1. ¿Ima nishwantaj bautizacushgana wamracunapita?

WAMRACUNA, calpalayquita pipis charanman, caycho waccho imayca ruranapaj gamcunapaj caycan (Prov. 20:29). Congregaciunchoga ricacämunmi arushgayquicuna. Maynachi siervo ministerialmanpis chayayta munarcaycanqui. Alimi chayga, pero waquincunaga ninman ‘nogaga wamralarämi caycä, tiempuwanrämi ima cargutapis chasquishaj’ nir. Chayno yarpar imarga ama laquicuychu, yaracunapaj captiquiga congregaciunchoga yanapäshunquimi hermanunchicuna.

2. ¿Imacunapitataj canan yachacurishun?

² Mä canan yachacurishun rey Davidpita, nircur parlarishun Judapa ishcay reynincunapita, Asapita y Jehosafatpita. ¿Jucnin jucninpis cawaynincho imacunapataj pasapäcushga?, ¿imatataj wamracuna paycunapita yachacunman? Ricarishun.

3. ¿Imanotaj wamracunaga edayashga hermanucunata yanapan?

³ Jovinlaraj cashgan wichanga, imapäpis yachayniyojmi cargan David, Tayta Jehovatapis cuyajmi, y arpantapis shumajmi tucapacoj rey Saulpa nawpancho (1 Sam. 16:16, 23). Chaynolami canan wichan wamracunapis imapäpis yachayniyoj carcaycan, chaymi edayashga hermanucunata mayna yachaycächin computadoranwan y  celularninwan, chaycho paycuna Diospita yachacunanpaj y reuniunmanpis yaycupäcunanpaj, cay lapanga alapa cushicuypämi.

4. David rurashganno, ¿imatataj wamracuna rurapäcunman? (Garancho caycaj dibujuta ricay).

⁴ Davidga yaracuypaj runa cargan, wamralaraj cashgan wichanga uysha michej cargan; uyshancunataga pantacächirganchu ni ograrganchu, mayraj chaypita taytan cushicurgan. Chaymi tiempuwanpis Saulta nirgan: “Tayta, nogaga papänëpa uyshanta michishcä. Liyunpis ösupis uyshäta apacurcur aywacuptin guepanta aywashpä shiminpitapis guechumoj cä” (1 Sam. 17:34, 35). Davidga wanurpis wanurinmanmi cargan uyshancunaraycur. Gamcunapis wamracuna, ¿imanotaj ruraycanqui pipis mandashushgayquicunata?

5. Salmo 25:14 texto wilacushganno, ¿imataj wamracunapäga más ali ruray caycan?

⁵ Tucapacoj captinpis, calpan captinpis o imaycachopis yachayniyoj captinpis Davidpäga Jehová más puntacho caycargan, Diosnintaga alapami cuyaj (leiriy Salmo 25:14). Wamracuna, imaycata rurashgayquipita o yachashgayquipita Jehovata cuyashgayquimi más aliga canga, chayta rurashpayquiga congregaciunchopis masrämi yanapacunqui.

6. ¿Imatataj waquincuna Davidpita nipäcoj?

⁶ Juc cutichomi Saulga Davidpita jucnopa yarpargan. Davidga Goliatwan peliananpämi aywaycargan, chaynami Saulga cayno nirgan: Gamga “wamrallarämi canqui” (1 Sam. 17:31-33). Chaylarämi wawguinpis cayno nirgan ‘imatataj caycho ashinqui, uysha guepancho gamga caycanquiman’ nir (1 Sam. 17:26-30). Taytalanchi Jehovaga manami chaynochu Davidpita yarpaj, ali nawilanwanmi ricaj; Davidga musyarganmi chayta, chaymi Jehovapa jutincho aywar Goliat-ta vencirirgan (1 Sam. 17:45, 48-51).

7. ¿Imatataj yachacunquiman David imacunapa pasashganpita?

