Wanunanpäna caycar, ¿imanirtaj Salmo 22:1 texto David escribishganta Jesús yarpargan?

Manaraj wanurmi Mateo 27:46 texto nishganno Jesús nirgan: “Diosnillä, Diosnillä, ¿imanirtaj cachaycamashcanqui?”. Chay junajmi cumplicargan Salmo 22:1 textucho David ima wilacamushgan (Mar. 15:34). Chaytaga Jesús manami nirganchu pipis payta lulapashga carchu o yaracuynin ushacaycashganraycurchu. Payga musyarganmi imaraycur wanunanpa cajta (Mat. 16:21; 20:28). Y musyarganmi chay hora Papänin mana yanaparcunanpaj (Job 1:10). Papänin mana yanapaptinga, ¿Jesusga mananachuraj Payta sirvirgannachu? Manami, payga japalanla imayca pruebacunapa pasarpis wanushgancama Jehovata jaguirganchu (Mar. 14:35, 36).

Chauras, ¿imanirtaj Papänin cachaycushganta Jesús nirgan? Mä juc ishcaylata tantiarcushun. *

Chay palabracunata Jesús nirga, ichanga yarpaycargan chay hora Papänin mana yanaparcunanpaj. Juchapita wanuypita libramänanchipäga, japalanmi aguantanman cargan imaycatapis. ‘Noganchi-raycu ñacar wañunanpäga’ noganchino runarämi Jesús canan cargan (Heb. 2:9).

Salmo 22 textupita ichicla parlarirga, ichanga Jesús munaycargan waquin textutapis  runacuna yarpapäcunanpaj. Chay wichancunachoga, achca salmucunatashi judiucunaga umachicarcärej. Chaychi ichiclatapis pipis yarpächiptinga, umancunaman chayamoj waquin textucunapis. Chayno cashga carga, wanunanpa cajpita parlaj textucunata gatejnincuna yarpänantachi Jesús munaycargan (Sal. 22:7, 8, 15, 16, 18, 24). Jina cay salmo 22 textupa ushayninchomi parlamun, Jehová Diosla autoridäyoj cashganpita y imano may chaycho reguishga cananpäpis (Sal. 22:27-31).

David wilacamushganpita parlarpis, ichanga mana culpaynaj cashganpita Jesús musyachicuycargan. Manaraj Jesusta wanuchipäcurmi, religiosucuna ‘Diospa contrancho ticrashga’ nir Jesusta acusapäcurgan (Mat. 26:65, 66). Leynincunatapis mana respetarmi chacaypa jucla acusapäcurgan (Mat. 26:59; Mar. 14:56-59). “¿Imanirtaj cachaycamashcanqui?” nirga, ichanga culpaynaj cashganta waquincuna musyananta munaycargan.

Chay salmupita parlamurga Jesuspis munaycarganchi runacuna cuentata gocunanpaj, David nacaycarpis Diosga imaypis payta mana jaguirishganta. Davidga yaracuycashgalami chay tapucuyta rurashga carpis, jina payga nirgan Salvacoj Jehová Dioslaman yaracushganta, y Pay imaypis yanapänanpa cajta (Sal. 22:23, 24, 27). Chaynolami guerucho warcushga Jesús alapa nacashga carpis, manami nishwanchu Diosninchi paytaga manana chasquishganta (Mat. 21:9).

Chaynopis Jesús tapucurganchi, chay hora Papänin mana yanaparcuptin imano shongun nananganta musyachicunanpaj. Adanwan Eva Diospa contrancho ticrashganpitaga Jesusga nacananraj y wanunanraj cargan. Chayno cananpäga manami imaypis Jehová yarpaylapis yarparganchu. Jesusga manami ima mana alilatapis rurarganchu, Diablo lulacoj cashgan musyacänanpämi wanurgan, salvashga canapäpis y yapay tarinapaj lapan Adán ograshganta (Mar. 8:31; 1 Ped. 2:21-24). Caycunata rurananpäga Jehovami nacashgan hora mana yanaparcunmanchu cargan.

Ichanga chaynopis Jesús tapucurgan, Taytanraycur y runacunaraycur wanushganta gatejnincuna shumaj tantiapäcunanpaj. * Mana ali ruraj runano Jesús wanushganta waquincuna ricarga, piñacurmi payman creicurgannachu (1 Cor. 1:23). Imanir wanushganta gatejnincuna shumaj tantiarga, mananachi Jesuspita jucnopa tantiapäcunmannachu cargan (Gál. 3:13, 14). Chauras pipis ninmannachu mana ali ruraj runano wanunganta, sinoga Jesuspitaga nipäcunman Salvacojninchi cashganta.

Imaraycurpis chay tapucuyta Jesús rurashga carpis, musyanchimi wanushganwan Taytanpa voluntäninta rurashganta. Chaymi cayta niycur wanucuycurgan: ‘¡Llapantanami cumlishcä!’ (Juan 19:30; Luc. 22:37). Nishganchinopis Jehovaga wanushgan hora yanapaycurganchu, Jesusla imano nacarpis wanurpis lapanta cumplinanpaj. Chaycho jina cumplicäcurgan lapan ‘Moisés qelqashqan leykuna, profëtakuna qelqashqan y salmukunapis’ (Luc. 24:44).