1, 2. ¿Imanotaj tantiashwan Jesuspa yupilanpa aywanapaj nishganchita?

JUC runash pushaycämashwan luchca luchca caminupa, mayman aywashganchiman chayayta munarga, chay runapa guepalantachi aywashwan, puntarcuptinpis yupilanpachi aywashwan.

² Chay japuyla cristianucunapis luchca luchca caminupa aywaycashganchinomi caycanchi, chayga cay mana ali mundumi caycan. ¿Pitaj pushaycämanchi cay nänichoga? Payga Jesusmi caycan, quiquin Jehovami payta acrash (1 Ped. 2:21). Bibliapita parlaj yachaj runacuna nishgannopis juc pushacojtawanmi Pedruga Jesusta igualachiycargan. Imanomi mana reguishganchi caminupa aywaycar pushacojninchipa guepalanpa aywanchi, chaynolami ‘nogata gaticamay’ Jesús nimashganchi caminulapa aywashwan, yupilanpa aywashwan. Chaurasga, yupipaj parlarga ¿imapätaj parlaycanchi? ¿Imanirtaj Jesuspa yupilanpa aywashwan? Y ¿imanotaj chayta rurashwan?

3. Pipa guepalanpa aywashganchita, ¿imanotaj tantiashwan?

³ Imanomi caminupa aywaycar pushacojpa guepalanpa aywashwan, chaynolami cawayninchiwanpis pasaycunman. Yupicunalata ricarpis maymanpis chayashwanmi (Gén. 6:9; Prov. 4:26). Caway vidachopis pipis ali cawacushganta ricarga noganchipis paynola ali cawacuyta munanchi.

4. ¿Imanotaj aywanchi Jesús japashganlapa?

 ⁴ Chauras, ¿imanotaj aywanchi Jesús japashganlapa? Chaytaga ruranchi pay cawacushgannola cawacurmi. Galanan textucho apóstol Pedro wilacamun imacunata Jesús aguantashganta. Pero Jesuspa cawayninman yarparga masrämi caycan yachacunapaj (1 Ped. 2:18-25). Awmi, Jesusga imayca alicunata rurashga, chay lapanman yarparga yanapämashwanmi.

5. Juchasapa caycarpis, ¿imanotaj Jesús cawacushgannola cawacushwan?

⁵ ¿Imanotaj juchasapa caycarpis Jesús cawacushgannola cawacushwan? Pedruga manami nirganchu juchaynajraj canayqui Jesusta gatinayquipaj, payga niycargan juchasapa caycarpis mana raquicaypa imaypis paylata gatinapaj. Caway vidachoga calpachacunanchirämi ali cawanapaj, chayno cashpanga “Jesucristo cawashanno” cawacuycäshun (1 Juan 2:6).

6, 7. Jehovaman guelicunapäga, ¿imanirtaj Jesús cawashganno cawacushwan?

⁶ Jesús maypa aywashgalanpa aywarga Jehovamanmi guelicushun. Caytaga ninchi Papänin munashgalanta Jesús imaypis rurashga captinmi (Juan 8:29). Chauras Jesús cawacushgannola noganchicunapis cawacurga Taytalanchi Jehovaga cushicungami. Calpachacushganchiraycurmi paypis noganchiman guelicamunga (Sant. 4:8).

⁷ Nircurpis Taytan Jehovapa ricayninpäga imaypis ali cajlata Jesús rurargan. Chaymi payga cayno nirgan: “Noqata reqimaq kaqqa Taytätapis reqinmi” (Juan 14:9). Jehová cashganno noganchipis cashwanmi, ¿imanotaj chayga canman? Jesús rurashganpita shumaj yachacurmi. Juc cutichomi leprawan gueshyaycaj runawan tincurgan,  payta laquipar yataycurmi cachacächirgan; nircurpis alapa nacaycaj warmita cuyapaylapa parlapargan y castancunata ograjcunawanpis wagarganrämi (Mar. 1:40, 41; 5:25-34; Juan 11:33-35). Cayno Jesús rurashganman yarpachacurga, Jehová cashganno canapämi calpachacuycäshun; awmi, paymanmi guelicushun.

8. Jesús cawacushganno cawacurga, ¿noganchicunapis vencishwanchuraj cay munduta?

⁸ Riccha ricchala Jesuspa yupilanpa aywarga, manami cay mundupa mana ali nänincunapa jaticäcushunchu. Wanunanpäna caycaptinmi Jesús cayno nirgan: “Noqami kay patsacho lapan mana alikunata vincishqä” (Juan 16:33). Chaywanga Jesús niycargan cay munduwan imaypis mana talucäcushganta ni imacunapis pantacächishganta. Yarpaynincho y shongunchoga caycargan Taytan Jehovalata sirvinanpaj y jutinta respetachinanpaj. ¿Y noganchicunaga? Cay munducho ruranapaj imayca caycan, pero Jehovapa cajlata imaypis rurarga alimi canga, chayno captinga Jesusnolami noganchicunapis nishun ‘cay mundutami vincishcä’ (1 Juan 5:5).

