1. ¿Imataj musyanchi Jehovapa sirvejnincunaga?

 JEHOVAPA sirvejnincunaga musyanchimi Pay cuyamashganchita y noganchipaj yarpachacushgantapis (Rom. 8:35-39). Jina cuentatapis gocunchi Jehovapa mandamientuncunata cäsucuptinchega bienninchipämi cashganta (Is. 48:17, 18). Ichanga ¿imaraj canman imaylapis mana yarpashganchi problemacunapa pasaptinchi?

2. ¿Ima problemacunapataj öraga pasashwan, y chayraycur imacunaraj tapucushwan?

² Lapan Jehovapa sirvejnincunaga problemacunapami pasanchi. Öraga maygan castanchipis imalatapis ruraptin o niptin laquichimanchimi. O ima gueshyaraycurpis munashganchino Jehovata sirviyta puedinchichu. Jina fiyu desgraciacunaraycurpis nacanchimi, o creencianchicunaraycurpis chiquishga canchi. Chaycunapa pasarga, öraga caynochi tapucushwan: “¿Imanirtaj cayga nogata pasaycäman? ¿Imalachopis juchalicushgächuraj? ¿Jehová manana bendiciycämanchuraj?”. Gampis imaylapis chayno ricacushga carga, ama guelanäcuychu. Jehovapa waquin cäsucoj sirvejnincunapis chayno ricacushga (Sal. 22:1, 2; Hab. 1:2, 3).

3. ¿Imataj yachacunchi Salmo 34:19 textupita?

³ (Leiriy Salmo 34:19). Cay versiculuchoga ishcaycunapita parlaycämun: 1) cäsucoj runacunapäga imalapis caycanmi laquicunanpaj y 2) Jehová Diosmi imaypis yanapan. ¿Imanotaj Jehová yanapämanchi pruebacunapa pasaptinchi?  Payga tantiachimanchi cay caway vidacho chaycunapa pasanapaj. Jehovaga aunimanchi payta sirvir cushishga cawacunapaj. Ichanga cayga manami ninanchu cay tiempo cawayninchicho problemacuna mana cananpaj cajta (Is. 66:14). Payga munan shamoj tiempuman yarpachacunapaj, chay wichan ichanga cawayninchega cushicuypämi canga (2 Cor. 4:16-18). Chay junaj chayamunancama payga waran waran yanapaycalämanchi aguantanapaj (Lam. 3:22-24).

4. ¿Imacunataj cay yachacuycho ricashun?

⁴ Cay yachacuycho ricashun unay tiempucho y canan wichanpis Diosta cäsucoj sirvejnincunapita. Musyashganchinopis, öraga mana yarpashganchi problemacuna yurimunmanmi. Ichanga Jehovaman yäracuptinchega, pay imaypis yanapämäshunmi (Sal. 55:22). Diospa sirvejnincunapita jucnin jucninpita yachacur, cayno tapucuy: “¿Imataraj nogaga ruraycöman cargan chaypa pasarga? ¿Pay rurashganga imanotaj yanapäman Jehovaman masraj yäracunäpaj? ¿Imacunataj caypita yachacö?”.

5. ¿Imacunataj Labán Jacobta rurargan? (Garancho caycaj fotuta ricäriy).

⁵ Unay Jehovapa sirvejnincunapis öraga mana yarpashgan problemacunapa pasargan. Jacob imapa pasashganta yarparcushun. Taytanga nergan Diosta aduraj tiyun Labanpa juc wamranwan casaracunanpaj. Y nerganpis Jehová imayca bendiciuncunata gonanpaj (Gén. 28:1-4). Chaura Jacobga taytanta cäsucur Canaán marcapita yargurgan, y tiyun Labán caycashgan marcaman aywargan; wamrancuna cargan Lea y Raquel. Jacobga Raquelta cuyar galaycurgan, payga shulcajmi cargan. Chaymi paywan casacuyta munar Labanpa ganchis watacuna arunanpaj aunirgan (Gén. 29:18). Ichanga manami yarpashgannochu yargurgan. Labanga Jacobta engañaycur wamran Leata gorgan warmin cananpaj. Juc semana pasariptin jaguirergan Raquelwan casaracunanpaj, pero ganchis watacuna masraj Labanpaj arunan cargan (Gén. 29:25-27). Y mana chaylachu. Labanga achca cutimi parlashganno manami cumplirganchu, payga achca cutimi Jacobta aunishgan paguntapis manami cumplirganchu. ¡20 watacunano Jacobpita chayno aprovechacurgan! (Gén. 31:41, 42).

6. ¿Ima más problemacunapataj Jacob pasargan?

