1, 2. ¿Ima nishwantaj salvashga cashganchipita, y Jesusga wanunmanräcu cargan?

ADANPA culpanraycurmi mana wanuypa cawacunapaj caj y más bendiciuncunapis ogracash. Adanga wanunanpaj musyaycarmi juchata rurargan, quiquinmi wanuyninta ashicurgan. Ichanga manami japalanchu wanurgan, shamoj miraynincunapis pay juchalacushganpita wanuyta taripäcurgan (Rom. 5:12, 14). Cawarla wanurla, cawarla wanurla, ¿chaynolachuraj cacärinman cargan? Manami. Chay tiempulachomi Jehovaga wilacamurgan wanuypita y juchapita Adanpa miraynincunata salvananpaj (Gén. 3:15). Jehovaga yarpaycargannachi tiempuwan cuyashgan Churinta mandamunanpaj noganchiraycur wanur salvamänanchipaj (Mar. 10:45; Juan 6:51).

² ¿Ima nishwantaj salvashga cashganchipita? Salvashgaga caycanchi wanuypita y juchapitami. Jesusga cawayninwanmi lapanchita rantimashcanchi (1 Cor. 15:22). ¿Imanirtaj Jesús wanunman cargan? Unay Diospa Leyninga nirgan cawayta ograrga juc cawaywanraj paganapaj (Éx. 21:23, 24). Adanga juchaynaj cawaynintami ogrargan. Ograshganta yapay tarinapäga, Jesusmi juchaynaj cawayninwan pagargan, chaynoparaj Jehovapa Leynin cumplicänanpaj (Rom. 5:17). Chaymi Jesuspa wanuyninman lapan yaracojcunaga “Taytantano” Jesusta ricapäcun (Is. 9:6; Rom. 3:23, 24).

3. Juan 14:31 y 15:13 textucuna nishganno, ¿imaraycurtaj Jesús wanurgan?

³ Jesusga manami ruwaj tucurganchu wanunanpaj, Taytanta cuyashpanmi y noganchicunata cuyapämashpanchimi imaycata rurar wanurgan (leiriy Juan 14:31; 15:13). Awmi, wanushgancama Taytanpa voluntäninta rurargan.  Jesús rurashganraycurmi cay Pachapis paraisuman ticranga y Taytalanchi Jehovaga imayca bendiciuncunatami tarichimäshun. Cananmi yachacurishun imanirtaj Jesús alapa nacaycunaparaj pasargan manaraj wanur, nircurpis yachacurishun Jesús wanushganpita apóstol Juan agradecicushganpita. Ushanapäna ricarishun imano jucninchi jucninchipis Jesús wanushganpita agradecido caycashwan, imano Jehová Jesuswan rurashganta mana gonganapaj.

4. Jesús imano wanushganpita wilacaramuy.

⁴ Yarpachacushun Jesús cay Pachacho caycar ushanan junajninman. Roma soldaducuna fiyupa cutar ushaycaptinpis Jesusga upälalami cacurgan, munarga mañacamunmanchi cargan maychicaj angelcuna yanapänanpaj (Mat. 26:52-54; Juan 18:3; 19:1). Wajtalanpis yawartashganachi caycargan alapa magapäcushganpita. Maycho wanunanpaj lasaj guerutapis quiquintami nanaycaj matancanman hombruchipäcurgan. Chay lasaj gueruta Jesús apaycashgancho soldaducuna nirgan juc runa aprishinanpaj (Mat. 27:32). Maycho wanunanpaj soldaducuna Jesusta chayachirna, juc guerucho warcurcur chaquinta y maquinta clavaripäcurgan. Warcuraycaptin cuerpun shawacäcuptinga maquinpis chaquinpis masrächi nanaycurgan. Chayno Jesusta ricarga mamänin y payta cuyajcunaga wagaycarchi carcaycargan. Soldaducuna ichanga burlacuycar ricarpaycargan (Luc. 23:32-38; Juan 19:25). Imayca nacashgancunaga manami ratulapächu cargan. Chay horapäga jämayninpis ushacaycargannachi, calpanpis mananachi cargannachu. ¿Imami sï umalancho caycargan? Taytalan Jehovata ushanancama sirvishganmi. Wanunanpa caycar Papäninta mañacamun y chaylachona wanun (Mar. 15:37; Luc. 23:46; Juan 10:17, 18; 19:30). ¡Wanunanpaj imaycata aguantashgantaga piraj aguantanman!

5. ¿Imataj Jesuspäga más laquicuypaj cargan?

⁵ Jesuspäga más laquicuypaj cargan, waquincuna lutanta parlar Diosta mana respetashganta nipäcushganmi (Mat. 26:64-66). Chaylaman cutin cutin yarpararchi Taytantapis mañacurgan, chay lapanpita libraycunanpaj (Mat. 26:38, 39, 42). ¿Imanirtaj Jehovaga cuyashgan Churin nacar wanuycaptin ricaraycashgala? Imanir cashganta quimsalata ricarishun.

