1. ¿Imaytaj Jesús punta caj milagrunta rurashga?

 RICÄRISHUN 29 caj wata ushanancho ima pasashganta. Jesusga Taytanpita yachachicur galaycushga cargan. Payga mamanwan y waquin discipuluncunawanpis Caná marcacho juc runa majachacar juc fiestata rurashganman aywapäcurgan, chayga Nazaretpita norte cajcho caycan, chaycho Jesús winashga cargan. Mariaga noviucunapa familianpa amigan cargan, y yanapänanpächi aywargan. Capaz achca runacuna shamushga captin vino jucla ushacargan, y chayga pengacuypaj canman cargan chaylaraj majachacashgacunapaj y familiancunapäpis. b Chaymi Mariaga Jesús cajman jucla aywar “vïnu ushakäkushqanami” nin (Juan 2:1-3). Chayta wiyar Jesusga yacuta alinnin caj vinuman ticrachin (Juan 2:9, 10).

2, 3. 1) ¿Imacunataj Jesús rurashga poderninwan? 2) ¿Imanirtaj alapa ali caycan Jesuspa milagruncunapita yachacunapaj?

² Jesusga Papäninpa voluntäninta rurar, achca milagrucunata rurashga. c Poderninwan chaychicaj runacunata yanapargan. Juc cuticho 5.000 olgucunata micuyta garargan, y yapaychopis 4.000 olgucunata. Ichanga chaycho caycaj warmicunata y wamracunatapis yupaptinchega 27.000 runacunapitapis mastaraj chay ishcay milagrucunawan micuyta garargan (Mat. 14:15-21; 15:32-38). Jina gueshyaycajcunatapis  alchacächergan (Mat. 14:14; 15:30, 31). Jesús chay milagrucunata rurashganta ricar runacunaga alapa almirashgachi carcaycargan.

³ Jesuspa milagruncunapita achcatami yachacunchi. Cay yachacuycho yachacushganchega yäracuyninchita mirächenga. Jina ricashun imanotaj Jesusno ñanpu shongu y cuyapäcoj cashwan.

4. ¿Jesuspa milagruncunapita yachacurga, pïcunapitataj yachacunchi?

⁴ Jesuspa milagruncunapita yachacurga Taytanpitapis yachacuycanchi. Aumi, quiquin Jehová Jesusta poderninta gorgan milagrucunata rurananpaj. Hechos 10:38 nin: ‘Jesús munayniyuq kananpaq espíritu santuta payman Tayta Dios kachamurqan. Tayta Dios yanapaptinmi markan markan Jesús purirqan alikunata rurar y diablu qeshyatsishqan runakunata aliyätsir’. Musyashganchinopis Jesús imano cashgan y yarpashganga Taytannomi cargan, chayta ricanchi ima nishgancunacho y rurashgancunachopis (Juan 14:9). Cananga quimsalata ricärishun imata yachacunchi Jesuspa milagruncunapita y chayta imanotaj yäracuyninchita sinchiyächin.

5. ¿Imanirtaj Jesús milagrucunata rurargan? (Mateo 20:30-34).

⁵ Naupa caj, Jesuswan Taytanga amatar cuyamanchi. Jesús Pachacho caycar runacunata alapa cuyashpan achca milagrucunata rurargan yanapänanpaj. Juc cuticho ishcay gapra runacuna gaparaypa ruwacurgan yanapänanpaj (leiriy Mateo 20:30-34). Bibliaga nin chayta ricaycurshi paycunata cuyapar y laquipar nawincunata yataycurgan quichacänanpaj. Pipis waquincunapaj amatar yarpachacur laquipashganga cuerpunchopis ricacämunraj. Chaynomi Jesuspis ricacurgan, chaymi runacunata cuyashpan micuycunata garargan, y leprawan gueshyaycaj runatapis alchacächergan (Mat. 15:32; Mar. 1:41). Cayga tantiachimanchi Diosninchi Jehová y Wamranpis fiyupa cuyamashganchita, y nacaycashganchita ricar paycunapis laquicunmi (Luc. 1:78; 1 Ped. 5:7). Chaymi shongupita pacha munaycan lapan nacachimanganchicunata ushacächinanpaj.

