1, 2. ¿Japalancunachuraj Bibliata estudiajcuna Diospa sirvejninman ticranga?

JUC marcapita Amy jutiyoj jipash cayno nin: “Bibliapita yachacushgäcunaga alapami cushichimaj”. Caytapis ninmi: “Bibliacho yachacushgäcunaga rasunpa cajmi cargan, chaytapis musyargämi. Pero bautizacunapäga yanapämashga hermanucunawan shumaj reguinacushgämi”. Cay jipash wilacaramushganga tantiachimanchi, pipis bautizacunanpäga jucninchi jucninchi yanapacoj cashganchipitami canga.

² Juc congregación mirananpäga lapanchipitami canga (Efes. 4:16). Juc marcapita Leilani jutiyoj cristiana cayno nin: “Imanomi juc ichic wamrapis quiquilan yachacungachu ni japalan winangachu, chaynolami congregaciuncho chaylaraj Bibliapita yachacuycajcuna pogunanpäga hermanucuna yanapashganpitaraj canga”. Pani nishganga rasunpami, juc wamrataga mayraj taytancuna, tiyuncuna y profesorcunapis yanapan. Congregaciunchopis estudianticuna Diospa sirvejninman ticrananpäga jucninchi jucninchi imaycanopa yanapacushganchipita canga (Prov. 15:22).

3. Ana, David y Leilani wilacushganpita, ¿imataj yachacunchi?

³ ¿Imanirtaj alapa ali canman Bibliata estudiaycajcunata waquin hermanunchicunapis yanapacuptin? Moldaviacho caycaj Ana jutiyoj pani cayno nin: “Estudianticunata yanapänapaj imayca ruraycunami caycan, quiquilanchiga manami puedishwanchu”. Wawgui David  chay naciunlapita cayno wilacun: “Bibliapita yachachicur aywaptë, öraga yanagämaj hermanucuna estudiantëcunata cuyaylapaj parlapaj, shonguncunatapis cuyurcachinraj. Chayno yachachicuytaga yarpaylapis yarpargächu”. Leilani panipis cayno nin: “Estudianticunaga cuentata gocärin pïcuna rasunpa caj Diospa sirvejnin cashganta, masraj yachachicojnincuna paycunata alapa cuyaptin” (Juan 13:35).

4. ¿Imatataj canan yachacushun?

⁴ Cayno tapucushwan: “¿Imatataj ruräman hermanucunapa estudiantincunata yanapanäpaj?”. Canan yachacushun, ¿imatataj rurashwan pipis nimaptinchi ‘estudiüman yanagamay’ y Bibliapita estudiaycajcuna reuniuncunaman shapäcamuptinpis? Jina, yachacushun imanotaj estudianticuna bautismuman chayananpaj ancianucunapis yanapacunman.

5. ¿Imatataj rurashwan ‘yanagaycalämay’ nimaptinchi?

⁵ Quiquinchimi estudiantinchicunata yachachishwan Bibliapita ali tantiananpaj. Hermanunchicuna ‘yanagaycalämay’ nimaptinchiga jucla yanaparcunäpämi caycashwan (Ecl. 4:9, 10). Chauras, ¿imatataj ruranquiman ali yanapacoj canayquipaj?

6. Proverbios 20:18 nishganno, ¿imatataj rurashwan hermanunchicunapa estudiantincunata ali yanapänapaj?

⁶ Ali preparacunanchi. Bibliapita yachachinapaj manaraj juc hermanuta yanagarga, alichi canman chay hermanuta mañacuptinchi estudiantinpita imalatapis wilapämänanchipaj (leiriy Proverbios 20:18). ¿Imatataj musyanqui estudiantiyquipita? ¿Imapitataj yachachicuycanqui? ¿Imatataj ali tantiananpaj munaycanqui? ¿Imatataj rurashwan cushichinapaj y mana laquichinapaj? Yachachicoj ima wilamashganchita atentula wiyarcushwan. Yudi jutiyoj paniga yanagaj hermanucunata estudiantincunapita parlapan. Chayno rurarga yanagaj hermanucuna listo caycanga estudiantincunata yanapänanpaj.

7. Bibliapita yachachinapaj, ¿imanirtaj ali preparacushwan?

⁷ Hermanunchicunapa estudiantincunata ali yanapänapäga, puntataga preparacunanchiraj Bibliapita yachachicunapaj (Esd. 7:10). David wawgui caynopis nin: “Yanagämaj hermano ali preparacuptinga shumajmi yanapacun, chayga alapa cushichiman”. Jina Bibliapita  yachachicunapaj ali preparacuptinchi, estudianticunapis cushicurcunga. Juc temata lapantaraj mana leishga carpis, walca walcala tantiarishgayquiga, alimi canga yanapacunayquipaj.

8. ¿Imaraj yanapämäshun imano y imapita mañacunapaj?

⁸ Bibliapita yachachicuycarga mañacuyta ama gongashunchu, chaymi yachachicoj hermanucuna mañacunapaj nimaptinchi, alichi canman mayna yarpänapaj, imano y imapita mañacunapaj cajta (Sal. 141:2). Japón naciunpita Hanae paniga cayno wilacun: “Yachachimaj nanapa compañeran shumajmi mañacoj, juc amiguntanö Jehovata parlapaj, jutïta pashtachiptin alapa cushicoj cä, chay nanano cayta munargä”.