6. ¿Imanirtaj Jesusga guerucho warcushgaraj wanurgan?

⁶ Juc caj, Jesusga wanunman cargan judiucuna maldecishga cashganpita librananpämi (Gál. 3:10, 13). Judiucunaga maldecishga carcaycargan Ley nishgannola cawayta mana camäpacurmi; y mana chaylachu, Adanraycurpis juchawan maldecishga carcaycargan (Rom. 5:12). Israelitacunata goshgan Diospa jucnin caj Leyninga nirgan pipis jatun juchata rurarga wanunanpa cajta, waquincunata wanuchipäcoj gueruman warcarcachir (Deut. 21:22, 23; 27:26). * Chauras guerucho warcushga Jesús wanushga carga mana casucoj judiucunapäpis wanurganmi.

7. ¿Imanir mastaj Diosga Wamran nacananta ricaraycashgala?

⁷ Ishcay caj, Jehová churin Jesús nacananta ricaraycashgala tiempuwan Mayor  caj Sacerdote carguta pay chasquinanpämi. Jesusga musyarganmi imayca nacaycunapa pasar sasaraj cashganta Diosta casucunapaj. Alapa sasa cashpanchi ruwacuyparaj wagayparaj Taytan yanapänanpaj mañacurgan. Chauras Jesús musyanmi, Diosta sirvir imayca pruebacunapa pasashganchita, imano umanchi shongunchi nanashganta, payga yanapämäshunmi. Chauras Mayor caj Sacerdote carguta Jesús chasquishganga alapa alimi, cushicuypämi. “Noganchïno runa cayta päsasha carmi rejsiycämanchi” y cuyapämanchi (Heb. 2:17, 18; 4:14-16; 5:7-10).

8. ¿Imanirtaj Jehová churin Jesús nacaycaptin japalantano jaguiycushga?

⁸ Quimsa caj, jinamanpis Jehová ricaraycashgala Jesús nacananta Diablo lulacushgan musyacänanpämi. Diabluga nin ‘runacunaga Jehovata aduranga Pay yanapaptilanmi’ pero chayga manami rasunchu, pruebacunapa pasashgancho Jesús imata aguantashganchomi chaytaga ricanchi. Jina Diablupis nin Adannola noganchipis Jehovata mana cuyashganchita ( Job 1:9-11; 2:4, 5). Jehovaga musyarganmi churin Jesús lapan yarpayninwan y lapan shongunwan Paylata adurananpaj, chaymi japalantano jaguiycush alapa nacaycunacho caycaptin. Diabluga musyarganmi wanushgancama Jesús Jehovalata adurashganta, chaychomi musyacash pay alapa lulacoj cashgan.

9. ¿Imatataj yachacunchi apóstol Juanpita?

⁹ Jesús imanir salvamashganchipita yachacuptinchiga sinchiyächinmanmi yaracuyninchita. Cristianucunaga imayca nacaycunapa pasarpis Jesús salvamashganchipitaga pï maytami yachachipäcushga. Apóstol Juanpita parlarcushun. Payga 60 watapanomi Diospita y Jesús imanir salvamashganchipita yachachicushga. Roma autoridäcuna isla de Patmos nishganman presuno apapäcuptinga 100 watayojnachi caycargan, ¿imalapitataj preso apapäcurgan? Diospita yachachicushganpita y “Jesucristo salvamaqnintsi kashqanta” wilacushganpitami (Apoc. 1:9). Mana uticaypa Diospaj arushganga ¡alapa alimi!

10. ¿Imatataj Juan nirgan Jesuspita escribishgan librucunacho?

¹⁰ Escribishgan librucunachoga ricanchimi imano Juan alapa agradecicun Jesús imano salvamashganchipita. 100 cutinomi chaylapita parlamun. Jucnin caj librunchomi cayta nirgan: “Ichanga mayganchipis juchäcushaga Tayta Diospa ñaupagninchru juc caycanmi favurninchi sharcunanpag. Chay favurninchi sharcüga Jesucristum” (1 Juan 2:1, 2, Biblia Ambo-Pasco). Jinamanpis nirgan: “Lapan wilakushqäpis Jesucristo alabashqa kananpaqmi kaykan” (Apoc. 19:10). Apóstol Juannola Jesús wanushganpita noganchipis agradecicunapäga, ¿imatataj rurashwan?

11. ¿Imataj yanapämäshun juchata imaypis mana ruranapaj?

¹¹ Juchacunalapaj yarpaylapis ama yarpäshunchu. Salvamänanchipaj Jesús wanushga carga imaraj canman juchata ruraycur ‘Diosga perdunamangami’ nirga, chayta rurarga ichiclatapis agradecicuycashwanchu. Cayno niptinchi ichanga ali canga:  “Nogaraycurmi Jehovawan y Jesús imaycata rurapäcush, paycuna chiquishgantaga chiquishämi, ¡ama imaypis rurashächu!”; chayno nirna caytapis Jehovata ruwacushwan: “Jutsa rurayman ama kacharpalämaytsu” (Mat. 6:13).

