Demoniucunaga Diospa contrancho caycänanchita munan
“Wanojcuna ricaycämanchimi” nir waquincuna imaycacunata rurapäcun
¿Imanirtaj Satanás demoniuncunawan imaycata ruraycan runacunata engañananpaj? Paycunapa munashganta ruranapaj y Diospa contrancho cajcunata ruranapäpis. Chay ruraycunaga wanushgacunapaj ruracashgan costumbricunachomi ricacämun.
Familianchi o amigunchi wanuptin pasaypa laquicunchimi. Amigun Lázaro wanuptin “Jesúspis waqarqan” (Juan 11:35).
Entero Pachacho wanushgacunapaj achca costumbricunata rurapäcun. Waquin costumbricuna manami Bibliapa contranchochu caycan. Wanushgacunapa alman cashganta yarparmi waquincunaga imaycatapis rurapäcun. Waquincunana wanojcunata manchacur pichgayninta o juc costumbricunatapis rurapäcun. Ichanga Biblia nimanchi “wanukurnaqa manami imatapis musyashunnatsu ni imatapis munashunnatsu” (Eclesiastés 9:5). Chaymi chay costumbricunata rurajcuna Satanaspa munayninta rurarcaycan.
Waquin costumbricunatapis rurapäcun “wanojcunata yanapananchipaj” nir
Waquincuna nipäcun “wanojcuna munashganta mana rurarga paycuna manchachir nacachishunqui”. Chayman yarpar juc wata pasaptinna misantapis rurapäcun, “cielupa aywananpaj yanapaycanchi” nir. Jina waquincunana 1 de noviembre junajcho wanojcunata churapäcun micuycunata, yacuta y ima gustashgancunatapis.
Caycunata rurajcunaga Satanaspa munaynintami rurarcaycan. Demoniucuna munashganta rurarga, ¿Jehová ali nawilanwanchuraj ricaycämanchi? ¡Manami! (2 Corintios 6:14-18).
Diospa sirvejnincunaga Satanás munashgan costumbricunata manami ruranchichu, chaypa trucanga wanupacojcunata cuyacuywan shacyächinchi. Musyanchimi pipis wanuptenga Jehovalami cawarachimunga (Job 14:14, 15).
Supaycunapa ruraynincunataga Dios melananmi
Brujucunaga imaycacunata rurapäcun demoniucunawan parlapäcunanpaj. Chaypäga jircata tapucun y waquincunana brujuta mana rurarpis cucata y cartatapis ricapäcun; jacawanpis, runtuwanpis o imacunawanpis shojpicärin. Chay lapan ruraycunaga Diablupita shamun.
Cay mana alicunata rurananchitaga Dios mana munanchu. Payga munan paylatami adurananchita (Éxodo 20:5)
Chaycunaga mana ali cashganpita Biblia cayno nin: “Mayqaykipis [...] ama adivinapakuq ni brüju ni rikakuqpis kapäkunkitsu. Majiquërupis ni chaqchapakuqpis ama kapäkunkitsu”. Jina nin wanushgacunata “ama manakunkitsu ni tapukunkitsu. Tsaykunata ruraqkunaqa TAYTA DIOSTA fiyupami rabyanätsin” (Deuteronomio 18:10-12).
¿Imanirtaj Jehová nimanchi caycuna mana ali cashganta?
Cuyamashpanchimi chayta wilamanchi. Payga mana munanchu Satanaspa tranpancunaman ishquinanchita. Mana cäsucojcuna ichanga nacaylaman chayapäcun.
Brasil naciuncho tiyaj Nilda warmi imapa pasashganga laquicuypaj cargan. Paytashi bruja cashganraycu demoniucuna pasaypa nacachergan. Paymi cayno nin: “Demoniucunaga pasaypami dominamaj. Öraga juiciüta ograshgänomi ricacoj cä. Hospitalmanpis cutin cutinrämi aywaj cä. Upyaytapis cigarro mucaytapis galaycurgä. Chayga achca watapami cargan”.
Demoniucunapa munashganta rurajcunaga mana alicunaman chayapäcun. Wasiynaj quedanman, nacaycar cawan, hasta wanunmanpis
Nildaga chay lapancunapita libracurgan Jehová Dios y sirvejnincuna yanapaptinrämi. Cananga jaucala y cushishgalami cawacun. Paymi nin: “Demoniucunawan parlayta ni yarpaylapis yarpashwanchu”.