⁶ Jacobga más problemacunaparämi pasargan. Familianga jatunmi cargan, y wamrancunaga manami ali apanacärejchu. Joseta esclavuno ranticurgan. Jina ishcan wamrancuna Simeonwan Leví rurashganwan familianpa y taytanpa jutintapis ganratargan. Jinamanpis cuyashga warmin, ishcay caj wamranta gueshyapacuycaptin wanucurgan. Y marcancho muchuy captin, Jacobga edayashgana caycar Egiptuman aywargan tiyananpaj (Gén. 34:30; 35:16-19; 37:28; 45:9-11, 28).

7. ¿Imanirtaj ninchi Jehová Jacobta mana jaguirishganta?

⁷ Chay jinanpa pasaycarpis, Jacobga Jehovaman y promesancunamanpis yäracojmi. Y Jehovapis Jacobta tucuynopa bendecirgan. Labán cutin cutin engañaycaptinpis Jacobga Jehovapa bendiciunninwan imaycayoj runaman ticracurgan. Jina Jehovatapis alapa agradecicurganchi achca watacuna pasariptin wamran Josewan tincuriptin, payga yarpargan wanushga cashganta. Jehovawan ali amigo cashpanmi Jacobga imayca pruebacunatapis aguantargan (Gén. 30:43; 32:9, 10; 46:28-30). Noganchipis imayca problemacunata aguantashunmi payno Jehovawan ali amigo captinchi.

8. ¿Imatataj David rurayta munargan?

 ⁸ Rey Davidga Jehovata sirvishgancho lapan munashgancunata rurayta puedirganchu. Payga shongupitami munargan Diospaj juc templuta sharcachiyta. Y chayta profeta Natanta wilacuptin, payga nergan: “Imatapis ruray gam yarpashayquino ari. Gamtaga Tayta Diosmi yanapaycäshunqui” (1 Crón. 17:1, 2). Profeta Natán chayno nishganta wiyarga Davidga alapachi cushicurgan. Jina chayta imano rurananpaj jucla yarparpis galaycurganchi.

9. ¿Imanotaj David ricacurgan munashgancunata rurayta mana puedishganta musyar?

⁹ Ichanga Jehovapa profetanga mana ali wilacuycunawan cutirgan. Chay chacaylacho Jehová Natanta nergan David chay templuta mana sharcachinanpaj, sinoga wamran cananpaj (1 Crón. 17:3, 4, 11, 12). ¿Chayta wiyarga imanotaj David ricacurgan? Laquicunanpaj trucan guellayta y imaycatapis shuntayta galaycurgan wamran Salomón chay jatun rurayta rurananpaj (1 Crón. 29:1-5).

10. ¿Imanotaj Jehová Davidta bendecirgan?

¹⁰ Templuta mana sharcachinanpaj wilachishgana captin, Jehovaga Davidwan juc pactuta rurargan: Jehovaga aunirgan Davidpa juc miraynin imaycamapis gobernananpaj (2 Sam. 7:16). Mushoj Pachacho, Jesús Waranga Watacuna gobernamuptin Davidga alapachi cushicunga chay Rey miraynin cashganta musyar. Cayga yachachimanchi öraga Jehovata sirvishganchicho lapan munashganchicunata rurayta mana puediptinchipis, payga mana yarpashganchi bendiciuncunata gomänanchipaj puedinmi.

11. ¿Ima bendiciuncunataj unay cristianucunaga chasquergan Diospa Gobiernun chayamunanpaj shuyarpaycaptinpis mana cumplicuptin? (Hechos 6:7).

¹¹ Unay wichan cristianucunapis sasa pruebacunapa pasargan. Paycunaga shuyarpaycargan Diospa Gobiernun chayamunanpaj, ichanga musyapäcurganchu imaytaj cananpaj (Hech. 1:6, 7). Chauraga, ¿imataj rurapäcurgan? Diospita yachachicur carcaycargan. Diospa ali wilacuynincuna may chay marcacunaman chayaycashganta ricar, cuentata gocärergan Jehová bendeciycashganta lapan ruraycashgancunata (leiriy Hechos 6:7).

12. ¿Imatataj unay cristianucuna rurapäcurgan muchuy cashgan wichan?

¹² Punta caj cristianucuna wichan ‘fiyupami muchuy cashga intëru marcacunacho’ (Hech. 11:28). Y chayga cristianucunatapis pasaypa yarpachacärerganchi. Taytacunaga alapachi yarpachacurgan familianta imano manteninanpaj. Mozo jipashcunapis Diosta sirvishgancho mastaraj rurayta munarpis capaz yarpargan nircur-raj rurananpaj. Imano captinpis cristianucunaga laquicuycarla caycarganchu. Chaypa trucan puedishganmanno yachachicur carcaycargan y cushi cushila imalatapis apachicärej Judeacho caycaj cristianucunapaj (Hech. 11:29, 30).