12. ¿Imata rurartaj 1 Juan 3:16-18 texto nishganta casucushwan?

¹² Cristiano masinchicunata cuyashun. Cuyacoj captinchipis Jesús salvamashganchipita agradecicuycanchi. Hermanunchicunapäpis Jesusga wanushgami, awmi, mayganninchitapis Jesusga alapami cuyamanchi (leiriy 1 Juan 3:16-18). Cuyashganchiga ricacämunga paycunapaj imata rurashganchichomi (Efes. 4:29, 31–5:2). Gueshyarcaycaptinga, ima pruebacunapäpis pasarcaycaptinga, ima desgraciapis captinga, chaychomi caycanchi yanapacunapaj. Y pipis ofendiramaptinchi imarga ¿imatataj rurashwan?

13. ¿Imanirtaj hermanunchicunata perdunashwan?

¹³ ¿Pipis ofendimaptinchiga nanaparashwanchuraj payta? (Lev. 19:18). Diospa Palabranmi cayno nin: “Imalapitapis rabyakunaykipa trukanqa awantakäriy. Jaqayätsinakurqa perdonanakäriy. [Jehová] perdonashushqaykinöla qamkunapis perdonanakäriy” (Col. 3:13). Hermanunchicuna ima ruramashganchita gongaycurga, Jehovatami niycanchi ‘graciaslä Churilayqui salvamashganpita’. ¿Ima mastarätaj rurashwan Jesús salvamashganchipita agradecicunapaj?

14. ¿Imaraycur mastaj Jesús wanushganpita agradecicushwan?

¹⁴ Jehovata agradecicushun Jesús salvamashganchipita. 83 watayoj India naciunpita, Joanna jutiyoj paninchimi cayno nin: “Alimi canman Jehovata mañacuptï Jesús nogaraycur wanushganpita agradecicuptï”. Noganchipis pantarcushwanmi imalachopis, chaytapis waran waran Tayta Jehovata wilapashwan perdunamänanchipaj. Y jatun juchata rurarishga carga ancianucunatami wilapänanchi, paycunaga wiyamäshun y Bibliawanmi yanapämäshun. Jina noganchipaj mañacaramunga y Jehovapa perdunninta ashinga y Jehovaga Churinpa yawarninraycurmi perdunamäshun Diosta sirvir caycänapaj (Sant. 5:14-16).

15. ¿Imanirtaj tiempunchita camacächishwan Jesús rurashganman yarpachacur yachacunapaj?

 ¹⁵ Jesús salvamashganchiman yarpachacushun. 73 watayoj Rajamani jutiyoj pani cayno nin: “Imayca nacashganpita Jesuspita leiptï, wagarpis wagarirämi”. Noganchipis ichanga Jesús rurashganman yarpachacurga wagarpis galaycushwanmi. Awmi, noganchiraycur Jesús rurashganman yarpachacurga payta y Diosninchi Jehovatapis masraj cuyashun. Chaymi ali canman Bibliapita yachacuptinchi, Jesús salvamashganchipita yachacuptinchipis.

16. ¿Imanotaj yanapämanchi Jesús wanushganpita waquincunata yachachicurga? (Garancho caycaj dibujuta ricay).

¹⁶ Waquincunatapis yachachishun Jesús noganchiraycur wanushganpita. Waquincunata Jesuspita yachachicurga masraj rurashganta cuyashun. Jesuspita shumaj yachachicunapäga imaycacunami caycan, chaypaj amänula caycan “Diosninchipa ali wilakuyninkuna” folleto, chusco caj yachachicuyninpa, juc tema nin: “¿Pitaj Jesucristo?”. Nircurpis caycan ¿Qué nos enseña la Biblia? nishgan libro, pichga caj capitulun parlan Jesús imano salvamashganchipita. Jinamanpis wata watami Jesús wanushganta Yarpänapaj reuniunman aywanchi y waquin runacunatapis cushi cushila invitanchi, chayta rurarpis agradecicuycanchimi. Jehovami mandaycalämashcanchi churin Jesuspita yachachicunapaj ¡Cayga cushicuypämi!

17. ¿Ima nishwantaj salvamänanchipaj churin Jesusta Jehová mandamushganpita?

¹⁷ Imaycacunami caycan ‘graciaslä’ ninapaj Jesús salvamashganchipita. Jesús salvamashganchiraycurmi juchata ruraj runa carpis ali shongulanchiwan Jehovata sirviyta puedinchi. Jina Jesús wanushganraycur Diablo imayca camacächishgancunapis ilacangami (1 Juan 3:8). Y mana chaylachu, lapanchimi shuyaraycanchi cay Pacha paraisuman ticrananta y chay wichan Jehovalata imaypis sirvinapaj. Chauras waran waran yarpachacushun imano Jesús rurashganta agradecicunapaj y Taytalanchi Jehová rurashgantapis mana gongaycunapaj.