1. Diosta sirvishganchiraycur, ¿ima pruebacunapataj pasashwan?

ÖRAGA pruebacunapita yarguyta puedishwanchu, o congregaciunchopis pilapis laquircachimashwanmi (Sant. 3:2). Y trabajuyquicho caycarga o escuelayquicho caycarga, chaychoga waquincuna imaycata wajtayquicho parlaycanman (1 Ped. 4:3, 4). Waquinninchipana familianchi öraga nimashwan, ‘imapätaj reuniunman aywanqui, pengacuypaj jäpa runacunapa puncunta tacacur puricunqui’ nir (Mat. 10:35, 36). Cay pruebacunapano pasaycarga, mana uticaypa Taytalanchi Diosta sirvicur cacuycäshun. Jehovapa yachayninta y calpanta chararga, manami imapis guepaman cutichimäshunchu.

2. Leishganchiman shumaj yarpachacurga, ¿imanotaj yanapämäshun Romanos 15:4 texto wilacushganno?

² Unay yaracoj runacuna imacunapa pasashgantaga lapantami Dios escribichimushga, caycunaman yarpachacurga yanapämäshunmi. Chaytapis apóstol Pablo nirganmi Romanos 15:4 (leiriy) textucho. Dios escribichimushgan wilapacunata lapanta leirga shacyächimäshunmi mana yamacaypa Diosta sirvinapaj. Y mana chaylachu, umanchi shongunchi Dios munashganno cananpäpis yanapämäshunmi. Öraga problemacuna ilajpitami yuriycamunman, chay hora imatapis rurayta mana musyarga, caycuna ichanga yanapämäshun: 1) Mañacushun, 2) leicarga chaycho cashganchino ricacushun, 3) yarpachacushun  y 4) yachacushganchinola cawashun. Jucnin jucninta ricarishun. * Y ushanapäna Davidpita y  apóstol Pablupita parlarishun, mä imatashi paycunapita yachacunchi.

3. Bibliata manaraj leirga, ¿imatataj rurashwan, y imanirtaj chayta rurashwan?

³ 1) Mañacushun. Manaraj leirga Tayta Diosta ruwacushun leishganchita umanchi charananpaj. Ichanga, ¿imataraj ruräman? nir yarpachacuycashwan. Chayno carga jinan hora Diosta mañacushun Palabrancho ali consejucunata tarichimänanchipaj (Filip. 4:6, 7; Sant. 1:5).

4. Bibliata leicarga, ¿imacunataraj rurashwan?

⁴ 2) Leicarga chaycho cashganchino ricacushun.  Caytaga rurayta puedinchimi, chayno canapämi Jehová camamashcanchi. Awmi, unay ima pasashganta leicarga, chaycho pipis ima yarpashganta, yarpaycashwan; asicuptinga, asicushwan; wagaptinga, wagashwan y ima ricaycashgantapis ricaycashwan.

5. ¿Imanirtaj yarpachacurcur yarpachacurcur Bibliata leishwan, y ima tapucuycunatataj ruracushwan?

⁵ 3) Yarpachacushun. Yarpachacurcur yarpachacurcur leirga, yanapämäshunmi Bibliapita shumaj yachacunapaj. Imanomi micuypis mishqui yargunanpäga, manami janan jananlachu imatapis garpurir yanucachärinchichu. Yarpachacunanchirämi imatapis yanucunapäga, chaynolami Bibliawanpis pasacun. Y cayno tapucuycunatapis ruracunanchimi: “¿Imatataj rurashga cay yaracoj runa Diosta mana jaguinanpaj? ¿Imanotaj Jehová yanapashga? ¿Imanotaj pasashganga yanapämanman problemacunata nogapis aguantanäpaj?”.

6. ¿Imaraj pasamashwan yachacushganchita mana casuparga?

⁶ 4) Yachacushganchinola cawashun. Yachacushganchita mana casuparga, imayca aguysha janancho wasinchita sharcachishganchinoshi canman. Caypitami Jesús parlamurgan. Y rasunta nirgan, ima wasipis mana ali cimientush captinga tamyawan loglawan juchucäcunmanmi (Mat. 7:24-27). Chaynola noganchipis, mayjina mañacurpis o leishganchiman yarparcurpis pero yachacushganchita mana casuparga juchunaraycaj wasinomi caycäshun. Feninchiga ali jawish tushanomi caycanman ima pruebatapis aguantanapaj. Chaypäga Biblia ima consejacushgantami casucunanchi. Awmi, casucushpanchirämi yaracuyninchipis ali canga y jauca jaucalapis cawacushun (Is. 48:17, 18). Caycamaga chusco cajcunapita jucnin jucninta yachacushcanchi, yapay chaycunapita yachacurishun pero cananga rey Davidpita parlarna.

7. ¿Pipitataj yachacushun?

⁷ Pilapapis culpanraycur canan hora nacaycar imarga, Absalonpita yachacushganchimi tantiachimäshun. Ricarishun imano reyman ticrayta munar papänin Davidta traiciunargan (2 Sam. 15:5-14, 31; 18:6-14).

8. ¿Imatataj mañacushwan Jehovata?

