1. ¿Imataj munan Jehová noganchipita?

 JUC wamra yuriptin, taytancunaga alapami cushicärin y amatar cuyapäcun. Chayno captinpis manami munanchu imaypis itila o wamrala cananta. Chaymi mana winaptenga alapa yarpachacurna galaycärin. Jehovapis alapami cushicun Bibliapita yachacuyta galaycuptinchi, pero manami munanchu ‘pishi wamrano’ yachacushganchilawan quedacunanchipaj (1 Cor. 3:1). ‘Tsaypa trukanqa pogushga runakunano’ shumaj tantiacoj cananchipaj munan (1 Cor. 14:20).

2. ¿Ima tapucuycunata contestashun?

² Cananga cay tapucuycunata contestashun: ¿Pogushga cristianuga imanotaj yarpan y imanotaj comportacun?, ¿imataraj rurashwan pogushga cristianuman ticrananchipaj?, ¿imanirtaj Bibliapita aliraj yachacunanchi? y pogushga cristiano captinchipis, ¿imanirtaj calpachacushwanraj Jehovawan amigo cananchipaj?

¿IMANO RUNATAJ POGUSHGA CRISTIANUGA?

3. ¿Pitataj ninchi pogushga cristiano cashganta?

³ Bibliacho pogushga cristianupita parlaptenga, manami parlaycanchu edayashga cashganpita. Sinoga parlaycan ali tantiacoj, ali yarpayniyoj runapita (1 Cor. 2:6). Chauraga pogushga cristiano canchi Diospa Palabranta shumaj tantiaptinchi y wamracunano manana yarpaptinchi. Ichanga ama yarpashwanchu pogushga cristiano cashganchiraycu imatapis manana ruranapaj cajta (1 Tim. 4:15). Lapanchimi ima edäyoj captinchipis calpachacunanchiraj ali tantiacoj y pogushga runaman  ticranapaj. ¿Imanopataj musyanchi pipis ali tantiacoj o pogushga cristianuna cashganta?

4. ¿Pogushga cristianuga imataj ruran?

⁴ Pogushga cristianucunaga convienishgancunalata cäsucunanpaj trucan Dios lapan mandashgancuna cäsucärin. Juchayoj o pantaj captinpis calpachacärin yarpaynincuna y ruraynincunapis Jehová munashganno cananpaj. Mushoj runanona cawapäcun y cada cadala imaycata ruran Jehová yarpashganno yarpapäcunanpaj (Efes. 4:22-24). Biblia nishganman shumaj yarpachacärin y Diospa mandätuncunatapis cuentaman churan imaypis ali cajcunata acrananpaj, manami necesitanrächu pipis cayno wacno ruray ninanpaj. Jina imatapis decidirga calpachacärin imaypis cumplinanpaj (1 Cor. 9:26, 27).

5. ¿Imataj pasan pishi wamrano yarpaj cristianucunata? (Efesios 4:14, 15).

⁵ Pishi wamracunano yarpaj cristianucunaga engañacoj runacuna parlashgancunata rasla creipäcun, chay runacunaga “manakaqkunata yachatsir criyitsimänantsipaq” munan. Jina Diospita contrancho churacajcuna y Bibliapita lutanta yachachicojcuna nishgantapis yäracärin (leiriy Efesios 4:14, 15). a Y chayraycu öraga envidioso o jucla piñacoj runaman ticraycun y jagayashgapis caycar juchaman rasla tuninman (1 Cor. 3:3).

6. Pogushga cristianuman imano chayashganchega, ¿imawantaj tincun? (Fotucunatapis ricay).

⁶ Pogushga cristianuman imano chayashganga tincunmi juc wamra mayor cayman imano chayashganwan. Wamracunaga lapanta manami musyanchu, chaymi necesitan pilapis yachachinanta y cuidananta. Cayman yarpäshun, juc wamra callita chimpananpäga mamanrämi maquinpita janchaycur chimpachin. Y wamran winashganman tupu mamanga jaguirinna japalan chimpananpaj, chayno captinpis yarpächinraj shumaj ricachacur chimpananpaj. Chay wamra jipashna captin quiquilan tantianga ima peligrucunapita cuidacunanpaj. Chaynolami pishi wamracunano caycaj cristianucuna necesitanrämi pogushga cristianucuna yanapänanta mana alicunaman mana chayananpaj y ali decidinanpäpis. Ichanga pogushga cristianucunaga  shumaj yarpachacärin Biblia ima nishganman, chaynopa quiquilancuna ali cajcunata decidinanpaj.

