Yurishcä 1955 watacho, y quimsa wauguëcunapita shulca cajmi cä. Finlandia naciunpa sur cajcho winashcä, cananga chay sitiupa jutinga Vantaa.

Mamanë Testiguno bautizacurgan manaraj yuriptë. Pero taytäga manami munarganchu mamanë Bibliapita yachachimänanta ni reuniunmanpis apamänanta. Chaura taytä wasicho mana caycaptin, mamanë Jehovapita yachachipäcamaj.

Wamrala cashgäpita Jehovata lapancho ­cäsucuyta munargä. Ganchis watayoj caycaptë profesorä rabiacurgan verilättyjä nishgan micuyta mana micuptë (chayga yawarpita rurashga caycargan). Juc maquinwan shimïta quichayta munargan y juc maquinwanna cucharata aptargan a las malas micuchimänanpaj. Pero maquinta imanopapis cutaycuptë, cucharaga pampaman ishquirgan.

12 watayoj caycaptë, taytä wanucurgan. Chaura lapan reuniuncunamanna aywayta galaycurgä. Hermanucuna cuyamashganta y nogapaj yarpachacushganta ricar Jehovapaj masta rurayta galaycurgä. Bibliata cada junaj leinäpaj y publicaciuncunatapis shumaj yachacunäpaj calpachacurgä. Chay lapancunami yanapämargan 14 watayojlawan bautizacunäpaj 8 caj agostupita 1969 watacho.

 Colegiüta usharcuptëmi precursor regularno yanapacuyta galaycurgä. Juc ishcay semanacuna pasarcuptinna Finlandiapita cercalacho caycaj Pielavesi marcaman aywacurgä Diospita runacunata yachachinäpaj.

Pielavesi marcacho Sirkka cristianata reguirgä, paymi cuyaylapaj warmëman ticrargan. Nogaga ricargä humilde cashganta y Jehovatapis alapa cuyashganta. Payga walca cosascunalawan cushish cawacoj. Diospaj masta rurayta munapäcurgä, chaymi dispuesto carcaycargä imaycata ruranapaj. 23 marzo quillacho casaracärergä, 1974 watacho. Marcacunaman pasiaj aywanapaj trucan, Karttula marcaman aywarganchi Diospita runacunata yachachinapaj.

Casaracushganchipita Jehová imaypis necesitashganchicunata camaripäcamashga payta puntaman churashganchiraycu (Mat. 6:33). Karttula marcacho cawar carrunchipis carganchu. Chaymi galanancho bicicletata utilizapäcojmi cä juc marcacunaman aywanapaj, ichanga tamya wichancho bicicletata utilizayta puedejcänachu alapa gasaptin. Caru marcaman Diospita yachachicoj aywanapaj carrutarämi necesitapäcoj cä, ichanga guellay mana cashganraycu juc carruta rantishcächu.

Juc cuticho wauguë ilajpita watucamargan, y carrunwan quedacunäpaj nimargan. Ni juc sol-latapis gastashganchichu carruta charanapaj, gasulinalata winanapaj caycargan. ¡Ilajpita carruyojna ticrarganchi!

Chaynopa Jehová claro musyachipäcamargan ni imatapis mana faltachimänanchipaj cajta. Chaypäga Diospa Gobiernunta puntaman churanapaj caycargan.

1978 watacho, Escuela del Servicio de Precursor nishgancho carcaycaptë, Raimo Kuokkanen a waugui nipäcamargan solicitudta apachipäcunäpaj Galaad Escuelapaj. Chaymi inglés rimayta yachacuyta galaycärergä chay escuelaman aywapäcunäpaj. Ichanga solicitudta apachipäcurgächu, 1980 wata Finlandiacho caycaj betelcho yanapacunäpaj nipäcamashganraycu. Chay wichanpäga lapan betelitacuna Galaad Escuelapaj solicitudta apachicuyta puedejchu. Nogacunaga Jehová nimashgancho sirvinapämi listo  caycargä. Chaymi betelcho yanapacunäpaj nipäcamaptin alapa cushicärirgä. Chayno captinpis inglés rimayta yachacuytaga jaguipäcurgächu, “imaylapis camacangami Galaad escuelapaj solicitudta apachicunäpaj” nir.

Watacuna pasariptin, Jehovapa testiguncunata Pushajcuna nipäcurgan betelitacuna Galaad escuelapaj solicitudta apachicuyta puedishgantana. Chayta musyar jinan hora solicitudta apachicärergä. Chayga manami ninanchu betelcho cushish mana capäcushgäta, pero calpäcuna cashganraycu y Jehovapaj más rurayta munarmi solicitudta apachicurgä. Invitapäcamargan Galaad escuelaman 79 caj cläsiman aywapäcunäpaj. 1985 wata, setiembre quillacho escuelata usharirna Colombia naciuman mandapäcamargan Diospita yachachipäcunäpaj.

