1, 2. Mushoj Pacha chayamunancama, ¿imatataj ruraycashwan?

 JEHOVAGA aunimashcanchi cay fiyu mundo ushacaptin cuyaylapaj Pachacho cawacunapaj, y chaypita alapa agradecido caycanchi (2 Ped. 3:13). Chay mushoj mundo imay chayamunanpaj cajta mana musyarpis, canan wichan lapan ricashganchicunaga tantiachimanchi ichiclana pishiycashganta chay cumplicunanpaj (Mat. 24:32-34, 36; Hech. 1:7).

² Lapanchimi Jehová aunimashganchiman masraj yäracunapaj yäracuyninchita sinchiyächishwan, chayga canman achca watapana o chaylaraj Testigo captinchipis. Yäracuyninchi fuerte caycaptinpis öraga ichic ichiclapa ushacäcunmanmi. Chaymi apóstol Pabluga nergan Jehová Diosninchiman mana yäracushgaga sasami canga “chapa chrurapämagninchita y juchäcachimagninchita” juc laduman churanapaj (Heb. 12:1). Chayno mana cananpäga yäracuyninchita sinchiyächishun seguro caycänapaj Jehová mushoj Pachata apamunanpaj cajta (Heb. 11:1).

3. ¿Imacunapitataj cay yachacuycho yachacushun?

³ Cay yachacuycho ricärishun quimsa yachachicuycunata, chayga yanapämäshun yäracuyninchita sinchiyächinapaj mushoj Pacha rasunpa cashganman, chaypäga: 1) Jesuspa wanuyninman yarpachacushun, 2) Jehovapa poderninman yarparcushun y 3) espiritual caj ruraycunawan ocupado caycashwan. Jina ricashun Habacucta Jehová nishganga imano yäracuyninchita sinchiyächin. Naupataga parlarcushun imanirtaj lapan shongunchiwan yäracushwan Jehová mushoj munduta apamunanpaj cajta.

 IMANIRTAJ YÄRACUYNINCHI SINCHI CANMAN

4. ¿Imacunachotaj ricacämun yäracuyninchi fuerte caycashganta?

⁴ Waran waran decidishganchicunacho ricacan yäracuyninchi imano cashganta. Öraga acrashwan pïcuna amigunchi cananpaj, imawan puclanapaj, imataj estudianapaj, piwan casaracunapaj, wamracunata imano yanapacunapaj o aruy asuntupitapis. Cayno tapucushwan: “¿Imatataj ricacämun decidishgäcunacho? ¿Decidishgäcunawan ricächicöchu cay mundo ushacänanpaj ichiclana pishiycashganta yäracushgäta? ¿O cay munducho runacunano shongü munashgalanta rurar cawacö?” (Mat. 6:19, 20; Luc. 12:16-21). Mushoj Pacha caylachona caycashganta lapan shongunchiwan yäracuptinchega, calpachacushunmi alicunata ruranapaj.

5, 6. ¿Imanirtaj yäracuyninchi sinchi caycanman pruebacunapa pasaptinchi? Tantiachicamuy.

⁵ Jina pruebacunapa pasarpis, yäracuyninchi sinchi caycanman aguantanapaj. Öraga creencianchiraycur chiquishga o gaticachashga cashwan, fiyupa gueshyaycushwan o ima sasacunapa pasarpis guelanäcushwanmi. Galananlacho chay lapanta aguantarpis, imapa pasaycashganchi jucla mana ushacaptenga necesitashunraj yäracuyninchi sinchi caycänanpaj guepaman mana cutiycur cushi cushila Jehovata sirvir caycänapaj (Rom. 12:12; 1 Ped. 1:6, 7).

