1. ¿Pitaj shimiyojta camaycalämashcanchi?

 JEHOVAGA cuyamashpanchi shimiyojtami camamashcanchi. Chaychi Adanpis mayraj Taytan Jehovawan parlapacurgan camashga cashgan wichan. Tiempo pasaptenga más palabracunatarächi yachacurgan; uywacunatapis jucnin jucnintachi jutinta churapargan (Gén. 2:19). Y warmin camashga captin y paywan parlayta galaycuptenga masrächi cushicuycurgan (Gén. 2:22, 23).

2. ¿Unaypis canan wichanpis ali shimilanwancu runacuna parlamun?

² Alilata parlanapaj Dios camamashganchi captinpis Satanasga mana alita parlar Evata lulapargan, lapan runacunata juchaman y wanuyman apargan (Gén. 3:1-4). Adanpis lutanta parlar galaycurgan juchalacushganpita Evatawan Jehovata culpar (Gén. 3:12). ¿Y pitaj Jehovata lulapargan wauguinta wanurcachir? Payga cargan Caín (Gén. 4:9). Tiempuwan Cainpa miraynin Lamec jutiyoj runapis guelgamurgan runacuna mana alicunata rurar cawashganta (Gén. 4:23, 24). Chaynolami canan wichanpis ¿manacu politicocunapis jacu shimi cashpan lutancunata parlapäcun? Aumi. Peliculacunata ricarpis lisuracunalami wiyacan, y chaynola escuelacunachopis y mana testigo cajcunawan arushganchi trabajunchichopis. Laquicuypämi cayno pasashganga.

3. ¿Waquincunanopis öraga imatataj rurashwan, y imapitataj canan yachacushun?

³ Mana ali palabracunalata waran waran wiyaycarga pajta noganchicunapis chayno parlar galaycushwan. Cristianucunaga imaycatami ruranchi mana alicajcunata mana parlanapaj, ichanga alapa calpachacunchi Jehovata alabanapaj  parlarga alicajcunalatami parlanchi. ¿Imanotaj alicajcunalata parlashwan predicaciuncho caycar, reuniunninchicho caycar y piwanpis parlapacuycar? Canan chaypita yachacushun. Naupata ricärishun parlaycashganchita Jehová wiyaycanchuraj o mana.

4. Malaquías 3:16 nishganno, ¿imanirtaj parlashganchita Jehová wiyaycan?

⁴ (Leiriy Malaquías 3:16). ¿Imanirtaj Jehová libruncho guelgan alicajcunalata parlajcunapa jutinta, payta manchapajcunata y jutinta respetajcunapa? Porque imano shongu runa cashganchipitami parlanchi. Jesús nergan: “Runaqa shonqun yarpashqantami alitapis o mana alitapis parlan” (Mat. 12:34). Chauraga parlashganchichomi ricacämunga Jehovata cuyashganchita o mana. Y musyanchina, Diosga munan payta cuyajcuna mushoj Pachacho imaycamapis cawapäcunanpaj.

5. 1) ¿Imanotaj tincun imano parlashganchi, Jehovata adurashganchiwan? 2) Fotucunacho ricacämushganno, ¿imacunapita parlacushwanchu Jehovata cushichinapaj?

⁵ Imata y imano parlashganchipitami canga aduraciunninchita Jehová chasquinanpaj o mana (Sant. 1:26). Diosta mana sirvej runacunaga orgulloso cashpan, ashlinacuyparaj imaycacunata parlapäcun (2 Tim. 3:1-5). Paycunano canapäga yarpaylapis yarpashwanchu. Parlashganchita wiyarga Taytalanchi Jehovaga cushicunmanmi. Pero ¿imaraj canman reuniunlacho y predicaciunlacho caycar ali shimilanchiwan parlar, pero wasinchicho caycarga pitapis gayapayparaj parlaptinchi? (1 Ped. 3:7).

6. ¿Imataj pasargan Kimberly paninchi ali shimilanwan parlacaramushganpita?

⁶ Ali cajcunalata imaypis parlarga pipis cuentata gocunga Diospa sirvejnin cashganchita (Mal. 3:18). Aumi, cawayninchichomi ricacämunga parlayninchiwanpis Diosta adurashganchi. Kimberly jutiyoj  paninchipita parlarcushun. b Estudiaj masinwan juc cuticho trabajuta ruraycarshi, compañeran cuentata gocurgan Kimberly paninchega waquin chinacunano mana cashganta. Pipa wajtanchoga manash imatapis parlajchu y cuyapaylapash pitapis parlapaj. Chayno cashganraycurshi compañeranga tiempuwan Bibliata estudiar galaycurgan. ¡Mayraj Jehová cushicun imano parlashganchiraycur pipis rasunpa caj caminuman shacamuptin!

7. ¿Imatataj masga munanchi parlashganchi hora?

⁷ Imapitapis masga munanchi, alilata parlar Jehovata alabanapämi y chayraycur hermanunchicunawanpis cushi cushila cawacuyta. Chaymi cananga yachacushun imanotaj alicunalata parlaj runa cashwan.