9. ¿Imacunata rurartaj Jesús aywashgan caminulapa aywashwan?

⁹ Jesús imano cawacushganno cawacurga, mana ushacaj cawaymanmi apamäshun. Juc cutichomi imaycata charaj juc mozo Jesusta tapurgan imata rurananpaj mana ushacaj cawayta tarinanpaj, y Jesusmi nirgan: ‘nogatarämi gatirämänayqui’ (Mat. 19:16-21). Nircurpis, mana creicoj judiucunata Jesús cayno nirgan: “Uyshäkunami [...] qatiräman. Noqapis paykunata reqïmi. Mana ushakaq kawaytami paykunata qoykushaq” (Juan 10:24-29). Carguyoj Nicodemo jutiyoj runapis Jesuswan tincurir ‘yachachiycalämay’ nirgan. Jesusga nirgan yaracuptinga mana ushacaj cawayta tarinanpaj (Juan 3:16). Yaracuyninchiga jatunyanga y sinchiyanga Jesús cawacushganno cawacurmi, chayta rurarga Jesús aywashgalanpa aywaycäshun y chayga mana ushacaj cawayta tarinapaj cajmanmi chayachimäshun (Mat. 7:14).

10. ¿Imatataj rurashwan Jesusta shumaj reguinapäga? (Juan 17:3).

¹⁰ Jesús cawacushgannola cawacunapäga paytarämi shumaj reguinanchi (leiriy Juan 17:3). Jesusta shumaj reguinapäga calpachacunanchirämi pay imano cashganpita yachacur y imata cuyanganta, imata chiquinganta yachacurpis. Ichanga achca watapana Diosta sirviycanchi, ichanga chaylaraj bautizacushcanchi, imano captinpis Jehovata  y wamran Jesusta shumaj reguinapäga calpachacuycashwanmi.

11. ¿Imanotaj yanapämanchi Bibliacho caycaj chusco librucuna Jesusta shumaj reguinapaj?

¹¹ Jehovaga alapa cuyapämashpanchimi Palabrancho guelgachimushga Jesuspita wilacamoj chusco librucunata. Cay librucunachomi yachacunchi Jesús imano cawashganpita, waquincunata imano yachachicushganpita y shonguncho waquincunapa nanachicushgantapis. Cutin cutin leiparga yanapämäshunmi Jesús imano cawacushgannola cawacunapaj (Heb. 12:3). Awmi, Jesuspa yupilanpa aywanapäga shumajrämi yachacunanchi cay chusco librucunapita.

12. Jesuspita parlaj librucunata leirga, ¿imanotaj leishwan?

¹² Chay librucunaga caycan Mateo, Marcos, Lucas y Juan. Y manami janan jananlaga leipärishwanchu, shumaj yarpachacurcur yarpachacurcur cutin cutinpis leipärishwanmi (Josué 1:8 textuwan tincuchiy). Mä imano cananpaj gatejnin cajcho yachacurishun.

13. Jesuspita parlaj librucunata leiycarga, ¿imacunatarätaj rurashwan?

¹³ Juc caj, Jesuspita yachacuycarga paywan caycashganchino ricacushun. ¿Maypata Jesús aywaycan?, noganchipis chaycho caycajno ricacushun; ¿pïcunawantaj Jesús caycan?, paycuna rurincho noganchipis caycajno ricacushun. Chaypäga yanapämäshun charashganchi achca publicaciuncunami. Jesuspita yachacuycar quiquin Bibliata leirga, öraga alimi canga waquin versiculucunatapis leiparcuptinchi, guepaman cutircuptinchi o nawparcuptinchipis. Y mana chaylachu, jina tapucushwanmi “¿pïcunataj chay tiempucho cawaycargan?, ¿maychotaj chay marcacuna caycargan?” nir. Jinamanpis ali canga chay chusco librucunata maygan maygantapis shumaj ricapacuriptinchi, imataj niycan jucnin caj, imata wilacuycan jucnin caj.

14, 15. ¿Imacunatataj rurashwan Jesuspita parlaj chusco librucunata leirga?

 ¹⁴ Ishcay caj, leishganchiga cawayninchichomi yanapämashwan (Juan 13:17). Jesuspa cawayninpita parlaj maygan librulatapis leirga cayno tapucushwan: “¿Imatataj caypita yachacö? ¿Imanotaj caypita waquincunata parlapäman?”. Jesuspita yachacuycarga pilamanpis yarpachacuycashwanna, imano payta cushi cushila y cuyacuylawan leishganchita wilapänapaj.

¹⁵ Lapan nishganchinola canan rurashun, chaypäga templucho Jesús ricashgan waccha viudapita parlarishun.