⁷ ¿Imatataj Davidpita yachacurcunquiman? Paynola gampis ama piñacuychu. Waquincunaga ‘gamga wamralarämi canqui’ nirpis nishunquimanmi. Jehovami ichanga janalanpaga manami reguishunquichu, payga ricanmi  shonguyquicho imacuna cashganta (1 Sam. 16:7). Chaymi Jehovapita imaypis raquicaychu, Davidtaga yanapargan Jehová camashgancunaman yarpachacushganmi, gampis chayta rurarga yanapäshunquimi (Sal. 8:3, 4; 139:14; Rom. 1:20). ¿Ima mastaj ruranquiman? Diosninchi calpanta goshunayquipaj ruwacuy, escuelayquichoga Testigo cashgayquipita ichanga pilapis ashlishunquiman, chaycho aguantanayquipaj Jehovami valurta goshunquipaj. Nircurpis alapa ali canga Bibliacho o waquin publicaciuncunacho consejucunata tarishgayquita casucuptiqui. Y casucushgayquiraycur ima problemapis alchacaptinga masrämi Jehovaman yaracunqui, y Jehovalaman imaypis yaracushgayquita waquincuna ricarga paycunapis chaytami rurapäcunga.

8, 9. 1) ¿Imatapis mana rurar piñashgacu David cacurgan rey manaraj captin? 2) ¿Imataraj wamracuna yachacunman Davidpita?

⁸ ¿Ima mastaj Davidpa cawaynincho cashga? Ricarishun. Rey cananpaj acrashgana caycarpis achca tiempurämi pasargan Judacho rey cananpaj (1 Sam. 16:13; 2 Sam. 2:3, 4). Y shuyarashgan wichanga manami piñashgachu cacurgan, ganas ganaslami ali cajcunata rurargan; manacu Filistea marcacho caycaptin, ¿Israelpa enemiguncunawan luchargan? Awmi, chayno rurashganga Diospäga alimi caycargan (1 Sam. 27:1-12).

⁹ ¿Imatataj Davidpita yachacunqui? Hermanuyquicunaraycur gampis mayna imalachopis yanapacuycanquiman. Ricardo jutiyoj hermanunchipita parlarishun. * Wamralaraj cashgan wichanshi, precursorno yanapacuyta munargan pero manashi listurächu caycargan. ‘Imaypis manami puedishachu’ nirchuraj ¿manana calpachacushganachu? Manami, quiquinmi cayno nin: “Pogushäraj ali precursor canäpaj nirgämi. Predicaciunchopis masraj calpachacurgä waquincunapa shongunman chayanäpaj, revisita ruraytapis yachacorgä. Chay wichanlachomi juc estudiutapis taririrgä. Manchacoj cashgäpis ilacashganami”. Alimi, canan ichanga Ricardo wawguinchiga siervo ministerial caycan y precursor regularno yanapacuycan.

10. Juc desgraciapa pasashgan wichan, ¿imatataj David rurargan?

¹⁰ Maslata Davidpita yachacushun. Juc cutichomi, soldaduncunawan pacacuycargan Saulpita y guerraman aywananraycurmi familiancunatapis jaguipäcorgan. ¿Imataj pasargan chaycho? Waquin enemiguncunami familiancunata japalanla caycashganta ricar aywapäcorgan, atacar lapancunata apacärirgan. Musyarirga ¿imataraj ruranman David?, ¿juclachuraj enemiguncunapa guepanta aywanman cargan? Manami chayta rurarganchu. Biblia wilacun Jehovata ruwacushganta, caytashi tapurgan: “¿Asaltantikunapa qepanta aywämanku? Jukla aywarqa ¿paykunata taripäshaqtsuraq?”. Tapucushgantaga Jehová wiyarganmi, ‘aywaptiquiga alipami canga’ nirgan (1 Sam. 30:7-10). Wamracuna, caypitapis shumaj yachacunquimanmi.