7. ¿Nishwanchuraj pogushga cristianucuna waquincunapa yanapacuyninta manana necesitashganta?

⁷ ¿Pogushga cristianucunaga ‘pipis yanapämänanta necesitächu’ ninmanchuraj? Manami. Paycunapis öraga waquincunapa yanapacuynintaraj ashin. Pishi wamracunano yarpaj cristianucunaga quiquilancuna imatapis decidinanpaj trucan shuyaranraj waquincuna ninanpaj imata rurananpaj cajta. Ichanga pogushga cristianucunaga juccunapa yanapacuyninta ashin y experienciayoj hermanucunapitapis yachacun, pero musyanmi cada uno “Tayta Diosta cuentata” gonanpaj (Gál. 6:5).

8. ¿Lapan pogushga cristianucuna igualchuraj capäcun?

⁸ ¿Nishwanchuraj lapan pogushga runacunapa cäranpis y cuerpunpis igual cashganta? Manami. Chaynolami pasan Diospa cajcho lapan pogushga cristianucunawanpis. Waquincunaga ali yarpayniyoj capäcun, juccunaga mana manchacojmi, waquincunana ali yanapacoj y juccunaga cuyapäcojmi. Ishcay cristianucuna pogushgana captinpis, capaz öraga ima asuntuchopis cada uno jucnomi decidinman. Chayno captinpis ishcancuna Biblia nishganno decidishga captenga alimi caycan. Chaymi mayganninpis manami jamurpanmanchu jucaj decidishganta, sinoga calpachacärinman ali goyäcärinanpaj (Rom. 14:10; 1 Cor. 1:10).

¿IMATAJ RURASHWAN POGUSHGA CRISTIANUMAN TICRANAPAJ?

9. ¿Imatarätaj pipis ruranman pogushga cristianuman ticrananpaj?

⁹ Wamracunaga watacuna pasashganmanno quiquilan jatunman ticraycun, pogushga cristiano cananchipaj ichanga manami chaynochu, calpachacunanchirämi. Corintupita cristianucunaga Diospa Palabranta ali chasquiycur bautizacärergan, Diospa santo espiritunta chasquergan y apóstol Pablupitapis yachacärergan (Hech. 18:8-11). Chayno captinpis, bautizacushganpita watacuna pasashgana captinpis, achcajmi pogushga cristianucuna carganrächu (1 Cor. 3:2). ¿Imataraj rurashwan chayno mana pasamänanchipaj?

10. ¿Imataraj rurashwan pogushga cristianuman ticrananchipaj? (Judas 20).

¹⁰ Pogushga cristiano canapäga quiquinchipitaraj caycan. Pishi wamracunano yarpajcunaga, pogushga cristianuman manami imaypis ticrangachu (Prov. 1:22). Waquin runacunaga wamracunano sienticärin, chaymi ima cargutapis chasquiyta munanchu, papanilan imatapis rurananpaj o decidinanpaj munan. Paycunano cayta manami munanchichu. Sinoga quiquinchipita caycan calpachacunapaj Diospa cajcho pogushga cristianuman ticrananchipaj (leiriy Judas 20). Pogushga cristiano o cristianaman manaraj ticrashga carga, Jehovata mañacunayqui, payga “shakyätsishunki y poderta qoshunki” (Filip. 2:13).

11. ¿Ima yanapacuycunataj Jehová gomashcanchi pogushga cristianuman ticrananchipaj? (Efesios 4:11-13).

