1. ¿Imanotaj Tayta Jehová ricaycalämanchi?

¡CUSHICUYPÄMI Jehová alapa cuyamashganchita ricarga! (Sal. 149:4). Ali cajcunata rurashganchichomi nawin caycan, y paylawan imaypis purinapämi munan. Chaymi paypitaga ama raquicayculäshunchu ari (Juan 6:44).

2. ¿Imanirtaj waquincunaga Jehová mana cuyashganta yarpachacärin?

² Ichanga pipis ninman “Jehovaga waquincunalata cuyan, imanotaj musyäman nogatapis cuyamashganta”. Oksana * jutiyoj paninchipis chayta tapucurgan, paymi cayno wilacun: “Bautizacushgäpita y precursorano sirvishgäpitami alapa cushicurgä. Pero 15 watacuna pasarcuptinga, unay cawaynïman yarpachacurmi galaycurgä y laquicurgämi. Chauras ‘Jehová cuyamannachu’ nirmi yarpachacurgä”. Jina Yua paninchipis chayno nacashganpita cayno wilacamun: “Diosta cushichinäraycur bautizacurgä, pero chayta ruraptïpis mana cuyamänanpa cajta yarpargä”.

3. ¿Imapitataj canan yachacurishun?

³ Noganchipis chay panicunanola ‘Jehovata cuyämi, pero ¿pay cuyamanchuraj nogata?’ niycashwanmi. Cananmi yachacurishun rasunpa Diosninchi cuyamashganchipita, y ¿imatataj rurashwan jucnopa yarpar galaycuptinchi?

4. ¿Imanirtaj nishwanchu ‘Jehovaga nogata cuyamanchu’?

⁴ Jehovaga alapami cuyamanchi, chayno mana cashganta jucnopa yarpachacurga manami lapan shongunchiwan Jehovata sirviycäshunchu (Prov. 24:10). Diabluga cushicunmanmi jucnopa Jehovapita yarpachacuptinchi, y mana alicunamanpis chayachimashwanmi (Efes. 6:16).

5. ¿Imatataj nipäcun waquin hermanucuna?

⁵ Waquin hermanucunaga paycunapaj Dios mana yarpachacushganta nipäcun, chayraycur yaracuynincunatapis ograpäcushga. James jutiyoj anciano cayta wilacun: “Betelcho caycashpämi juc idiumacho predicaj congregaciunta yanapaycargä, y tapucurgä: ‘¿Jehová ricaycanchuraj y chasquingachuraj lapan rurashgäta?’ nir, ‘¿mañacushgätapis wiyanchuraj?’ nirpis yarpachacurgämi”. Betelcho aroj Eva paninchipis cayno nin: “Dios mana cuyamashganchita yarparga mananami cushi cushila payta sirvinchinachu. Ganas mana captin sasanomi cawayninchipis ticracurin”. Ancianuno y precursorno yanapacoj, Michael jutiyoj wawgui cayno nin: “Dios mana cuyashushgayquita yarparga maquinpita aywacuycajnomi canman”.

6. ¿Imatataj rurashwan jucnopa yarpar galaycuptinchi?

⁶ ¿Cay hermanucunanochuraj noganchipis Diospita yarpashwan? Manami ¿aw?, umanchiman mana ali yarpaycuna chayamuptinga juclami jorgurishwan. Taytanchi Jehovata ruwacuycushun jaucala caycänapaj, y shongunchipis “alita o mana alita yarpashqantapis” ricaycunanpaj (Sal. 139:23; Filip. 4:6, 7). Waquincunapis lucharcaycanmi mana ali yarpaycunawan, chaytapis ama gongashunchu. Unay Diosta sirvejcunapis chaypa pasapäcurgan. Mä apóstol Pablupita parlarcushun, imatataj yachacunchi.

7. ¿Imacunataj Pabluta laquichej?

⁷ ¿Caycashganchichoga imayca ruranapächu caycan? ¿Uticächimashcanchinachu? Unaycho apóstol Pablupis chayno  ricacurgan. Payga “maytsaycho kaykaq wawqi panikunapaq” yarpachacoj (2 Cor. 11:23-28). Cushicuyninchiga aywacunmanmi gueshyaraycur laquesalawan caycarga. Imanir-raj Pablupis nirgan “cuerpöcho casha caycajnöpis fiyupa ñacaycächiman”, libracuytachi chaypitaga munargan (2 Cor. 12:7-10). Ichanga laquicuycanchi jucha ruraj cashganchiraycurpis. Pablupis chaypami pasargan, calpachacurganmi ali cajcunalata rurananpaj, pero öraga mana alicunatachi rurarej (Rom. 7:21-24).