11. ¿Imamantaj yarpachacunquiman imatapis manaraj rurar?

¹¹ Imatapis ruranayquipaj caycarga yarpachacuyraj taytayquicunaman o ancianucunaman. Paycunaga yanapäshunquimi. Ancianucunaga yaracuypaj  runacunami capäcun. Quiquin Jehovami paycunata carguncunacho churashga (Efes. 4:8). Paycunaga Bibliawanmi imaypis parlapäshunqui. Wiyacurga, cawayniquichoga ali nänipa imaypis purinqui. Cananga jucpitana parlarishun, Asá reypita.

12. ¿Imano runataj cargan Asá gobernamunanpäna caycaptin?

¹² Jovinla cashgan wichanga, mana manchacoj y ñanpu shongu runa cargan. Taytan Abías wanurcuptinga reyman ticrarirgan y waquincuna juc dioscunata adurapäcunanta ichichishgancunata juchuchirgan y “Judá runacunataga llapanta niran unay awiluncunano TAYTA DIOSLLATA sirbinanpaj, TAYTA DIOSPA layninta, mandamintuncunata cumlinanpaj” (2 Crón. 14:1-7). Juc cutichopis Etiopía marcapa reynin, chaychicaj soldaduncunawan Judá marcata ushacächinanpaj shapäcamuycargan, chay hora Asá reyga Jehovata ruwacuycorgan, cayta nirgan: “Tayta Dios, atska soldädü kaptinpis o walkala soldädü kaptinpis qam yanapamaptikiqa vincishaqmi. Tsaymi qamlaman yärakärishpä conträkunawan pelyanäpaq jutikicho shapäkamushqä”. Cayno Asá shumaj mañacamushganga musyachimanchi salvacoj Diosnin Jehovaman yaracushganta, y ¿rasunpachu yanapargan Jehová? Awmi, lapan chiquejnincunatami ushacächirgan (2 Crón. 14:8-12).

13. ¿Imachotaj Asá pantarirgan y nircur imataj pasargan?

¹³ Mana atipaypaj chaychicaj soldaducuna contrancho shamunganta ricarga manchacurganchi rey Asá. Chayno captinpis Jehovamanmi yaracorgan y alipaj cargan, ganarganmi chay guerracho. ¿Imataj pasargan tiempuwan? Israelpa reynin Baasá jutiyoj contrancho sharcurgan. Mana manchacunapämi cargan, paycunaga walcajlami capäcurgan, pero cay cutichoga rey Asá manami ashirganchu Jehovata; Siriapa reynin yanapänanpaj ruwacurgan, awmi, caychoga pantarirganmi rey Asá. Rurashgancunaga laquichirganrämi. Hananí profeta Jehovapa jutincho cayno nirgan: “Gamga Siriapa rayninmanmi yäracushcanqui.  Manami yäracushcanquichu TAYTA DIOSMANGA. Chaymi Siria suldärucuna maquiquipita gueshpisha”. Chaypitaga Asá reypa chiquejnincunaga guerralata ashipargan (2 Crón. 16:7, 9; 1 Rey. 15:32).

14. 1) ¿Imata rurartaj ricacämunga Jehovaman yaracushgayqui? 2) ¿Imataj wilamanchi 1 Timoteo 4:12, waquincuna imano ricashunayquipaj cajpita?

¹⁴ ¿Imatataj Asá reypita yachacunquiman? Imaypis ñanpu shongula canquiman y imaypis Jehovalaman yaracunquiman. Bautizacushgayqui junajga ‘gamlatami sirvishayqui Taytalä Jehová’ nirgayqui y Jehovapis nishurgayqui ‘alimi shacamushcanqui laduläman’. ¡Mana gongaypaj junaj! Canan ichanga yarpaylapis yarpanquimanchu Jehovapita raquicayta. Cawayniquicho imatapis rurayta munar juclachi Jehovata ruwacurcur maygantapis acrarinqui. Chaynola canman waquin cajcunachopis. Trabajuyniquicunacho o quiquiquipa cajta rurayta munar ‘imataraj rurashaj, maygantaraj acrashaj’ nirga, Bibliapa consejuncunata ashiy y yachacushgayquinola cawacuy (Prov. 3:5, 6). Chayno ruraptiqui Taytalanchi Jehová cushicunga y waquin hermanucunapis respetashunquipämi (leiriy 1 Timoteo 4:12).