9. Santiago 1:19 nishganno, ¿imanotaj yanaparcushwan yachachicoj hermanunchicunata?

⁹ Yachachicoj hermanunchicunata yanapäshun. Nigeria naciunpita Omamuyovbi paniga nin: “Ali yanapacoj hermanucunaga, yachachicuptinchi mayaj mayajla caycan, yarpachacur-raj imatapis ichic ichicla parlarcamun”. Chaurasga, ¿imatataj nishwan parlanapaj caycaptinchi? (Prov. 25:11). Yachachicoj hermanunchi yachachicuycaptinga mayaj mayajla caycashwan (leiriy Santiago 1:19). Chayno rurarga listumi caycäshun imalatapis yapaparcunapaj. Chaywanga manami niycanchichu juc temapita o alapa parlanapaj, estudianticuna shumaj tantiarcunanpaj ejempluwan juc ishcay tapucuycunata rurashwan parlashganchi temapita. Öraga ‘imalachopis mana yanapacushcächu’ nishwan, chayno yarparga cayta gongashwanchu: estudianticunata felicitapärishganchilapis y cuyapaylapa parlapärishganchipis yanapacungami Jehovapa sirvejninman ticrananpaj.

10. Cawayninchicho pasamashganchipita wilacuptinchi, ¿imanotaj estudianticunata yanapanga?

¹⁰ Cawayninchicho pasamashganchipita wilacushun. Bibliapita yachacuycajcunata wilarishwan imanotaj Jehovapita yachacushcanchi, achca problemacunapa pasar imanotaj Jehová yanapämashcanchi (Sal. 78:4, 7). Caycunata wiyarga estudianticuna cushishga sienticäringa, Jehovaman más yaracunga, bautizacuytapis munanga y problemacuna yurimuptinpis rasla alchananpaj calpachaconga (1 Ped. 5:9). Brasil naciunpita Gabriel jutiyoj wawgui, chaylaraj Bibliapita yachacuycaptin ima yanapashganpita wilacun: “Mana alicunapa pasar, Jehová imano yanapashgan hermanunchicunawan parlashgämi nogatapis  yanapämargan. Chaymi yarpargä ‘paycunatapis yanapashga carga, nogatapis yanapämangami’ nir”.

11, 12. ¿Imanirtaj cushi cushila chasquishwan reuniunman shamoj estudianticunata?

¹¹ Bibliapita yachacuycajcuna reuniuncunaman mana faltaypa shapäcamushganga Jehovata más reguinanpaj yanapanga, nircur bautizacunanpaj (Heb. 10:24, 25). Juc estudiante chaylaraj reuniuncunaman shamuyta galaycuptin ¿imanotaj lapanchipis chasquishwan?

¹² Cuyacuywan chasquishun (Rom. 15:7). Cushishgala estudianticunata chasquiptinchi, cada cadala mana faltaypa reuniuncunaman shamunga. ‘Ali shacäramushcanqui’ nir taglapaylapa chasquishun, waquin hermanucunata reguinanpäpis yanapäshun. Manami yarpashwanchu ‘payga nogawan manami yachacuycanchu’ nir, öraga yachachicojnin ocupaduchi caycanman o manaraj chayamushgarächu canman reuniunman. Parlapämaptinchi atentula wiyarcushwan, chayta ruraptinchi, ¿imanotaj yanapanga paycunata? Chaylaraj bautizacushgan Dimitri wawgui y congregaciunchopis siervo ministerialno yanapacuycan, punta reuniunman aywashganpita cayno wilamanchi: “Salonpa wajtalancho ichirashga manchacaj shuyaraj cä. Juc wawgui ricaycamar ruriman pasachimaj. Cushicurcurgä lapan hermanucuna saludarcamaptin. Chayta ricarmi ‘cada junaj reuniuncuna canman’ nirgäraj”.

13. Ali portacuyninchita ricar, ¿imanotaj yanapanga estudianticunata?

¹³ Ali portacushun. Ali portacushganchita ricarga estudianticunaga cuentata gocäringa rasunpa Diospa sirvejnincuna cashganchita (Mat. 5:16). Moldavia naciunpita Vitali wawgui cayno wilacun: “Jehovapa testiguncuna imano cawashganta y imano portacärishganta ricarmi musyachimargan rasunpa Diospa sirvejnincuna capäcushganta”.

14. Dios munashganno cawashganchita ricarga, ¿imatataj estudianticuna ruranga?

¹⁴ Bibliapita yachacojcunaga yachacunganta practicaman puntata churanman. Fácil mana captinpis, Dios munashganno cawashganchita ricarga, paycunapis noganchino cawayta munanga (1 Cor. 11:1). Hanae panipis cayno nin: “Bibliapita yachacuycashgäno y hermanucunapis yachacushgannomi cawapäcoj. Paycunaga cuyanacärejmi, shacyachinacärej y perdunanacärejmi.  Chay lapanta ricar nogapis paycunano cayta munargä”.