8. ¿Predicaciuncho caycarga imanotaj Jesusnola parlanapaj calpachacushwan?

⁸ Ashlipäshuptiquipis cuyapaylapa parlapay. Cay Pachacho Jesús caycaptenga paypita runacuna nipäcoj “micullar upyallar puricun” nir ashlipargan. Diablupa munayninta rurashganta nipäcoj, sabaduta mana respetashganta y Diospa contrancho parlashgantapis (Mat. 11:19; 26:65; Luc. 11:15; Juan 9:16). Chiquejnincuna chayno parlaptinpis Jesusga upalacojmi. Noganchitapis waquincuna gayapayparaj parlapämaptinchega Jesusnolami cuyapaylapa parlapashwan (1 Ped. 2:21-23). Y alilata parlanapäga öraga calpachacunanchirämi, manami facilchu (Sant. 3:2). Pero ¿imataj yanapämäshun?

9. ¿Imata rurartaj pitapis predicaciuncho ali shimilanchiwan parlapäshun?

⁹ Predicaciuncho pipis ofendishuptiquega nishushgayquiraycurga ama piñacuychu. Sam jutiyoj wauguilanchi cayno nin: “Masga yarpachacö rasunpa cajta yachacunanpaj y paypis cambiuta rurananpa cajta”. Öraga runacunapis piñacärin imacunapäpis pasaycashgan hora puncunta tacaptinchimi. Predicaciuncho piñashgala caycaj runawan tincurga, Lucia hermananchi rurashganno rurashwan: payga Jehovatash mañacun mana ofendiylapa y ali shimilapa pitapis parlapänanpaj.

10. 1 Timoteo 4:13 wilacushganno, ¿imata ruranapätaj masraj calpachacushwan?

¹⁰ Ali yachachicoj canayquipaj calpachacuy. Timoteuga ali yachachicojmi cargan, chayno captinpis calpachacojmi más aliraj yachachicunanpaj (leiriy 1 Timoteo 4:13). ¿Noganchipis imata rurartaj más ali yachachicoj cashun? Alimi preparacunanchi.  Chaypaga caycan Seamos mejores lectores y maestros nishgan folleto y “Ali yachachicoj cashun” nishgan partipis, chayga caycan Imano yachacunapaj nishgan publicaciuncho. ¿Shumajcu yachacuycanqui cay publicaciuncunapita? Chayno captenga valurcharcurmi y mana manchacurmi waquincunata Bibliapita yachachinqui.

11. ¿Imatataj waquin hermanunchicuna rurashga más ali yachachicoj cananpaj?

¹¹ Jina más ali yachachicojpis cashun congregaciuncho waquin hermanucunapitapis yachacurmi. Naga parlashganchi Sam wauguinchega, ricaycanshi waquin hermanucuna imano yachachicärishganta. Riccha ricchalash caycan paycunanola ali yachachicoj cananpaj. Talía jutiyoj paninchipis yachacushgashi congregaciuncho discursantecunapita, chaynopa predicaciuncho runacunawan caycar ali tantiaycur parlapänanpaj.

12. ¿Waquincunapäga imataj sasa ticracurin?

¹² Reuniunchoga lapanchicunami shacyächinacushwan cushi cushila cantar y comentanapaj ali preparacur (Sal. 22:22). Waquincunapäga sasami ticracurin cantananpaj y comentananpaj. ¿Gamtapis chaycu pasashunqui? Chayno captenga yanapäshunquimi waquincuna ima rurashganpita yachacur.

13. ¿Imata yanapäshunquiman reuniuncunacho cushi cushila cantanayquipaj?

¹³ Valurcharcur cantay. Ama gongashunchu, cushi cushila cantarga Taytalanchi Jehovatami alabaycanchi. Sara jutiyoj paninchipita parlarcushun. Payga ninshi ‘alino mana cantaptëpis cantarcömi Jehovata alabanäpaj’. Reuniuncunapaj preparacurpis canciuncunataga practicapanräshi. Tapucunshi ‘¿imanotaj cay canción tincun canan yachacunäpaj temacunawan?’ nir. Paymi nin: “Cay lapanmi yanapäman imano pashtaycächishgaläman mana yarparänapaj sinoga imata yachacuycashgäman”.

14. Manchacurpis, ¿imataj yanapäshunquiman reuniuncunacho comentamunayquipaj?

¹⁴ Cadala comentanayquipaj calpachacuy. Waquincunapäga sasami maquincunata jogarcunanpaj. Naga parlashganchi Talía cayno nin: “Comentanapaj alino ricacuptëpis waquincunapa naupancho comentaptëga sicsicyächimanrämi. Chauraga comentanäpäga sasami nogapaj”. Chayno captinpis alishi comentarcamun. Reuniuncunapaj preparacurga calpachacunshi respuestancuna walcala y ali claro cananpaj. Chaymi payga  cayno nin: “Reuniuncunata pushajcunaga munanmi respuestanchicuna ichic ichicla y sencillula cananta”.

15. ¿Ima nishwantaj reuniuncunacho comentamunapaj cajpita?