6. ¿Ima podertataj Jehová Jesusta gorgan?

⁶ Ishcay caj, Dios Jesusta poderta gorgan lapan problemacunata ushacächinanpaj. Imaycata ruraptinchipis waquin problemacunataga alchayta manami camäpacunchichu. Jesús ichanga milagruncunawan chayta rurargan. Pay munayniyoj car imayca mana alicunata, juchata, gueshyacunata y wanuytapis ushacächinanpaj camäpacunmi (Mat. 9:1-6; Rom. 5:12, 18, 19). Milagruncunaga tantiachimanchi “tucuy gueshyawan” nacaycajcunata alchachiyta y wanushgacunatapis cawarachimuyta puedishganta (Mat. 4:23; Juan 11:43, 44). Jina poderyojpis caycan shucucuy wayrata chawächinanpaj y supaycunatapis vencinanpaj (Mar. 4:37-39; Luc. 8:2). Jesús chay lapanta rurananpaj Jehová poderta goshganpita musyarga, ¿manachu shacyächimanchi?

7, 8. 1) Jesuspa milagruncunapita yachacurga, ¿imapitataj seguro caycashwan? 2) ¿Maygan milagrutaj cumplicunanpaj gamga más shuyaraycanqui?

⁷ Quimsa caj, seguro caycashwan Diospa Gobiernuncho imayca bendiciuncuna rasunpa cananpaj. Pachacho caycar Jesús milagrucunata rurashganga tantiachimanchi Diospa Gobiernunchona mandamuptin imayca milagrucunata rurananpaj lapan Pachacho. Yarparay chay wichan caway  imano cananpaj. Jesús lapan problemacunata gueshyacunatapis ushacächiptin, lapanchi sano y mana nacaypaj cawapäcushun (Is. 33:24; 35:5, 6; Apoc. 21:3, 4). Muchuyraycur y desgraciacunaraycurpis mana nacashunnachu (Is. 25:6; Mar. 4:41). Jina pamparaycaj wanushga castanchicuna cawarimushgancunawanpis tincushun, chayga cushicuypämi canga (Juan 5:28, 29). Chay lapancunaman yarparga, ¿maygan milagrutaj cumplicunanpaj munanqui?

⁸ Jesús milagruncunawan musyachicurgan ñanpu shongu y cuyapäcoj cashganta, noganchipis payno canapaj calpachacushwan. Ishcay milagruncunapita parlarcushun. Puntataga ricärishun Caná marcacho casaray fiesta cashganpita.

9. ¿Imanirtaj Jesús juc milagruta rurashga Caná marcacho casaracuy fiestacho? (Juan 2:6-10).

⁹ (Leiriy Juan 2:6-10). Casaracuy fiestacho vino ushacaptin, ¿Jesús carguyojchuraj caycargan imalatapis rurananpaj? Manami. Maygan profeciapis mana wilacurganchu Mesías yacuta vinuman ticrachinanpaj. Gamga imanoraj ricacunquiman cargan casaracuy fiestayquicho chayno pasaptin. Jesusga yarpachacurganchi noviucuna y familianpis pengacuypaj cananpaj. Chaychi laquipar yanapacuyta munargan y yacuta vinuman ticrachergan. Aumi, 103 galones yacuta más alinnin caj vinuman ticrachergan. ¿Y imanirtaj chayno achcata rurargan? Capaz yarpargan puchuptenga juc fiestapäna cananpaj, o ranticunanpäpis  chaylaraj majachacashgacunata yanapänanpaj. ¡Paycunaga alapa agradeciduchi caycargan!