⁶ Ima pruebacunapa pasarga öraga yarpashwanchi Jehová mushoj Pachata mana apamunanpaj cajta. Chayno yarparga, ¿nishwanchuraj yäracuyninchi pishiycämashganchita? Manami. Achca semanacuna pasaypa tamyala captenga, öraga yarpashwanchi inti mana yargunanpaj. Ichanga usya wichanga imaylapis chayamungami. Chaynolami pasaypa guelanashga caycarga ‘imayraj mushoj Pachaga chayamunga’ nir yarpashwanchi. Ichanga yäracuyninchi sinchi caycaptenga musyanchimi Jehová aunishganta rasunpa cumplinanpaj (Sal. 94:3, 14, 15; Heb. 6:17-19). Chayga yanapämäshun imapitapis masga Jehovata adurar caycänapaj.

7. ¿Imapitataj cuidacunanchi?

⁷ Runacunata yachachicunapäpis yäracuyninchi sinchi caycanman. Diosninchi mushoj Pachata apamunanpaj cajpita parlaptinchega, runacunaga nipäcun ‘chaycuna ali wilacuycuna captinpis rasunpäga quevä cumplicanga’ (Mat. 24:14; Ezeq. 33:32). Ichanga cuidacunanchi paycunano mana yarpapäcunapaj, chaypa trucanga yäracuyninchita cada cadala masraj sinchiyächishwan. Quimsalata ricärishun imano chayta ruranapaj.

JESUSPA WANUYNINMAN YARPACHACUSHUN

8, 9. ¿Imanotaj yanapämanchi Jesuspa wanuyninman yarpachacuptinchi?

⁸ Yäracuyninchitaga sinchiyächinchi Jesuspa wanuyninman yarpachacuptinchi. Paypa wanuyninwan Jehová aunimashganchicunata cumplenga. Chaymi alapa ali caycan tiempunchita jorgunapaj Jesuspa wanuyninman yarpachacunapaj y imanir Jehová Wamranta cachamushgantapis. Chayta rurarga masraj yäracushun Jehová mushoj Pachata rasunpa apamunanpaj y chaycho imaycamapis cawacunapaj. ¿Imanirtaj chayta ninchi?

⁹ Yarpachacushun Jesús imacunapa pasashganta wanunanpaj. Jehovaga jaguirergan cuyashga japalan Wamran y más ali amigun cay Pachacho juchaynaj runano yurinanpaj. Jesús Pachacho caycar chiquishga, ashlishga cargan, jina imayca mana alicunapa pasargan y laquicuypämi imano wanushga cargan. Jehovaga alapachi laquicurgan Wamran chay jinanpa pasashganta  ricar. Cuyacoj Taytaga manami jaguinmanchu cargan Wamran chaycunapa pasananpaj, ichanga noganchita cuyamashpanchi chayta rurargan, shamoj tiempucho ali cawayta tarichimänanchipaj (Juan 3:16; 1 Ped. 1:18, 19). Chaymi seguro caycanchi mushoj Pachacho chay cawayga manami ratulapächu canga, sinoga imaycamapis.

YARPACHACUSHUN JEHOVÁ PODERYOJ CASHGANMAN

10. Efesios 3:20 texto nishganno, ¿imataj Jehová munayniyoj caycan rurananpaj?

¹⁰ Jehová alapa poderyoj cashganman yarpachacuptinchipis yäracuyninchita sinchiyächinchi. Pay poderyoj captinmi lapan aunishgancunata cumplin. Runacunaga nipäcun “quevä imaycamapis cawashunpaj juc mushoj Pachachoga”, sueñutanola ricapäcun. Ichanga Jehová aunishgancuna noganchi ruranapaj sasa captinpis, pay Lapanta Puedej cashpan munashgancunata ruran (Job 42:2; Mar. 10:27). Chauraga, ¿manachuraj yäracushwan Jehová aunicushgancunaman? (Leiriy Efesios 3:20).

11. ¿Imacunata pasananpaj Jehová aunirgan? (“ Jehová aunishgancuna imano cumplicushgan” recuadrutapis ricay).