15. Proverbios 27:17 wilacushganno, ¿imanirtaj reuniunman shacamojcunata amigunchitano ricashwan?

¹⁵ Amigunman ticrashun. Estudianticuna reuniunman shacäramuptinga, alichi canman imano caycashganta tapupaptinchi (Filip. 2:4). Chaywanga manami niycanchichu lapantarä musyapäcunapaj paycunapita, pero trabajunpita, familianpita y Bibliapita imano yachacuycashganpita tapuparga alimi canga. Jina mana alicunata jaguishganta ricaptinchiga, ‘alita ruraycanqui’ nishwan. Chayta rurashpanchiga amiguntanomi ricamäshun, bautismuman chayananpäpis yanapaycäshunmi (leiriy Proverbios 27:17). Hanae wilacaramun reuniunman shamuyta galaycushgan wichan imano caycashganta: “Congregaciunchoga amigucunatami tarirgä. Uticashga caycarpis reuniunnëcunamanga mana gongaypa aywacoj cä. Mushoj amigucunata tarirga, unay amigücunawan manami juntacargänachu. Hermanücunawan cayta munar y Jehovata sirviyta munarmi bautizacurgä”.

16. ¿Imatataj rurashwan estudianticuna congregaciuncho masraj yachacänanpaj?

¹⁶ Congregaciunninchiman shacaycämoj estudianticunata yanapäshun noganchiwan yachacänanpaj. Imalapäpis paycunawan juntacashwan, imalatapis micurishwanmi (Heb. 13:2). Moldavia marcacho Denís jutiyoj wawgui cayta wilacun: “Warmïwan estudiante cashgä wichanga, hermanucunaga wasinmanmi pasachipäcamaj. Wilapäcamaj Jehová imano yanapashganta. Caycunami ishcäcunata yanapäcamargan Jehovata sirvipäcunäpaj”. Juc estudiante publicadurmanna chayaptinga nirishwanmi paycunata predicaciuncho yanagänapaj. Brasilpita Diego jutiyoj wawgui nin: “Hermanucunaga predicaciuncho yanagänäpämi nipäcamaj, chaycho paycunawan masraj reguinacurgä. Cay lapanmi Tayta Jehovata y Jesusta cuyanäpaj yanapämargan”.

17. ¿Imanotaj ancianucuna yanapacamunman?

¹⁷ Tiempunta camacächinman. Cuyapäcoj cashpanmi ancianucunaga estudianticunata yanapanman bautizacärinanpaj. Reuniuncho tincurga ratulapis parlapacurinmanmi, jutinta yarpapäcuptinpis alimi canga. Öraga pilatapis ninmanmi estudiantinta watucashgan junaj yanagänanpaj. Chayno yanapacoj  ancianucuna captinga, estudianticunaga masrächi pogupäcunga. Nigeria marcapita Jackie jutiyoj precursora cayta wilacun: “Achca estudiantïcunami cushicurcun yachachinäpaj juc ancianuwan aywaptï. Juc cajmi cayno nimargan: ‘Pastornïga wasïman imaypis shamunmanchu. Guellayta chasquinanraycur ricucunapa wasinlamanmi payga aywan’”. Cay estudiantish canan reuniunman aywaycan.

18. ¿Imanotaj ancianucuna Hechos 20:28 texto nishganta rurarcaycan?

¹⁸ Ali yachachicojman ticrananpaj. Ancianucuna, gamcuna yanapacamuptiquimi publicadurcunaga más ali yachachicojman ticrapäcunga (leiriy Hechos 20:28). Öraga waquincunaga manchacur imar nishunquichu yanagänayquipaj, chayno captinga quiquiquicuna paycunata nï yanapäshunayquipaj estudiun goychu. Jackie, caytapis wilacunmi: “Cada cadalami ancianucunaga tapuycäman estudiantïcunapaj. Ima consejamashgancunaga yanapämanmi yachachicuptï”. Awmi, ancianucuna chayno ruraptinga, pipis más estudiantitaraj ashinga (1 Tes. 5:11). Caytapis Jackie nin: “Cushicömi ancianucuna rurashgäman yarpachacuptinga, y parlapäcamaptinga imayca achachaycaj junaj yacuta upurishgänomi sienticö. Parlapämashwanga masraj calpä caycan Bibliapita yachacuycajcunata yanapänäpaj” (Prov. 25:25).

19. ¿Imapitataj lapanchi cushicurinchi?

¹⁹ Canan hora juc estudiantilanchipis mana captinga puedinchimi waquincunata yanapayta. Pilatapis yanagar imarga shumaj tantiarcur imalatapis parlarishwan. Reuniunman shamuptinpis parlapar galaycushwanmi, ali hermanutano ricamaptinchiga yanapangami. Y ancianucunapis tiempunta camarcachir shacya shacyala parlapacuriptinga estudianticunapis o yachachicoj hermanucunapis masraj calpachacäringa. Alapami cushicunchi waquincuna Diosta sirviytana galaycuptin, y gampis cushicunquichi chaycho ichiclapis yanapacushga carga.