10. Wilacamuy Juan ishcay caj capitulucho maslata ima pasashganta (dibujutapis ricay).

¹⁰ Ricärishun Juan ishcay caj capitulucho ima mastaj pasashganta. ¿Pitaj urpucunaman yacuta juntargan? Manami Jesuschu cargan. Runacuna alabananta mana munarmi, sirvicojcunata chayta rurananpaj nergan (6 y 7 caj versiculucuna). Y yacu vinumanna ticrashga captin, ¿pitaj ichic chagarcur mayor caj sirvicojman apargan yawananpaj? Yapay Jesús manami carganchu. Sirvienticuna chayta rurananpaj nergan (8 caj versículo). Aumi, Jesusga runacunapa naupancho caycar vinuyoj copata jogarircur manami nerganchu: “¡Mä yaway cay mishqui rurashgä vinuta!”.

11. ¿Imataj yachacunchi Jesús cay milagruta rurashganpita?

¹¹ Jesús cay milagruta rurashganpita yachacunchi ñanpu shongu o humilde canapaj. Payga manami ali tucurganchu yacuta vinuman ticrachishganpita. Aumi, payga manami imaypis ali tucojchu rurashganpita. Chaypa trucan humilde cashpanmi Taytanta imaypis alabargan (Juan 5:19, 30; 8:28). Noganchipis Jesusno captinchega humilde cashun y rurashganchicunapita manami ali tucushunchu. Jehovata sirvishganchicho imaycacunata ruraptinchipis, waquincuna alabamänanchipaj ama ashishwanchu, sinoga Diosninchi Jehovata alabananchipaj ashishwan (Jer. 9:23, 24). Calpachacushun imaypis Jehovalata alabanapaj. Pay mana yanapämaptinchega imatapis rurayta puedinchichu (1 Cor. 1:26-31).

12. ¿Ima mastaj rurartaj Jesusno humilde cashwan? Tantiachicamuy.

¹² Yarpachacushun imano Jesusno humilde cashwan. Juc ancianush tiempunta camacächin juc jovinlaraj siervo ministerialta yanapänanpaj punta caj discursunta preparananpaj. Chayraycurshi jovinlaraj wauguiga ali discursuta gomun, y congregaciunchopis lapancuna cushishga caycan. Reunión usharcuptinnash pilapis ancianuta nin: “Mozularaj caycarpis ali discursuta gomush ¿au?”. ¿Imanoraj canman anciano caj niptin: “Aumi, noga yanapashgäpita chayno rurash”? ¿O humilde cashpan ninmanchuraj: “Aumi, shumajmi rurashga”? Pipis humilde cashpan waquincunata yanapashganpita, manami ashinchu runacuna alabananta. Chaypa trucan masga yarpan Jehová lapanta ricashganta y rurashgancunatapis valurashganta (Mateo 6:2-4 textuwan tincuchiy; Heb. 13:16). Jehovaga alapami cushicun calpachacuptinchi Jesusno humilde canapaj (1 Ped. 5:6).

13. Jesús Naín marcaman chayaptin, ¿imataj pasaycargan? (Lucas 7:11-15).

¹³ (Leiriy Lucas 7:11-15). Jesús yachachicur caycaptinna Naín marcaman aywargan. Chayga Sunem marcapita manami caruchochu caycan, chaycho 900 guepa watacunacho Eliseo juc viuda warmipa wamranta cawarachimushga cargan (2 Rey. 4:32-37). Jesús chay marcaman chayaptin ricargan runacuna juc ayata apaycajta pampananpaj. ¿Imataj pasashga cargan? Juc viuda warmipa japalan wamran wanushga cargan. Payga manami japalanchu caycargan, waquin runacunapis jinanpita yanagaycargan. Chaura Jesusga chay viudata cuyapashpan wamranta cawarachimurgan. Bibliacho wilacamun quimsa  wanushgacunata Jesús cawarachimushganta, y caymi caycan punta cajmi.