¹¹ Yarpachacushun unay sirvejnincunata Jehová aunishganman sasa captinpis imano cumplishganta. Abrahantawan Sarata aunirgan juc wamrata tarinanpaj, ishcancuna edayashgana captinpis (Gén. 17:15-17). Jina Abrahanta aunirgan miraynincuna Canaán marcacho tiyananpaj. Ichanga Abrahanpa miraynin israelitacunaga achca watacunapami Egiptucho esclavuno carcaycargan, chaychi israelitacuna yarpapäcurgan Jehová Abrahanta aunishgan rasunpa mana cumplicunanpaj. Ichanga Jehová aunishgantaga imaypis cumplinmi. Achca watacuna pasariptinna Jehová Elisabet-ta nergan juc wamrata tarinanpaj edayashgana caycaptinpis. Mariatapis aunirgan Wamranta gueshyapacunanpaj. Chaynopa cumplicunan cargan Edén huertacho achca guepa watacunacho aunishganta (Gén. 3:15).

12. ¿Imataj tantiachimanchi Josué 23:14 y Isaías 55:10, 11 textucuna Jehovapa poderninpita?

¹² Jehová poderyoj cashganta ricanchi lapan aunishgancunata imano cumplishganpita yachacur. Chayga yanapämanchi masraj yäracunapaj rasunpa mushoj Pachata apamunanpaj cajta (leiriy Josué 23:14; Isaías 55:10, 11). Chaypitapis listo caycashwan waquincunata tantiachinanchipaj mushoj Pachacho cawayta shuyarashganchega manami juc sueñulacho cashganta. Chaymi mushoj cielupita y mushoj pachapita parlar, Jehová cayno nergan: “Ningäcunaga rasuncagmi y yäracuypämi” (Apoc. 21:1, 5).

JEHOVAPA VOLUNTÄNIN RURAR CAYCASHWAN

13. ¿Imanotaj reuniuncunaga yäracuyninchita sinchiyächin?

¹³ ¿Ima mastataj rurashwan yäracuyninchita sinchiyächinapaj? Jehovata cushichinapaj ruraycunata rurashwan. Yarparcushun reuniunninchicuna imano yanapämanchi. Paninchi Anna, b achca watacunapa tucuynopa Jehovata sirvishganpita cayno wilacun: “Reuniuncunaga ancla japuyno yäracuynë mana ushacänanpaj yanapäman. Discursamoj turi ali yachachicoj mana captinpis o ima mushoj cajcunata mana wilacuptinpis, imaypis wiyayculämi más tantianapaj Biblia wilacushganta, y chayga yanapäman yäracuynë masraj jatunyänanpaj”. Jina reuniuncunacho waquincuna comentashgancunapis yäracuyninchita sinchiyächin (Rom. 1:11, 12; 10:17).

14. ¿Imanotaj runacunata yachachicur yäracuyninchita sinchiyächinchi?

¹⁴ Runacunatapis yachachiptinchi yäracuyninchita masraj sinchiyaycächinchi (Heb. 10:23). Panilanchi Barbaraga 70 watapitapis masna Testigo caycan, cayno nin: “Runacunata yachachiptë yäracuynë imaypis sinchiyächin. Cuentata gocö Jehovapita y aunicuynincunapitapis waquincunata parlapaptëga yäracuynë más jatunyaycashganta”.

15. ¿Imanotaj yäracuyninchita sinchiyächinchi japalanchi Bibliata estudiaptinchi? (Dibujucunatapis ricay).

¹⁵ Ricärishun ima mastataj yäracuyninchita sinchiyächin, chayga caycan: japalanchi Bibliata estudiaptinchi. Susan paninchega tiempunta raquergan chayta rurananpaj. Pay cayno wilacun: “Domingo junajcunaga gatejnin semanacho Wilacamoj revistapita yachacö. Lunes y martes junajcunaga preparacö pulan semanacho imapita yachacunäpaj. Y waquin junajcunachoga yanapämaj temacunata acraycö yachacunäpaj”. Chayta cada cadala ruraptinshi cuentata gocurgan yäracuynin más jatun caycashganta. Irene paninchipana yäracuyninshi masraj sinchiyargan profeciacunapita yachacuptin. Payga wilacun: “Alapa almiracuypaj caycan imano Jehová lapan aunishgancuna jucnin jucninpis cumplicuycashganta ricaptinchi”. c

“IMANO CARPIS CUM[P]LENGAPÄMI”

16. ¿Imanirtaj Jehová Habacucta nishganga noganchitapis yanapämanchi? (Hebreos 10:36, 37).