⁸ 1) Mañacushun. Leishganchiman yarparcur Jehovata wilapashwan lapanta, ¿pitaj shongunchita nanaycachish? (Sal. 6:6-9). Nircur ruwacushwan ima consejulatapis amanu tariycunapaj.

9. Davidpita y Absalonpita ichic wilacuy caycan, ¿mä walcalacho wilacaramuy?

⁹ 2) Leicarga chaycho cashganchino ricacushun.  Davidwan Absalón imacunapa pasashganman yarparcushun. Davidpa shongunga nanaycushgarächi.  ¿Imanir? Churin cargan Absalón y payga runacuna caycashgancunapash purej ali ricashga cayta munar (2 Sam. 15:7). Payga reyman ticrayta imaycanopa munaycargan, yangalami runacunata nirgan ali shonguyoj runa cashganta. Davidpa amigun cargan Ahitofel, paytapis Absalonga imata nir-raj yanapänanpaj apacamurgan. Chaypitana runacunata creichirgan rey cashgantana. Y mana chaylachu, papänintapis wanuchiytaräshi munargan, ichanga Davidga chay junajcunacho alapa gueshyaycargan, chaylamanpis yarpachacurganchu Absalonga (Sal. 41:1-9). Wanuchinanpaj ashiycashganta musyarmi Davidga gueshpir Jerusalenpita aywacurgan. ¿Imachotaj lapan ushargan? Quiquin Absalonta y paywan caycajcunata lapanta Davidpa soldaduncuna wanuchipäcurgan.

10. ¿Imatataj rurarganchu rey David?

¹⁰ Caycunapa pasar ¡imanoraj Davidpa shongun caycargan! Absalontaga cuyajmi y Ahitofeltaga amiguntano ricaj. Ishcanmi traiciunero runa capäcurgan. ¿Laquesapaj aw? Awmi, chayno captinpis, Davidga manami alapa yarpachacurlachu cacurgan. “Lapanpis conträcho caycan, imapänataj cawashaj” nirpis yarpachacushgachu. Nacarpis wagarpis sharcurganmi. ¿Imanotaj chayta rurargan?

11. ¿Imatataj David rurargan mana alicunapa pasashga carpis?

¹¹ 3) Yarpachacushun. ¿Imatataj David pasashganpita yachacunchi? ¿Imanotaj David calpachacurgan? Waquincunaga manchacuylawanmi imatapis rurarinman y nircur arrepenticunman, pero Davidga manami chayta rurarganchu. ¿Chauras imata rurargan? Jehovata y waquin amiguncunatami ruwacurgan yanapänanpaj. Ali cajta rurananpaj acrashgantaga juclami rurarej. Mana alicunapaj pasashga carpis aguantarganmi, Jehovapita raquicänanpäga yarpaylapis manami yarparganchu.

12. ¿Imanotaj Davidta Jehová yanapargan?

¹² ¿Imanotaj Jehová Davidta yanapargan? Jehovapa calpanga imaypis Davidwanmi caycashga (Sal. 3:1-8; janancho caycaj letracuna). Ima ruranapaj David acrashgantapis bendecirganmi y enemiguncunapitapis librarganmi.

13. Contranchicho pilapis mana alita rurariptinga, ¿imatataj David rurashgannopis rurashwan? (Mateo 18:15-17).

¹³ 4) Yachacushganchinola cawashun. Tapucurishwan: “¿Imanotaj David rurashgannola ruräman?”. Ali cajta ruranapaj acrashga carga, Davidnopis jucla rurashwan. Y alichi canman Jesús rurashganman yarpachacurga; cayga caycan Mateo librucho, 18 caj capituluncho (leiriy Mateo 18:15-17). Öraga shongunchita casupar ima mana alitapis jucla rurarishwan, chayno mana cananpäga Diosta ruwacushwan tantiaj runa ticranapaj y ali cajcunata ruranapaj. Ali shongu amigunchicuna captinga, paycunapis yanapämäshunmi (Prov. 17:17). Y mana gongaypa, waran waran Bibliacho Dios nimashganchita casucuycäshun (Prov. 3:5, 6).

14. ¿Imacunapa pasartaj cay textucuna shacyächimashwan: 2 Timoteo 1:12-16 y 4:6-11, 17-22?

¹⁴ ¿Familianchichoga lapanchu cushicun Diosta sirvishganchipita? Tiyashganchi marcachoga, ¿imatataj autoridäcuna nin Diosta adurashganchipita? Ichanga piñacärin ¿aw? Cay textucunata leirga shacyächimäshunmi: 2 Timoteo  1:12-16 y 4:6-11, 17-22. * Caytaga Pablo escribirgan carcelcho caycashgan wichanmi.

15. ¿Imatataj Jehovata mañacushwan?

¹⁵ 1) Mañacushun. Chay textucunata manaraj leirga, alapa ali canman imacunapa pasashganchita Jehovata wilapaptinchi. Awmi, lapanta wilapashwan. Chayno mañacurirga, Jehovaga pushamashwanmi Bibliacho ali consejucunata tarinapaj.

16. ¿Ima nishwantaj Pablupita preso cashgan wichan?