14. Wilacamuy ima mastataj pasashganta Lucas ganchis caj capitulucho (dibujutapis ricay).

¹⁴ Ricärishun ima mastataj yachacunchi Lucas ganchis caj capitulupita. Puntataga Jesús ricargan viuda warmi laquishga caycajta, y nircur payta cuyapashpan pasaypa laquicurgan (13 caj versículo). Payga ricarganchi chay warmi fiyupa wagaycur wamranpa ayan naupancho puriycajta. Y ricashganpita shongunpis nanaycurganrämi. Jesusga manami laquicurganlachu chayta ricar, sinoga ruraynincunawanpis ricächicurgan. Chaymi warmita cuyapashpan nerganchi: “Ama wagaychu”. Nircur wamranta cawarachimur mamanta nergan “cä wamrayqui” (14 y 15 caj versiculucuna).

15. ¿Imataj yachacunchi Jesuspa milagrunpita?

¹⁵ Jesuspa milagrunpita yachacunchi imano cuyapäcoj canapaj wanupacushgacunata shacyächinapaj. Jesusno wanushgacunata cawarachimuyta mana puedirpis, paypita yachacunchi imano cuyapäcoj canapaj wanupacushgacunawan. Chaypäga puntata ricashwan imano ricacushganta, nircur imalatapis cuyacuywan nishwan y imalachopis yanapashwan consolanapaj (Prov. 17:17; 2 Cor. 1:3, 4; 1 Ped. 3:8). d Achcataraj mana parlar o imalatapis rurar waquincunata yanapashwanmi.

16. ¿Imataj yachacunchi juc cristianata pasashganpita? (Actuaciunta rurashgan fotupita parlacaramuy).

¹⁶ Ricärishun imata pasashganta guepa watacunacho juc reuniuncho. Wanushgacuna cawarimunanpaj canciunta cantapacuycaptinshi juc hermana ricargan cristiana masin wagaycajta. Payga wagaycargan warmi wamran wanushga cashganpita. Chayta musyar, jinan hora hermananchi pay cajman aywargan y macalacur ishcan cantapäcurgan. Maman cajga yarpan chay horash shongun cushicushganta, japalan mana caycashganta musyar. Cushishgash caycargan reuniunman aywashganpita. Pay nergan: “Musyargämi Diosta  aduranapaj wasicho yanapacuyta chasquinäpaj”. Jehovaga ricaycanmi imano calpachacunchi cuyapäcoj canapaj. Payga manami gonganchu lapan rurashganchicuna wanupacushgacunata laquicuycajcunatapis shoganapaj (Sal. 34:18).

17. ¿Imataj yachacushcanchi cay yachacuycho?

¹⁷ Jesuspa milagruncunapita yachacuptinchega yäracuyninchita sinchiyächin. Mateo librupita Juancama wilacushganga musyachimanchi Jehovawan Jesús amatar cuyamashganchita, Jesús poderyoj caycan lapan problemacunata ushacächinanpaj y imaypis seguro caycashwan Diospa Gobiernuncho imayca bendiciuncuna rasunpa cananpaj. Jina yanapämanchi yarpachacunapaj imata Jesuspita yachacunapaj. Chaymi alichi canman familiayquiwan Diosta adurashgayqui horacho o japalayquipis Jesuspa milagruncunapita yachacunayquipaj, chayta rurar yarpachacuy imataj yachacunquiman y waquincunatapis parlapay. Chauraga mayraj parlapacunayquipaj canga (Rom. 1:11, 12).

18. ¿Imataj yachacushun gatejnin caj yachacuycho?

¹⁸ Walcalana wanunanpaj pishiycaptin Jesús juc runata mastaraj cawarachimurgan. Canan ichanga manami carganchu guepa watacunacho ishcay runacunata cawarachimushganno, sinoga juc amigunta cawarachimurgan chuscu junajna wanushga caycashganpita. ¿Imataraj yachacushwan chay milagrupita? ¿Imacunataj rurashwan wanushgacuna cawarimunanpaj cajman yäracuyninchita sinchiyächinapaj? Chaycunataga gatejnin yachacuycho yachacushun.