15. 2 Crónicas 18:1-3 y 19:2 wilacushganno, ¿imacunachotaj rey Jehosafat pantarirgan?

¹⁵ Lapanchipis juchayojmi canchi, chaymi öraga pantarir imarga lapan shonguyquiwan Jehovata sirviytaga ama jaguinquimanchu. Rey Jehosafat rurashganman yarpay. Gobernar galaycamushganchoga, “Tayta Diospa mandamientunkunata cäsukurmi kawarqan”. Judapa waquin marcancunamanpis principecunata mandargan Diospita yachachipäcunanpaj (2 Crón. 17:4, 7). Ali shonguyoj captinpis öraga pantarirganmi, chayraycurmi Jehovapa profetan anyapargan (leiriy 2 Crónicas 18:1-3; 19:2). ¿Imatataj paypita yachacunquiman?

16. ¿Imatataj yachacunquiman Rajeev jutiyoj joven pasashganpita?

¹⁶ Pilapis Diospita yachachishushpayquicunataga chasquicunquimanmi. Waquincunaga manami jucla galaycunchu  Diosta sirviyta, ‘tiempuwanraj chayta rurashaj’ nipäcunmi. Gampis chayno yarparga, ama laquicuychu. Rajeev jutiyoj mozo imacunapa pasashganman yarpachacurga yanapäshunquimi, paymi cayno wilacun: “Mozularaj cashgä wichanga maypa aywaytapis musyargächu, pantacashgano caycargä, umäga puclacunalacho caycargan. Shumajlaga manami yarpachacoj cächu reuniunpaj ni predicaciunpaj”. ¿Chaynola yarparchuraj cay mozo cacurgan? Manami, juc anciano shumaj anyapargan 1 Timoteo 4:8 textuta leipar. Anyapashgantaga ganas ganaslami cay joven chasquicurgan y Jehovalatana sirvinanpaj calpachacurgan. Quiquinmi cayno nin: “Dios churamashgan caminulapa aywayta cananga munä”. Ichic tiempo pasariptinnash, siervo ministerialman cay mozo ticrarirgan.

17. ¿Ima ninchitaj congregaciuncho wamracuna imano yanapacamushganpita?

¹⁷ Wamracuna, congregaciuncho hermanucunaga alapami cushicärin gamcuna imano calpachacärishgayquita ricar (Sof. 3:9). Gamcuna congregaciuncho mayna cayta wacta cushi cushila rurarcaycanqui. Chayno yaracuypaj capäcuptiquimi paycunapis respetashunquipaj (1 Juan 2:14).

18. Proverbios 27:11 wilacushganno, ¿ima nintaj Jehová sirvejnin wamracunapita?

¹⁸ Jehovaga amatar cuyashunqui y gamcunaman yaracun, caytaga maynami wilacurgan “fïlalanpaj chaychicaj mozucuna” payta sirvinanpaj cajpita parlar (Sal. 110:1-3). Jehovaga musyanmi payta cuyashgayquita y sirvinayquipaj calpachacushgayquitapis. Chaymi, ‘gamga wamralarämi canqui’ pipis nishuptiquipis ama piñacuychu. Imalachopis pantarir imarga y pipis anyapäshuptiquiga cushishga chasquicäriy, chayga Jehovapitami shamun (Heb. 12:6). Ganas ganasla mandashushgayquita ruray. Chayta ruraptiquiga, ‘wamralä sirviycämanmi’ chayno ninga Jehová gampita (leiriy Proverbios 27:11).