¹⁶ 2) Leicarga chaycho cashganchino ricacushun.  Pablo cashgayquita yarpachacuy, mä imatash ruranqui. Payga Romachomi presuraycan. Ichanga chay tiempupäga wanuyninlatana shuyaraycan. Yanagajnincunapis aywacärish. Uticash imachi cananga japalanlana caycargan (2 Tim. 1:15).

17. ¿Imatataj Pablo rurarganchu?

¹⁷ Pabluga manami yarpachacurganchu ‘imapäraj cayman shamurgä wichgarashga canäpaj’ nir. Nircurpis Pablutaga waquincuna jaguircärirgan y paycunataga manami nanapararganchu. Yaracunanpaj amiguncunaga cashgami. ¿Imanirtaj Jehovamanga y amiguncunamanga yaracuycashgala?

18. ¿Ima alicunatataj Pablo rurargan?

¹⁸ 3) Yarpachacushun. Tapucurishwan: “¿Ima ali cajcunamantaj Pablo yarpachacurgan?”. Jehovalata alabananpaj y paylata adurananpaj cajlamanmi yarpachacurgan. Waquincunata yanapaycarmi caycaj. Diostaga manami jaguejchu (2 Tim. 1:3). Yanagajnincuna ratulapaj laduncho cashga carpis, Pabluga manami rabiashgala ni laquishgalachu cacurgan. Yarpayninga caycargan mana jaguicoj amiguncunachomi, amatar paycunata agradecicurgan. Diospa Palabranpitapis mana gongaypa yachacoj (2 Tim. 3:16, 17; 4:13). Jehovawan Jesusga manami imaypis jaguimäshunchu, chaytaga musyarganmi apóstol Pablupis.

19. ¿Imanotaj Pabluta Jehová yanapargan?

¹⁹ Jehovaga wilargannami Pabluta cristiano cashganraycur chiquishga cananpaj (Hech. 21:11-13). ¿Imanotaj Pabluta Jehová yanapargan?, ruwacamushganta wiyarmi y calpantapis goycurmi (2 Tim. 4:17). Pabluga musyarganmi imayca rurashgancunata Diosninchi mana gongaycunanpaj. Achca cuti waquincuna yanapashganpitapis Diostarämi nawpata agradecicurgan.

20. Romanos 8:38, 39 texto nishganno, ¿Pablunopis imatataj noganchipis nishwan?

²⁰ 4) Yachacushganchinola cawashun. Tapucurishwan: “¿Imanotaj Pablo rurashgannola ruräman?”. Pablutanomi waquincunaga feninchiraycur chiquimäshun (Mar. 10:29, 30). Diosta mana jaguinapäga lapan shongunchiwanmi mañacunanchi y mana gongaypami Bibliapita yachacunanchi. Imapitapis más, nawpataga Jehovatami alabananchi. Jehovaga ali nawilanwanmi ricaycamäshun, jaguimäshunchu, cuyamanchimi (leiriy Romanos 8:38, 39; Heb. 13:5, 6).

21. ¿Ima nishwantaj Aya y Hector cristianucunapita?

²¹ Maycho cawarpis, imacunapa pasarpis, Bibliacho caycaj wilacuycunaga  yanapämäshunmi. Japonpita Aya jutiyoj precursora nin Jonaspita yachacushgan alapa yanapashganta, cananga mananash manchacunnachu Diospita yachachicuyta. Indonesia marcapita Hector jovinpis nin Rutpita yachacushgan alapa yanapashganta, cananga mastaräshi Jehovapita yachacuyta munan.

22. ¿Imapätaj caycan videucuna, wiyanapaj actuaciuncuna y “Ejemplos de fe” nishgancho yurimoj wilacuycuna?

²² Chayno unaycho Diosta sirvejcunapita noganchipis yachacuyta puedinchimi. Chaypaj caycan videucuna, wiyanapaj actuaciuncuna y “Ejemplos de fe” nishgancho yurimoj wilacuycunapis. * Caycunapita manaraj yachacurga Jehovata ruwacurishwan tantiarcunapaj y consejunta casucunapaj. Unayna pasashga carpis, chaycho cashgayquino ricacunquiman. Imacunapa pasashganta y imano Jehová paycunata yanapashganta ricay. Ima consejulatapis tarirga calpachacushun casucunapaj. Nircurpis, Diosninchita gracias nishun alicunata noganchiraycur rurashganpita; y Diospis cushicunganmi waquincunata shacyächiptinchi y yanapaptinchi.

23. ¿Imatataj Jehová escribichimushga Isaías 41:10, 13 textucho?

²³ Cay mundo Satanaspa maquincho caycashgancamaga imaycacunapämi pasaycäshunraj (2 Tim. 3:1). Jehovapa jutincho aywarga, laquicuypis manchacuypis aywacungami. Palabranchomi escribichimushga maquilanwan chararaycämänanchipaj (leiriy Isaías 41:10, 13). Awmi, Jehovaga yanapämäshunmi. Ima pruebapis ilajpita yuriycamunmanmi, Bibliapita shumaj yachacurga calpalanchi caycanga aguantanapaj.