¹¹ Jehovaga manami shuyaranchu japalanchi pogushga cristianuman ticranapaj. Pay gomashganchi congregaciuncho ali pushacojcunata y yachachicojcunatapis yanapämänanchipaj pogushga cristianuman ticranapaj y Jesús yarpashganno yarpänapaj (leiriy Efesios 4:11-13). Espíritu santuntapis gomanchi, Jesucristo yarpashganno yarpänapaj (1 Cor. 2:14-16). Jina Palabrancho Mateo, Marcos, Lucas y Juan librutapis escribichergan Jesús Pachacho caycar lapan rurashganta musyanapaj. Chaura Jesús yarpashganno yarpar y rurar galaycuptinchega, pogushga cristianuman ticrashun.

 BIBLIAPITA ALIRAJ YACHACUNANCHI

12. ‘Qalaykunan kaq yachatsikuykunapita’ parlarga, ¿imapitataj parlaycanchi?

¹² Pogushga cristiano cananchipäga “ama qalaykunan kaq yachatsikuykunalataqa yachakushuntsu”. Waquin yachachicuycuna caycan arrepentimientupita, bautismupita, wanushgacuna cawarimunanpaj cajpita y imano yäracoj runaman ticranapäpis (Heb. 6:1, 2). Chaycunata lapan cristianucuna shumaj tantianan. Chaymi Pentecostés fiestacho apóstol Pedro achca runacunata chaypita yachachergan (Hech. 2:32-35, 38). Jesuspa discipulun cananchipaj chay yachachicuycunaman yäracunanchi. Apóstol Pabluga nergan wanojcuna cawarimunanpaj cajman mana yäracurga Diosman yäracushganchi manacajlapaj caycan (1 Cor. 15:12-14). Chaymi galaycunan caj o ichiclata yachacushganchiwan cacushunchu.

13. ¿Imatataj rurashwan Diospa Palabranta aliraj yachacunanchipaj? (Fotucunatapis ricay).

¹³ Galaycunan caj yachachicuycunata musyarpis, calpachacunanchiraj chucru micuyta micunapaj o mastaraj yachacunapaj. Diospa leynincunapita yachacushgalanchiwanga cacushunchu, sinoga calpachacunanchi shumaj tantiarcunapaj Bibliacho caycaj principiucuna ima niycashganta, chayga yanapämäshun Jehová yarpashganno yarpänapaj. Chaypäga Bibliata leinanchi, leishganchiman yarpachacunanchi y cäsucunanchi. Chayta rurar Jehová munashganno ali cajcunalata acrashun (leiriy Hebreos 5:14). b

14. ¿Imanotaj Pabluga Corinto cristianucunata yanapargan pogushga cristianuman ticrananpaj?

¹⁴ Bibliacho juc mandato mana captin imalatapis imano rurananpaj, pishi wamracunano cristianucunapäga öraga sasami canman ali decisiunta acrananpaj. Chaymi capaz yarpanman paycuna munashganno imatapis rurananpaj. Waquincunana nipäcun ‘cayga cayno o wacno ruracanman’ nir. Corinto cristianucunaga apóstol Pabluta mañacurgan juc mandatuta churananpaj idulucunapa jutincho pishtashga uywacunata micunanpaj o mana micunanpaj cashgantapis. Imata rurapäcunanpaj ninanpaj trucan  Pabluga yarpächergan cada uno quiquinpa conciencianpita decidipäcunanpaj. Shumaj tantiachergan Jehová chaypita ima yarpashganta, chaynopa ali cajta decidinanpaj y pitapis mana laquichinanpaj (1 Cor. 8:4, 7-9). Chayta rurar Corinto hermanucunata Pablo yachaycächergan pogushga cristianuman ticrananpäga juc mandatutaraj o leytaraj mana shuyaränanpaj, sinoga yanapaycargan quiquincuna shumaj yarpachacurcur o tantiarcur imatapis rurananpaj.

15. ¿Imanotaj Pabluga hebreo cristianucunata yanapargan pogushga cristianucunaman ticrananpaj?