Colombia naciuman chayapäcuptë, chaycho caycaj betelman yanapacunäpaj mandapäcamargan. Lapan shongüwanmi aruycaptë juc wata pasariptin yanapacurcaycaptë cambiuta munapäcurgä. Chay cambiuta mañacushgäpita yapay manami mañacushgänachu. Chaura Huila departamentucho caycaj Neiva marcaman mandapäcamargan misiunerucunano sirvipäcunäpaj.

Predicaytaga alapami gustaman. Japaläraj caycaptë y precursorno Finlandia marcacho yanapacuycashgächo, öraga pacha warämushganlapita chacashganyaj Diospita yachachicoj cä. Y chaylaraj majachacushga caycar, Sirkka warmëwan lapan junajcuna predicaycarla capäcoj cä. Caru marcacunaman yachachicoj aywar, öraga carrulacho punupäcoj cä. Chaynopa warayninna tuta tutala predicar galaycärej cä.

Misiunerucunano sirviycar, unayno Diospita cushi cushila runacunata yachachicur galaycärergä. Yanapaycashganchi congregación miraycargan, y chaycho caycaj hermanucunaga respetuoso, cuyapäcoj y agradecidumi capäcoj.

Neiva ciudapa cercalancho caycaj marcacunacho manami Testigucuna carganchu. Chay marcacunacho manami seguro carganchu jäpa runacuna cawananpaj, chauraga nipäcoj cä “imanoraj chaycho tiyaj runacuna Diospita yachacunga” nir. Chaymi Jehovata mañacoj cä pilapis chay marcacunapita Testiguman ticrananpaj. Jinapis mañacoj cä chay hermano bautizacurir marcanman cutinanpaj y chaycho runacunata Diospita yachachinanpaj. Pero Jehová musyargannami imataj rurananpaj chay marcacunacho paypita y Gobiernunpitapis runacuna yachacärinanpaj.

Ichic tiempulacho Fernando González mozuta Bibliapita yachachicuyta galaycurgä, payga cargan Testigucuna mana cashgan Algeciras marcapita. Fernando mozuga Neiva ciudächo aroj, chaypäga carutarämi viajaj (30 millas) trabajunman chayananpaj. Payga shumaj preparacoj chay junaj yachacunapaj cajta, Bibliapita estudiayta galaycushganlapita reuniuncunaman aywaj. Jinamanpis marcanman cutiycurna waquin vecinuncunata shuntaycur Bibliapita yachacuycashganta parlapaj.

Fernando mozuga enero quilla, 1990 watachomi bautizacurgan; chaura bautizacunanpäga  sojta quillacunala pasargan y chaylapita precursor regularman ticrargan. Chaura Algeciras marcacho juc Testigo captinmi, sucursalcho caycaj hermanucuna mandapäcurgan precursores especiales nishgancunata. Y febrero quilla 1992 watacho, Algeciras marcacho juc congregación camacargan.

Pero Fernando manami quedacurganchu Algeciras marcacho. Pay Olga warminwan casaracurir, Testigucuna mana cashgan San Vicente del Caguán marcaman aywargan yanapacunanpaj. Chaychopis juc congregaciunta camacächergan. Y 2002 watacho Fernando warmintawan congregaciunta watucojno yanapacunanpaj mandapäcurgan, y canancamami chayno sirvircaycan.

Cayga yachachiman nogapis Jehovata mañacurga, imachopis yanapämänanpaj cajta claro ninäpaj. Payga mana yarpashganchitami ruran. Biblia nishgannopis Jehovami chacrapa dueñun caycan y wilacojnincunata mandan chacranman (Mat. 9:38).

1990 watacho, congregaciunta watucojno mandapäcamargan, Colombiapa capitalnin Bogotá marcachomi sirviyta galaycärergä. Noga Sirkka warmëwan chaycho tiyaj runacunanolami capäcoj cä, y paycunanolami imatapis rurapäcoj cä. Jina jatun marcacho tiyaytaga yachacashga carcaycargächu, chaymi manchacärergä congregaciuncunata watucayta. Pero Jehovami shacyächipäcamargan Filipenses 2:13 textuwan, chaycho nin: “Pay munashqanno kawapäkunaykipaq kikinmi shakyätsishunki y poderta qoshunki”.

Tiempuwanna Medellín marcacho caycaj congregaciunman mandapäcamargan. Chaychoga runacuna yachacashgana caycargan callicunacho wanuchinacuy y maganacuy ricayta, chaymi manchacärejnachu. Juc cuticho Bibliapita yachachicuycaptë callicho balacera galaycurgan (un tiroteo). Manchacuypita pampaman lataycunäpäna caycaptë, estudiantëga leiycarganla chay parrafuta. Leiyta usharirna, pay nimargan juc rätula wasinpita yargunanpaj. Chaypitaraj ishcay tacsha wamrancunawan cutimurgan y tranquilula cayno nimargan: “Perdunaycalämay, wamräcunata shuntanäpaj aywanä cargan”.

