7 CAJ YACHACUY
¿Imataj Diospa Gobiernun?
1. ¿Imataj Diospa Gobiernun?
¿Imanirtaj nishwan Jesús ali mandakoj kanganta? (MARCOS 1:40-42)
Lapan gobiernukunata ushakächej y Diospa munayninta cielucho y Patsacho rurakächej gobiernumi. Chay cielucho kaykaj Gobiernutami lapanchi necesitanchi entero munducho juk castanöla kawakunapaj. ¿Manaku chayga alapa ali wilakuy? Lei Daniel 2:44; Mateo 6:9, 10, y 24:14, NM.
Lapan gobiernuchömi juk mandakoj kan, chaymi Jehovaga gobiernuncho mandakamunampaj churin Jesucristuta churashga. Lei Apocalipsis 11:15.
Cay videuta ricäriy: ¿Imataj Diospa Gobiernun?
2. ¿Imanirtaj Jesusga juk ali mandakoj?
Kuyapäkoj y alilata ruraj karmi (Mateo 11:28-30). Jina alapa poderyoj karmi Patsacho tiyaj runakunata yanapanga. Kawarimurga cieluman kutikurirmi Taytampa derecha kaj laduncho shuyarargan autoridadta chaskinganyaj (Hebreos 10:12, 13). Y Diosga goshganami chay autoridadta gobernamunampaj. Lei Daniel 7:13, 14.
3. ¿Kikilanku Jesús gobernamunga?
Manami. Daniel 7:27 textumi wilakun Dios akrashgan runakunawan gobernayämunampaj kajta. Chay punta akrashgakunaga Jesuspa gatejninkunami kayargan. Kanankamayajmi Jehovaga akraykashgalaraj sirvejnin warmikunata y olgukunata Jesuswan gobernayämunampaj. Jesusnölami paykunaga wanurir kawariyämun espiritunöna cielupa aywakuyänampaj. Lei Juan 14:1-3 y 1 Corintios 15:42-44.
¿Aykajtaj cieluman aywapäkunga? Paykunapaj parlarmi Jesusga nirgan “wallcajlla” uysha kashganta (Lucas 12:32). Chay walkajkunaga Jesuswan Patsata gobernaj 144.000 runakunami kayan. Lei Apocalipsis 14:1.
4. ¿Imataj pasargan Jesús gobernaj yaykuringan wichan?
Jesusga 1914 watachömi gobernaj yaykushga, y puntataga Satanastawan demoniunkunatami Patsaman wikaparamurgan. * Rabiakuypita shongumpis timpuptinrajmi Diabluga manchanaypaj mana alikunata rurar galaykurgan (Apocalipsis 12:7-10, 12). Chay wichampitami runakunapa kawayninga waran waran más mana aliman tikraykan. Guerrakuna, terremotukuna, gueshyakuna y guellayta tarinapaj sasa o aja kanganmi musyachimanchi ichiklachöna Diospa Gobiernun Patsata shumajyächinampaj kajta. Lei Lucas 21:7, 10, 11, 31.
5. ¿Imatataj Diospa Gobiernun ruraykan y shamoj tiempucho imataraj ruranga?
Entero munducho predicaciunwanmi “yupaytapis mana atipaypaj chaychika runakunata” shuntaykan. Kay ali shongu runakunami Jesusta reynintano kushishga sirviyan. Paykunami salvakuyanga Diospa Gobiernun mana alikunata ushakächiptin. Chaymi, Diospa Gobiernun yanapämananchita munarga, alapa importantimi Jesusta wiyakunanchi. Lei Apocalipsis 7:9, 14, 16, 17.
Jesusmi 1.000 watakunapa gobernamunga, chay wichanmi Taytampa munayninta cumplikächinga. Patsaga juk shumaj huertamanmi tikranga. Nirkurnami Jesusga gobiernunta Papäninta entreganga (1 Corintios 15:24-26). ¿Pilatapis wilapärinkimanchuraj kay ali Gobiernupita? Lei Salmo 37:10, 11, 29.
^ par. 6 1914 watacho ima profecía cumplikanganta musyayta munarga ¿Qué nos enseña la Biblia? nishgan librupa 22 kaj wilakuyninta rikariy, 217-220 paginankunacho.