8. ¿Imataj Pabluta yanapargan Dioslata sirvir cacunanpaj?

⁸ Imayca pruebacunapa pasarpis Pabluga manami Jehovapita raquicarganchu. ¿Maypitataj calpata jorgurgan? Paytaga yanapargan Jesuspa wanuyninman yaracushganmi. Jesús cayno nirgan: “Pipis yäracoj cäga mana wañunanpaj chaypa ruquenga imaycamapis cawananpaj”, caymanpis Pablo yarparganchi (Juan 3:16; Rom. 6:23). Awmi, Pabluga yaracurganmi Jesús juchanchiraycur wanushganman. Jehová perdunacoj cashganmanpis yaracurganmi, imano pipis arrepenticuptinga perdunashganman (Sal. 86:5).

9. ¿Imatataj yachachimanchi Gálatas 2:20 textucho Pablo wilacamushgan?

⁹ Pabluga musyarganmi Jehová payta cuyashganta, y payraycur Churinta mandamushgantapis; caypita Gálatas 2:20 (leiriy) texto shumaj wilacamun. Pabluga caytachi nirgan: “Laquipämar cuyapämar nogaraycur Jesús wanush”. Jehová alapa cuyacoj cashganman Pablo yarpachacurga, payga manachi cayno nirganchu: “Diosga waquincunalatami cuyan, queva nogataga cuyamanga” nir. Roma hermanucunatapis cayno nirgan: “Jesucristumi itsanqa jutsayuq kaykaptintsipis noqantsi rayku wanurqan” (Rom. 5:8). Jehová cuyacoj cashganga manami imaypis ushacangachu.

10. ¿Imatataj yachacunchi Romanos 8:38, 39 textupita?

¹⁰ (Leiriy Romanos 8:38, 39). Pabluga alimi tantiaj Dios cuyacoj cashganraycur imaycata ruranapaj. Y nirgan: “Paypa kuyakuyninpita mana rakimäshuntsu” imapis. Israelitacunata cutin cutin Dios perdunashganta yarparmi, paytapis perdunananpaj cajta yarpargan. Cayno imachi Pablo yarpaycargan: “Nogaraycur wanunanpaj Wamranta Dios mandamushga carga, ¿imanirtaj  Dios cuyamanchu nïman?” (Rom. 8:32).

11. 1 Timoteo 1:12-15 texto wilacamun unaycho Pablo juchalacushganpita, chayno captinpis ¿imanirtaj payga musyargan Dios alapa cuyashganta?

¹¹ (Leiriy 1 Timoteo 1:12-15). Unay cawaynincho pasaypa mana alicunata rurashganman Pablo yarpachacurga alapachi laquicurgan. Rasun caj caminuta manaraj reguirga cristianucunatami may chaycho gaticachargan, carcelcho wichgachirgan y waquincunatapis wanuchirgan (Hech. 26:10, 11). Imanoraj cargan wanuchishgan taytacunapa wamrancunawan canan tincurirga. Laquicurchi ‘imanir-raj chay lapanta rurashcä’ nirgan, pero laquicurlachu mana cacurgan. Cristo wanushganman yarparmi cayno nirgan: “Dios kuyapämaptinmi apóstol kaykä” (1 Cor. 15:3, 10). ¿Imatataj yachacunchi? Imaypis yarpashwan jucninchi jucninchipa Jesús wanushganta, y chayraycur noganchipis Jehovapa wamranno cashganchita (Hech. 3:19). Canan rurashganchiman y shamoj tiempucho rurashganchimanmi Taytalanchi Diospa nawin caycan, unaycho rurashganchitaga manami yarparaycanchu (Is. 1:18).

12. 1 Juan 3:19, 20 texto wilacushganno, ¿imatataj rurashwan shongunchi jucnopa yarpachacächimaptinchi?

¹² Öraga cayno yarpachacur galaycushwan ‘imapäpis välïchu, nogataga manami pipis cuyamanchu’ nir (leiriy 1 Juan 3:19, 20). Ichanga caynopis yarpaycashwanmi: “Jesús wanushga captinpis, juchäcunataga manami Dios perdunanchu”. Biblia cayno nishganga yanapämashwanmi: “Payga alli shongu carmi shongunchïtapis rejsin”. Umanchipis shongunchipis jucta yarpächimashwanmi, pero Taytalanchi  Jehovaga cuyamanchimi y perdunamanchimi. Chayno cashganta mana gonganapäga waran waranmi Bibliapita yachacunanchi, mañacunanchi y cristiano masinchicunawan mana raquicaypa caycänanchi. Caypita yachacurculäshun gatejnin cajcho.