13. ¿Muchuy captinpis ima bendiciuncunatataj cristianucuna chasquergan?

¹³ Sasa tiempucho cawaycarpis, ¿ima bendiciuncunatataj chay wichan cristianucuna chasquergan? Yanapacuyta chasquejcunaga ricarganchi imano Jehová paycunata cuidashganta (Mat. 6:31-33). Jina yanapacuycaj hermanucunatapis masraj cuyar galaycärerganchi. Chaypitapis aycalatapis o imalatapis goycojcuna o jucnopapis hermanuncunata yanapajcunaga alapami cushicärergan (Hech. 20:35). Jehová lapancunatami bendicergan jucnin jucninpis yanapanacärishganpita.

14. ¿Imacunapataj Bernabewan Pabluga pasargan, y chayga imanotaj waquincunata yanapargan? (Hechos 14:21, 22).

¹⁴ Punta caj cristianucuna öraga mana yarpashganpita chiquishga cargan. Ricärishun Bernabetawan apóstol Pabluta ima pasashganta  Listra marcacho Diospita yachachicuycaptin. Galananlachoga runacuna ali chasquicur shumaj wiyargan. Ichanga chay junajcho chiquicojcunaga runacunata shimita jatipargan, chaura Pabluta sagmargan y wanushgatano jaguirergan (Hech. 14:19). Pero Bernabewan Pabluga juc ciudämanna aywaycur jinala yachachicur galaycurgan. Chayraycur “achca runacuna Jesusman yäracuran” y ruraynincunawan y ima nishganwanpis cristiano masincunata shacyächergan (leiriy Hechos 14:21, 22). Bernabewan Pablo chiquishga captinpis manami yamacäcurganchu y chayga achca runacunatami yanapargan. Noganchipis mana yamacäcur Jehová mandamashganchita ruranapaj calpachacuptinchega achca bendiciuncunatami chasquishun.

15. ¿Imataj yachacunqui Alexander Macmillan hermanunchipita?

¹⁵ 1914 guepa watacuna wichan, Jehovapa sirvejnincuna shuyarpaycargan cieluman aywananpaj. Jucmi cargan hermanunchi Alexander Macmillan. Chay wichan waquincunano paypis yarpargan ichiclachona cieluman aywananpaj. 1914 wata, setiembre quillacho juc discurso goshgancho nergan: “Caymi capaz caycan último caj discursümi”. Ichanga chaynochu cargan. Tiempuwan cayno escribergan: “Waquinninchega capaz yarpachacushcanchi rasla cieluman aywacärinapaj”. Caytapis escribergan: “Ichanga rurapäcunapäga caycargan Diosta sirvishganchicho ocupado caycänapaj”. Y chaytami rurashga. Cushi cushila yachachicurgan carcelcho creenciancunaraycur wichgarashga hermanucunata shacyächergan y edäyashga caycaptinpis jinala reuniuncunaman aywargan. Tiempunta shumaj provechargan cieluman aywanancama. ¿Imanotaj chayga yanapashga? 1966 watacho cayno escribergan ichiclana pishiycaptin wanunanpaj: “Canan yäracuynë sinchi cashganga imaypis cashganno caycan”. Pay rurashganga lapanchitami yanapämanchi, masga achca watapana Jehovata sirvir imaycacunapa pasar aguantaycashganchicunata (Heb. 13:7).

16. ¿Ima sasacunapataj pasargan hermanunchi Herbert warminwan? (Santiago 4:14).

¹⁶ Achca Jehovapa sirvejnincuna öraga fiyu gueshyacunawan nacapäcun. Hermanunchi Herbert Jennings vidanpita wilacushgancho nergan Ghana naciuncho warminwan misioneruno caycar cushi cushila capäcushganta. b Ichanga tiempo pasariptin doctorcunaga nergan uma gueshyawan caycashganta. Chayshi paypäga “mana yarpashganno pasananpaj” cargan, chaynoga ricacurgan Santiago 4:14 (leiriy) nishganman yarpar. Caytapis escribergan: “Laquicuycarla caycänapaj trucan alistapäcurgä Ghana naciunpita y amigücunapitapis despidicunäpaj Canadá naciunman cutinäpaj”. Jehovami hermanunchita Herbert warmintawan yanapargan chay sasacunapa pasarpis sirviycarla caycänanpaj.

17. ¿Hermanunchi Herbert pasashganga imanotaj waquincunata yanapargan?