¹⁵ Öraga waquin hermanucunana nipäcun ‘mana manchacuptëpis, comentaytaga puedëchu’. Chaypaj parlar Juliet cristiana cayno nin: “Öraga pengacömi comentayta, ‘respuestäcunaga mana alinochi caycan’ nëmi”. Gampis chaynola pasarga, ama gongaychu, Jehovaga valuranmi calpachacushgayquita ricar. c Jehovaga cushishgalami ricacun manchacuycarpis payta alabanapaj calpachacuptinchi.

16. ¿Imano mana parlanapätaj calpachacushwan?

¹⁶ Pitapis ‘ashllypar’ parlapaychu (Efes. 4:31). Musyanchina, juc cristianuga manami lisuracunata parlanmanchu. Pero mana chaylachu, pajta waquincunawan parlaycashganchi hora shongunta nanaycächishwan. Imaraj canman waquin marcacunapa washancunata parlacachaycarga, chayga mana alichi canman. Chaymi cuidacushwan pitapis mana ofendinapaj. Juc waugue cayno nin: “Öraga parlaycashgächo bromalatachi ruraycä nir yarpachacoj cä, pero cuentata gocurgächu niycashgäwanga waquincunapa shongunta nanaycächishgäta. Tiempuwanga calpachacurgämi ali yarpachacur-raj parlanapaj, warmilämi nimaj ‘cayno parlaycashgayquiwanga pitapis ofendinquimi’ nir”.

17. Efesios 4:29 wilacushganno, ¿imanotaj waquincunata shacyächishwan y shongunta cushircachishwan?

¹⁷ Alicunalata parlay pipa shonguntapis cushircachinayquipaj. Pipa washantapis parlanapaj trucanga ‘alitami rurashcanqui’ nir parlapay (leiriy Efesios 4:29). Israelitacunano caytaga manami munanchichu. Paycunaga Diosta agradecicärinanpaj trucanga quejacuycarlashi puripäcoj. Chunca ricapacamojcuna mana ali wilacuywan cutipäcamuptenga, israelitacunaga Moisespa contrancho parlarshi galaycärergan (Núm. 13:31–14:4). Alicunalata parlarga, waquincunataga cushircachinchimi. Chaypa pasargan Jefté jipash wamranwan. Paytash amigancuna shacyächiylapa parlapaj y chayga yanapargan cushi cushila Diosta sirvir siguinanpaj (Juec. 11:40). Naga parlashganchi Sara pani caytapis ninmi: “Waquincunata shacyächiylapa  parlaparga Jehová cuyashgantami ricaycächinchi y Quiquin marcanman apacamushgantapis ricaycächinchimi”. Chauraga ali canga waquincunata shacyächiylapa parlapaptinchega.

18. Salmo 15:1, 2 texto nishganno, ¿imanirtaj imaypis rasun cajlata parlashwan, y imanotaj chayta rurashwan?

¹⁸ Rasunpa cajlata parlay. Lulacuycarga Jehovatami laquichishun, payga manami chasquimäshunchu lulapänacur caycarga (Prov. 6:16, 17). Lulapänacärishgantaga alitanomi runacuna ricapäcun, ichanga noganchega Jehová mandamashganchicunatami casucunchi (leiriy Salmo 15:1, 2). Pero mana lulacuycarpis cuidacushwanmi parlashganchi hora imacunapis rasunpa cashganta mana pacaycunapaj.

19. ¿Imacunapita mastaj cuidacushwan?

¹⁹ Waquincunapa vidanpita wilapacur caycanquimanchu (Prov. 25:23; 2 Tes. 3:11). Naga parlashganchi Juliet panitaga, laquichinshi pipis vidanpita parlashganta wiyaptin. Paymi nin: “Waquincunapa vidanpita parlajcunamanga mananami yäracönachu, capaz ‘imatapis wajtächo parlarinman’ nir yarpachacö”. Waquincunawan parlaycashganchi hora pipis jucpa washanta parlar galaycuptega, chay horaga imatapis rurashwanchi chaycunata mana wiyanapaj (Col. 4:6).

20. ¿Imata ruranayquipätaj alapa calpachacunquiman?

²⁰ Cay munducho achca runacunami calpachacärinchu ali cajcunalata parlapäcunanpaj. Pero noganchega calpachacunchi ali shimilanchiwan parlanapaj. Ama gongashunchu, Jehovami camamashcanchi shimiyojta y payga wiyaycanmi ima nishganchicunatapis. Calpachacushwanmi Jehovata alabanapaj predicaciuncho caycar, reuniunninchicunacho y waquincunawan parlaycar, payga bendicimäshunmi. Mushoj Pachachona caycarga pï maypis ali cajcunalatami parlapäcunga y más fácil-lana canga ima nishganchiwanpis Jehovata alabanapaj (Jud. 15). Chay tiempo shamushgancamaga cayno Biblia nishganta umachicurcushun: “Shimï rimashqankunapis […] munashqaykino kaykulätsun, TAYTA DIOS” (Sal. 19:14).