Manami chay cutilachu alapa manchacärergä. Juc cuticho wasin wasin runacunata yachachiycaptë, ilajpita warmë corriylapa noga cajman shamurgan. Manchacashga nimargan juc runa payta apuntaycur disparashganta, chayta wiyar nogapis manchacargä. Pero chaypita cuentata gocärergä chay runa warmëpa ladunpa pasaycaj runata disparashganta.

Tiempuwanga ichic ichiclapa yachacärergä magacoj y wanuchicoj runacunawan cawayta. Almiracärergä imano hermanucuna calpachacushganta wanuchicoj y magacoj runacunawan junto cawar aguantaycashganta. Chaura paycunata Jehová imano chapaycashganta y cuidaycashganta musyar, nogacunapis seguro carcaycargä Pay cuidapäcamänanpaj. Congregaciuncho caycaj ancianucuna nimashganchicunatami cäsucärergä, jina cuidadulawanmi puricoj  cä y manchacuynëcunata Jehovapa maquinchomi jaguipäcoj cä.

Öraga yarpapäcushgäno alapa peligroso caway carganchu. Juc cuticho wasiyojta watucaycashgächo callicho wiyargä ishcay warmicuna shimi shimi rimanacuycajta. Chaura wasiyoj warmi nimargan puncuman yargurir ricanäpaj ima pasaycashganta. Yargurcuptë ricargä, ¡ishcay loritucuna vecinucunata imitaycashganta!

1997 watacho, acramargan yachachicoj canäpaj Escuela de Entrenamiento Ministerial nishgancho. b Escuelas teocráticas nishganman aywayta gustamaj, pero imaypis yarpargächu chay escuelacunacho yachachicoj canäpaj.

Nircur superintendente de distrituno yanapacushcä. Pero chay arreglo usharcuptin, congregaciunta watucojno yanapacur galaycushcä. 30 watapitapis masna escuelacunacho yachachicojno y congregaciunta watucojno sirviycä. Cay lapancunacho sirvir imayca bendiciuncunatami chasquishcä, pero lapan pasashgäga manami facilchu cargan. Mä wilapäshayqui imanirtaj chayno cargan.

Nogaga mana manchacuypa imatapis parlajmi cä geniüraycu. Chayga yanapämashga imayca sasacunapa pasarpis aguantanäpaj, pero öraga congregaciuncho hermanucunata mana cuyapaypa corrijej cä. Achca cuti hermanucu­nata cayno nergä: “Gamcunaga cuyacoj y waquincunata respetuwan tratanquiman” nir. Pero cuentata gocurgä quiquë chaycunacho mejoranäpaj caycashganta (Rom. 7:21-23).

Öraga pantashgäraycu laquicojmi cä (Rom. 7:24). Juc cuticho pasaypa laquishga caycar Jehovata mañacuycho nergä misionero manana canäpaj y Finlandia marcäman cutinäpaj. Pero chay junaj reuniuncho wiyashgäga yanapämashga misioneruno siguinäpaj y pantashgäcunata mejoranäpaj. Imaypis gongashächu Jehová imano mañacuynëta contestashganta. Jinamanpis Jehovata agradecido caycä pantashgäcunata shumaj mejoranäpaj cuyacuywan yanapämashganpita.

Sirkka warmëwan alapami Jehovata agradecicärë lapan tiempüwan y cawaynëcunawan Taytalanchi Diosta sirvipäcushgäpita. Jinamanpis alapami Jehovata agradecicö cuyacoj y yanapacoj warmita garaycamashganpita.

Ichiclacho 70 watatana cumplishaj, chaymi manana escuelacho yachachicoj cashänachu ni congregaciuncunatapis watucashänachu. Pero caycunaga manami laquichimanchu. Jehovaga más cushicun lapan puedishganchimanno ruraptinchi y lapan shongunchiwan imaypis paylata sirvir caycaptinchi (Miq. 6:8; Mar. 12:32-34).

Achca watacunapami imayca ruraycunacho Jehovata cushi cushila sirvishcä. Chaycunata yarpaptë manami carganchu waquincunapita más ali cashgäpitachu o más yachaj cashgäpitachu. ¡Chaypa trucanga Jehovapa yanapacuyninwanmi cashga! Pay mana yanapämaptenga imanoparaj lapanta ruraycöman cargan. Diosga poderninwanmi yanapämashga mejoranäpaj (2 Cor. 12:9).