 ¹⁷ Hermanunchi Herbert vidanpita wilacushganga achcajtami yanapargan. Juc cristiana cayno escribergan: “Turi Herbert imapa pasashganga waquincunapitapis masraj shongüman chayargan […]. Cay turi misionero cashganta jaguiriptin saludninta cuidananpaj musyarga yanapämashga calpachacunäpaj puedishgämanno Jehovata sirvinäpaj”. Juc hermanupis escribergan: “Chunca watapanami congregaciuncho ancianuno yanapacuycarpis, chayta jaguirirgä uma gueshyawan caycashgäta musyar. Pasaypa mana valejno ricacur waquincuna wilacushgantapis leiyta munargächu […]. Ichanga Herbert hermanunchi wilacushganta leiptëga shacyächimargan”. Cayga yarpächimanchi ilajpita yurimushgan problemacunata aguantaptinchega waquincunata yanapayta puedinchi. Chauraga cawacuyninchi shuyarashganchino mana captenga Jehovaman yäracushganchi y aguantashganchega waquincunatapis yanapanmi (1 Ped. 5:9).

18. ¿Imataj yachacunchi Nigeriapita juc viuda cristianapita? (Actuaciunta rurashgan fotucunapita parlacaramuy).

¹⁸ COVID-19 gueshya wichanchopis achca Jehovapa sirvejnincuna sasacunapa pasargan. Nigeriapita juc viuda cristianapa guellaynin y micuyninpis ushacaycargannash. Juc tutacho juc tazala arrozta ricarshi warmi wamranga tapurgan nircur imataj micunanpaj. Paninchega nerganshi micuypis guellaypis mana cashganta, chaura Sareptapita viudano rurananpaj nergan. Último caj micuyninta preparargan y Jehovalaman yäracunan cargan (1 Rey. 17:8-16). Chay junaj meriendacho imata micupäcunanpaj manaraj yarpar, hermanucunash juc cajata entregaycurgan. ¡Y chayta quichaycurshi ricargan ishcay semanapaj micuy chaycho caycashganta! Chayta ricarshi paninchega cuentata gocurgan Jehová atentula wiyashganta wamranta ima nishganta. Chauraga Jehovaman yäracuptinchega mana yarpashganchi problemacuna ilajpita yurimuptenga yanapämanchi Jehovaman masraj guelicunapaj (1 Ped. 5:6, 7).

19. ¿Imataj pasargan Alexéi Yershov hermanunchita?

¹⁹ Achca hermanucunata creenciancunaraycur chiquishpan gaticachar galaycurgan. Ricärishun Alexéi Yershov hermanunchita Rusia naciunpita ima pasashganta. Payga bautizacurgan 1994 watacho, y tiyashgan marcacho chay wichan Jehovapa testiguncunaga jaucala  Diospita runacunata parlapacärej. Ichanga tiempuwanga Rusia naciuncho chaynonachu cargan. 2020 watacho waquin policiacuna Yershov hermanunchipa wasinman yaycuycur, imaycacunata ashipacurgan y achca imaycancunata apacurgan. Quillacuna pasariptinna autoridäcuna hermanunchita denunciargan. ¿Imanir? Juc runa ali tucurgan Bibliapita yachacuyta munaycashganta y achca videucunata grabaycur autoridäcunata entregargan. ¡Chay runa rurashganga pasaypa mana ali cashga!

20. ¿Imataj hermanunchi Yershov rurashga Jehovawan amistänin más sinchiman ticrananpaj?

²⁰ Chay jinanpa hermanunchi Yershov pasashganga yanapargan Jehovawan amistänin más sinchiman ticrananpaj. Payga nin: “Warmëwan nogaga cada cadala masraj mañacärë. Jehová mana yanapämaptenga imaraj canman nogapita”. Caytapis nin: “Bibliata yachacurga yanapäman mana guelanäcunäpaj. Jina unay Diospa sirvejnincunamanpis yarpachacö. Bibliacho caycaj achca wilacuycunaga yanapämanchi Jehovalaman yäracur imatapis aguantanäpaj”.

21. ¿Imataj yachacushcanchi cay yachacuycho?

²¹ ¿Imataj cay yachacuycho yachacushcanchi? Canan wichan cawayninchicho öraga ilajpita imapis yurimuptenga, Jehovaman yäracuptinchega pay imaypis listo caycanga yanapämänanchipaj. Cay yachacuypa acracämushga texto nishgannopis “Diosta cäsukuq runapaqqa imalapis kaykanmi lakikunanpaq. Tsayno kaptinpis TAYTA DIOSMI imaypis yanapan” (Sal. 34:19). Chaymi problemacunalamanga yarparäcushwanchu, sinoga imano Jehová yanapämänanchipaj cajman. Chauraga apóstol Pablunopis nishun: ‘Jehová yanapämaptinmi llapanchöpis alli llogshë o yargö’ (Filip. 4:13).