¹⁵ Apóstol Pablo hebreo cristianucunata cartacamushganpitapis yachacunchi. Waquincunaga manami calpachacuycarganchu pogushga cristianuman ticrananpaj, chaymi Pablo nergan “mikuyta manaraq yachakur lëchilataraq upuqnömi” carcaycashganta (Heb. 5:12). Paycunaga altanto caycarganchu congregaciuncho chasquishgan mushoj yachachicuycunapita (Prov. 4:18). Jesús wanushganpita judío cristianucuna manami obligadunachu caycargan Moisés chasquishgan Leyta cäsucärinanpaj, ichanga waquincunaga cäsucuyta munaycarganrämi (Rom. 10:4; Tito 1:10). 30 watacunano pasashgana captinpis Jesús wanushganpita, paycunaga manami shumaj tantiarganrächu cargan Moisespa Leynin manana vigente cashganta. Chaymi, Pabluga paycunata yanapayta munar cartacunata apachergan. Chaycunawan shumaj tantiachergan, chay wichan Diosta imano adurashgan más ali cashganta unaycho israelitacuna imano adurashganpita. Chayga paycunata yanapanman cargan imacunapa pasarpis valiente cananpaj, y chiquishga captinpis jinala yachachicur siguinanpaj (Heb. 10:19-23).

CALPACHACUNANCHIRÄMI POGUSHGA CRISTIANO CANANCHIPAJ

16. Pogushga cristianuna caycarpis, ¿imataraj más rurashwan?

¹⁶ Pogushga cristianuman ticrashgana carpis, calpachacunanchiraj imaypis chaynola cananchipaj. Chauraga manami confiacushwanchu pogushga cristianuna cashganchita yarpar (1 Cor. 10:12). Chaymi cada cadalami cayno tapucunanchi: ¿Canan unaypitapis más pogushga cristiano cashgäta ricacämunchuraj? (2 Cor. 13:5).

17. Pablo colosenses cristianuta cartacamushganga, ¿imatataj yachachimanchi pogushga cristiano canapaj?

 ¹⁷ Colosenses cristianucunata cartacamushgancho apóstol Pablo wilacamun imanir Diospa cajcho pogunanpaj. Chay marcacho tiyaj cristianucunaga pogushgana caycarpis, Pabluga yarpächergan cay mundo runacunano yarpar mana galaycärinanpaj (Col. 2:6-10). Chay cristianucunataga Epafras reguejmi, chaymi cada cadala Jehovata mañacoj ali tantiaj y pogushga cristiano capäcunanpaj (Col. 4:12). ¿Imatataj yachacunchi? Pabluwan Epafrasga musyapäcurganmi pipis pogushga cristiano cananpäga, calpachacunanraj y Jehovapis listo caycan yanapänanpaj. Ishcancuna munapäcurgan colosenses cristianucuna imayca sasacuna pasarpis jinala pogushga cristianucuna capäcunanpaj.

18. Pipis pogushga cristianuna caycaptinpis, ¿öraga imataj pasanman? (Fotutapis ricay).

¹⁸ Pablo hebreo cristianucunata nerganmi pipis ali cristiano captinpis mana cuidacuptenga Diospa amistäninta ogrananpaj cajta. Shongun chucrucäcuptenga, tiempuwan juchata rurashganpita mana arrepenticur, Diospa perdunnintapis manami chasquinmanchu. Ichanga hebreo cristianucunaga chaypa pasapäcurganchu (Heb. 6:4-9). ¿Imataj pasan congregaciunpita gargushga cajcuna o carupacushga cajcuna arrepenticuptin? Maychicajmi arrepenticärishpan ñanpu shongu car Diospa marcanman cutipäcamun. Diospa marcancho yapay caycaptin pilapis yanapänanta necesitapäcunraj (Ezeq. 34:15, 16). Chaymi ancianucuna maygan pogushga cristianutapis nircun chay hermanuta yanapänanpaj.

19. ¿Imano cananchipätaj calpachacunanchi?

¹⁹ Pogushga cristiano canayquipaj calpachacuycaptiquega, jinala calpachacuycar siguinquiman. Waran waran Bibliapita shumaj yachacunquiman, chaynoparaj Jehová yarpashganno yarpanquipaj. Diosta sirviycashgayquicho pogushga caycaptiquega alimi chayga, chaynola canayquipaj calpachacuy.