengaynincunata imano ricananpaj y imano portacunanpaj (Dt 6:7). Tapucäriy: ¿Wamräcunata yachachishgäcu pipis cuyaj tucuylapa aprovechacuyta munaptin cuentata gocunanpaj? ¿Tantiancu shumaj visticuy alapa importante cashganta? ¿Tantiancu delicado partincunata pipis mana yatapänanpaj ni ricapänanpaj cajta? ¿Musyancu imata rurananpaj cajta pipis galapächucunata ricachiptin o mana alicunata rurananpaj niptin? Wamrayquicuna chaycuna lapanta musyapäcuptinga cuidacunanpämi yanapanga (Pr 27:12; Ec 7:12). Wamranchita washäcunanpaj yachachiptinchi paycunata cuyaycanchimi (Sl 127:3).

CAY VIDEUTA RICÄCHIY: MANA JUCHOJ WASITA SHARCACHISHUN: “MANA ALICUNAPITA” WAMRANCHICUNATA CUIDASHUN. NIRCUR TAPUPÄRIY:

• ¿Imanirtaj waquin taytacunaga wamrancunawan pengaynincunapita parlayta camäpacunchu?

• ¿Imanirtaj taytacunaga wamrancunata ashmanman Jehová mandacushganno? (Ef 6:4).

• ¿Ima publicaciuncuna y videucunataj yargamushga taytacunata yanapänanpaj? (w19.05-S 12).

• ¿Imanirtaj taytacunaga imaypis wamrancunawan shumaj parlacunman problemacunaman manaraj jegaptin?