13. ¿Imanotaj yanapämanchi Bibliata shumaj yachacuptinchi? (“ Imanotaj yanapan Bibliapita yachacuptin” recuadrutapis ricay).

¹³ Bibliapita waran waran yachacushun. Chayta rurarga Jehová imano cashganta y cuyamashganchitapis musyashunmi. Biblia nishganta shumaj ricapacaramur tantiarcurga yanapämäshunmi jucnopa mana yarpachacunapaj (2 Tim. 3:16). Kevin jutiyoj anciano wilacamun ima yanapashganta aliyarcunanpaj, cayno nin: “Salmo 103 ima nishganman yarpachacushgämi yanapämashga quiquë imano cashgäta shumaj tantianäpaj, y Jehovapis alapa cuyamashganta”. Naga parlashganchi Eva pani caytapis ninmi: “Tardipaypa horacunami Taytalä Jehovaman yarpachacö, chayta rurarmi shacya shacyalana ricacö. Yaracuynïpis sinchiyarcunraj”.

14. ¿Imanotaj caycäshun Diosta cutin cutin ruwacurga?

¹⁴ Imaypis Diosta mañacushun (1 Tes. 5:17). Piwanpis shumaj parlapänacuptinchirämi ali reguinacunchi, chaynolami caycan Taytanchi Jehovawanpis. Jehovata alapa cuyarmi y payman yaracurmi imano cashganchita y imacuna yarpachacächimashganchicunatapis wilapanchi (Sal. 94:17-19; 1 Juan 5:14, 15). Yapay ricarishun Yua paninchi ima nishganta, cayno nin: “Diosta mañacuptïga manami ima pasamashganlatachu payta wilapä. Shongüta mashtaycur imano cashgätapis lapanta wilapä. Paytaga manami ricächu juc patruntano, paytaga ricä rasunpa taytätanomi, wamrancunata cuyaj taytatano” (“ ¿Leipashcanquinachu?” recuadruta ricay).

15. ¿Imanirtaj ninchi Jehovaga jucninchi jucninchipa yarpachacushganta?

¹⁵ Hermanunchicunawan mana raquicaypa caycäshun. Quiquin Jehová goycalämashganchitano paycunata ricäshun (Sant. 1:17). Jehovaga alapami noganchicunapaj yarpachacun, chaymi goycalämashcanchi may chaycho caycaj hermanucunata, familianchinomi paycuna caycan (Prov. 17:17). Colosas marcacho caycaj ali cristianucunaman cartacamurmi Pablo nirgan: ‘Ali yanapämar shumaq shakyätsimargan’ (Col. 4:10, 11). Quiquin Jesuspis ashirganmi pï yanapänanpaj. Runacuna y angelcuna yanapaptinga agradecicurganmi (Luc. 22:28, 43).

16. ¿Imanotaj hermanucuna yanapämanchi Jehovapa maquilancho imaypis caycänapaj?

 ¹⁶ ¿Pï hermanulapis yanapämänanchipaj ashinchichu noganchipis? Alimi canga maygan hermanulatapis ima pasamashganchita wilaycuptinchi, yanapämashwanmi. James wawguipitapis yapay parlarcushun, cayno nin: “Diosta cuyaj hermanucunawan reguinacushgaga alapami yanapämashga. Öraga laquesa chayamuptinga paycunaga nogawanmi caycan, cuyamarmi nipäcaman alapa cuyamashganta. Chaychomi ricä Jehovapis alapa cuyamashganta, y nogapaj yarpachacushganta”. ¡Ima alitaj caycan cristiano masinchicunawan junto caycarga!

17, 18. ¿Pitataj casucushwanga y imanir?

¹⁷ Diabluga guepaman cutinanchitami munan. Jehovapita jucnopa yarpänanchita munan, y mana salvamänanchipa cajtapis yarpänanchita munan. Payga lulacuycanmi, ama imaypis casupäshunchu.

¹⁸ Jucninchi jucninchitami Jehovaga alapa cuyamanchi. Casucurga Jesusnopis paypa maquilanchomi imaypis caycäshun (Juan 15:10). Ni Diablupis ni shongunchipis jucnopa yarpachimänanchita jaguishunchu, Jehovaga rasunpami cuyamanchi. Jehová Dioslatami casucushwanga, paypa nawilanga ali rurayninchichomi caycan. “Kuyashqan runakunata rikarmi TAYTA DIOS kushikun”, awmi, gamtapis ricaycäshunquimi y cuyashunquimi.