16. Marcos 12:41 texto imapita parlashganta wilacaramuy.

¹⁶ Leiycaptinchi chaycho cashganchino ricacushun (leiriy Marcos 12:41). Mä imanoshi canman. 33 wata, 11 de nisán junaj caycan. Juc ishcay junajcunalanami pishiycan Jesús wanunanpaj, y chay junajga templuchomi payga caycargan. Pushacoj religiusucuna y waquin runacunapis pruebacunata churar y imayca tapucuycunata rurar carcaycargan (Mar. 11:27-33; 12:13-34). Chaychomi Jesús más wacladunman aywaycur runacuna ofrendancunata winarcaycajta ricargan. Jamashgalami ricaraycan imano ricucuna y wacchacuna guellayninta apapäcushganta. Runacuna guellayninta garpuptinga “chin” “chin” nirchi mayacan; Jesuspis chaytaga wiyaycanchi.

17. ¿Imatataj rurashga waccha viuda Marcos 12:42 texto nishganno?

¹⁷ (Leiriy Marcos 12:42). Chaypitana Jesusga juc waccha warmita ricarcun (Luc. 21:2). Imaycanlapis canchu cay warmipäga, micunanlapäpis imaycatarächi ruran. Chayno captinpis ofrenda winacuna sitiuman yachaylapa aywaycur ishcay ichic monedalanta jorgurcur chayman garpurin. Garpushgantaga manachi pipis wiyashgapischu. Jesús ichanga musyarganmi ishcay centavulata winashganta. Chay centavucunaga manami aypajchu ni juc barato pishgulatapis rantinapaj.

18. ¿Ima nirgantaj Jesús juc waccha viuda ima rurashganpita Marcos 12:43, 44 texto wilacushganno?

¹⁸ (Leiriy Marcos 12:43, 44). Jesusga cushicurcunmi ima pasashganta ricar, chaymi gatejnincunata gayaramur cayno nin: “Kay waktsa viüdaqa lapan runakunapita mas atskatami winashqa”. Nircur Jesús caytapis nirgan: “Wakinkunaqa putsuq qellaynilantami winashqa. Kay viüdami itsanqa tsaylawan rantipakunanpaq kaykaptinpis lapan qellayninta winashqa”. Chay lapanta rurarga Jehovamanmi yaracuycargan cay waccha viudaga, ‘guellaynë ushacaptinpis Jehovami cuidamanga’ nirchi caycargan (Sal. 26:3).

19. ¿Imatataj yachacunchi Jesús wilacushgan waccha viuda ima rurashganpita?

¹⁹ Imata yachacunchi, chaynola cawacushun. Jucninchi jucninchi cayno tapucushwan: “¿Imatataj yachacö waccha viuda imata rurashganpita?”. Maslata yarparcushun cay viudaman. Guellaynincush más achcala canman cargan, lapantachi Jehovata goycunman cargan. Imano captinpis pachalanpaj charashgantapis lapanta goycurgan. Shumaj, shumaj caypitaga yachacurinchi. Jehovaga noganchiwan imaypis cushishga caycanga lapan cawayninchiwan payta sirviptinchi y shongunpäno imatapis ruraptinchi (Mat. 22:37; Col. 3:23). Waran waran calpachacuycanchi paylata aduranapaj, paypita yachachicunapaj y reuniunmanpis  aywanapaj. Cay lapanpitapis mayraj Taytalanchi Jehová cushicun.

20. ¿Imata rurartaj cawayninchicunacho yanapämäshun waccha viudapita yachacushganchi?

²⁰ Jesús wilacushgan waccha viudapita leirga, ¿imanotaj yanapämashwan cawayninchicunacho? Waquincunapaj yarpachacuptinchipis alimi canman, ichanga paycunata nirishwan: “Diosta sirvir ichiclata ruraptiquipis payga cushishgami caycan gamwan”. Waquincunaga chachayashgana, Diospäga alapa rurannachu; waquincunaga gueshyarcaycan y reuniunmanpis aywannachu. Lapan paycunata nishwan: “Wawguilä, panilä, ichicla rurashgayquitapis Jehovaga manami gongangachu” (Efes. 4:29). Chay hora paycunata waccha viudapita wilapashgaga cushircachinmanmi. Paycunapis cuentata gocunga Diospa shongunpäno walcalatapis rurarga, payga manami chayta imaypis gongangachu (Prov. 15:23; 1 Tes. 5:11). O waquincunata ‘alita ruraycanqui, Diospa shongunpäno ruraycanqui’ nirga Jesús rurashgantami ruraycanchi.

21. ¿Imata ruranayquipätaj calpachacunquiman?

²¹ Alapami cushicunchi chay chusco librucuna Jesuspita imaycata wilapämaptinchi, yanapämanchi pay cawacushgannola cawanapaj. Familianchiwan juntacarcur o japalanchi estudiarpis alichi canman chay chusco librucunapita yachacuptinchi. Shumaj yachacunapäga leishganchicho ima pasashgantami shumaj ricapärishwan, y cawayninchicho imano yanapämänanchipäpis yarpachacushwanmi. Jinamanpis Jesús ima ayca rurashganta ruranapaj calpachacurpis, ima nishganta wiyacuypis alapa alimi. Gatejnin caj yachachicuycho tantiarcushun imatataj Jesús nirgan wanunanpäna caycar guerucho warcuraycaptin.