¹⁶ Waquin Jehovapa sirvejnincuna achca watacunapa shuyarpaycan cay mundupa ushacaynin chayamunanpaj. Chaymi waquincunaga ‘chay junajga mayna chayamunmanmi cargan’ nir yarpapäcunman, ichanga Jehovaga musyanmi sirvejnincuna imano ricacushganta. Chaymi profetan Habacucta nergan: “Cananga manami chayamunrächu öra chay ricaycashayquicuna cumlinanpäga.  Ichanga imano carpis cumlengapämi. Gamga ayca wata päsaptinpis shuyaray. Chaycunaga päsanga imaypis päsananpaj caj junajchömi” (Hab. 2:3). ¿Jehová nishganga Habacuclapächuraj cargan o noganchicunatapis yanapämanchi? Canan wichanpis Jehová nishganga cristianucunata yanapacunmi, noganchipis shuyaraycanchi mushoj Pacha chayamunanpaj (leiriy Hebreos 10:36, 37). Chayta jucla cumplicushganta manaraj ricaycarpis, seguro caycashwan “imano carpis [Jehová] cumlengapämi”. Chayga “päsanga imaypis päsananpaj caj junajchömi”.

17. ¿Imanotaj juc cristiana Habacucta Jehová nishganta cäsucurgan?

¹⁷ Achca cristianucuna Jehová nishganta cäsucur achca watacuna pasariptinpis riccha ricchala caycargan. Paninchi Louise wilacushganta ricärishun, payga 1939 watacho Jehovata sirvir galaycurgan. Payga nin: “Yarpaylapis yarpargächu 18 watayojman chayanäpaj, Armagedón jucla chayamunanpaj yarpargä. Ichanga chaynochu cargan. Cay lapan watacuna aguantanäpäga Noé, Abrahán, José y waquin Jehovapa sirvejnincunamanpis yarpachacoj cä, paycunaga pacienciacoj capäcurgan y Jehová aunishganta cumplinanpaj shuyarargan. Alcäbula caycashgäga nogata y waquincunatapis yanapämargan mushoj Pacha caylachona caycashganta yarpachacunäpaj”. Achcajmi Jehovata achca watapana sirvishpan chaynochi ricacurgan.

18. ¿Imanotaj Jehová camashgancuna yanapämanchi yäracunapaj mushoj Pacha rasunpa cananpaj?

¹⁸ Jehová aunishgan mushoj Pacha manaraj chayamuptinpis yarpachacushun goylarcunaman, yöracunaman, uywacunaman y runacunamanpis. Chaycuna imaypis mana cashga captinpis, pipis nieganmanchu rasunpa caycashganta. Canan yäracunchimi quiquin Jehová chaycunata camashganta (Gén. 1:1, 26, 27). Chaura juc mushoj Pachata gomänanchipaj aunimashganchi captenga yäracushwanmi aunishganta rasunpa cumplinanpaj. Chaychoga imaycamapis mana gueshyaypana cawacushun. Chay junaj chayamuptenga canan caycashgancunata rasunpa ricashganchino mushoj Pachapis rasunpami canga (Is. 65:17; Apoc. 21:3, 4).

19. ¿Imanotaj yäracuyninchita sinchiyächishwan?

¹⁹ Mushoj Pacha chayamunancama imaycanopapis calpachacushun yäracuyninchita sinchiyächinapaj. Chaypäga Jesuspa wanuyninman y Jehovapa poderninmanpis yarpachacushun, jina Jehovapa voluntäninta rurar caycäshun. Chay lapancunata rurarga “Tayta Diosninchiman yäracur pasensiacogcuna” chasquishganno, noganchipis Jehová aunimashganchita chasquishun (Heb. 6:11, 12; Rom. 5:5).