1. Punta caj cristianucuna cawashgan wichan Diospa marcanga, ¿imanotaj camacächishga caycargan?

 JEHOVÁ sirvejnincunata mandaptin imatapis rurananpaj, lapan ordenado ruracänantami munan (1 Cor. 14:33). Payga munan Bibliacho caycaj ali wilacuycuna may chay naciunmanpis chayananpaj (Mat. 24:14). Y chayta pushananpaj o ricananpäga wamran Jesusta churashga. Jesusnami waquin runacunata acrargan Taytan mandashgan ruracänanpaj. Chaymi unaycho Jerusalenchoga caycargan lapan apostulcuna y waquin ancianucuna imatapis decidinanpaj y ima wilacuycunatapis congregaciuncunaman apachicunanpaj (Hech. 15:2; 16:4). Chaura congregaciuncunacho caycaj ancianucunana chay wilacuycunata chasquiycur hermanucunata tantiachipäcoj imata rurapäcunanpaj (Hech. 14:23). Chay wilacuycunata cäsucushganraycur ali yäracoj cristianucunaman ticrapäcurgan y “waranlan waranlan atskayarqan” (Hech. 16:5).

2. ¿Imatataj Jesús rurargan 1919 watacho Diospa marcan ali camacächishga cananpaj?

² Canan wichanpis Jehovapa marcanga ali camacächishga caycan. 1919 watapita, cielupaj acrashga cajcunapita Jesusga walcalata acrargan predicaciunta ricananpaj y publicaciuncunapis jorgunanpaj discipuluncunapaj (Luc. 12:42). a  Y cuentata gocunchi paycuna rurashgancunata Jehová bendeciycashganta (Is. 60:22; 65:13, 14).

3, 4. 1) ¿Imaraj pasanman imapis ordenado ruracaptin? 2) ¿Imataj canan yachacushun?

³ Imapis ordenado mana ruracaptenga, Jesús mandamashganchita manachi cumplishwanchu cargan (Mat. 28:19, 20). Cayman yarpäshun, predicananpaj territoriucuna ali camacächishga mana captenga cada uno munashgan sitiucunachochi predicanman. Y chay sitiulacho cutin cutin predicarga, waquin sitiucunachoga manachi predicashwannanchu. Chaymi alapa ali caycan imapis ordenado ruracaptin.

⁴ Jesús Pachacho caycar discipuluncunata mandargan imapis ordenado rurananpaj y chaynolami cananpis ruran Diospa marcanwan. Canan yachacushun, Jesús imanotaj chayta rurargan y pushamajninchi hermanunchicunapis chaynola rurapäcuycan. Jina yachacushun imatataj rurashwan pushamajninchi hermanunchicunaman yäracunapaj.

PUSHAMAJNINCHICUNAGA JESÚS RURASHGANNO RURAN

5. Jesusga Taytan nishgantami ruraj, ¿y ima nishwantaj Diospa marcanta pushajcunapita? (Juan 8:28).

⁵ Jesusga Taytanpita yachacurgan imata rurananpaj y ninanpaj. Chaynolami cananpis Jehovapa marcanta pushajcunaga Diospa Palabranwan yachachimanchi y consejamanchi (leiriy Juan 8:28; 2 Tim. 3:16, 17). Jina, cada cadala yarpächimanchi Diospa Palabranta leinapaj y nishgancunata cäsucunapaj. ¿Imanotaj chayga yanapämanchi?

6. ¿Imanotaj yanapämanchi Bibliata estudiaptinchi?

⁶ Publicaciunninchicunaga alapa yanapämanchi Bibliapita shumaj yachacunapaj. Chaymi Bibliapita yachacushganchi hora Diospa marcancho yargamushgan wilacuycunawan tincuchishwan. Y cuentata gocuptinchi chay wilacuycuna Biblia nishganno captenga, Diospa marcanta pushajcunaman masraj yäracunchi (Rom. 12:2).

7. ¿Imapitataj Jesús yachachergan, y imanotaj Diospa sirvejnincunapis chayta rurapäcun?

⁷ Jesusga Diospa Gobiernunpita ali wilacuycunata yachachergan (Luc. 4:43, 44). Discipuluncunatapis mandargan chayta rurananpaj (Luc. 9:1, 2; 10:8, 9). Canan wichanpis, Diospa marcancho lapan caycajcuna may chaycho caycaptinpis o ima carguyoj caycaptinpis Diospa Gobiernunpita yachachicun.

8. ¿Ima valej carguta chasquishcanchi?

⁸ Diospa Gobiernunpita yachachiyga alapa jatun valej cargo caycan y chaytaga manami lapan runacuna rurayta puedinchu. Jesús cay Pachacho caycaptin, manami jaguirganchu supaycuna paypita rimananpaj (Luc. 4:41). Canan wichan pipis Jehovapa testiguncunawan predicayta munarga, puntata calpachacunmanmi Jehová munashganno cawacunanpaj. Noganchipis Diospita yachachiyta alapa valej cargutano ricarga, calpachacushwanmi imaypis predicanapaj. Jesús rurashganno pï maytapis Diospita parlapashwan y rasunpa cajta yachachicushwan (Mat. 13:3, 23; 1 Cor. 3:6).

9. ¿Imataj Diospa marcanta pushajcuna rurargan Diospa jutinta musyachinanpaj?

⁹ Jesusga Diospa jutinta musyachicurgan. Chaymi juc mañacuynincho payga nergan Taytanpa jutinta musyachishganta (Juan 17:26). Diospa marcanta pushajcunapis imaycacunata rurargan runacunata musyachinanpaj Diospa jutin ima  cashganta. Chaymi jorgamurgan Traducción del Nuevo Mundo nishgan Bibliata, y chayga 270 rimaycunapitapis maschomi caycan. Chay Bibliacho canan yapay Diospa jutin yuriycämun unay yurishgan cajcunacho. Y apéndices A4 y A5 nishgancho mastata wilacamun imacunata rurashganta Diospa jutin yapay yurichinanpaj. Jina Biblia de estudio cajchopis apéndice C nishgan caycan, chaycho maslata wilamanchi imanir Diospa jutin 237 cuticunano yurinman Escrituras Griegas Cristianas nishgancho.

10. ¿Imataj yachacunchi Myanmar warmita ima pasashganpita?

¹⁰ Noganchipis munanchi pï may runacuna Diospa jutinta musyananpaj. Myanmar naciuncho juc cristiana, 67 watayoj warmita yachachergan Diospa jutin ima cashganta. Chay warmi chayta wiyar cushicurgan y wagarganräpis, payga nergan: “Chayraj puntata wiyaycä Diospa jutin cashganta. [...] Canan yachacushgäga más shumajmi caycan lapan yachacushgäcunapita”. Cayga yachachimanchi pipis Diospa jutinta musyarga cawaynintapis cambianmanmi.

DIOSPA MARCANTA PUSHAJCUNAMAN YÄRACUYCÄSHUNLA

11. ¿Imacunata rurartaj ancianucunaga Diospa marcanta pushajcunaman yäracärin? (Fotucunatapis ricay).

¹¹ Ancianucuna Diospa marcanta pushajcunaman yäracushganga ricacämun cada cadala chasquishgan wilacuycunata leipäcuptin y chaycho nishgancunata cäsucuptin. Paycunaga wilacuycunata chasquipäcun imano discursuncunata rurananpaj, reuniuncunacho imano mañacunanpaj y Jesuspa uyshancunatapis imano shumaj ricananpaj. Chay wilacuycuna nishganno ancianucuna lapanta ruraptenga, hermanucuna ali cuidashga caycanga y Jehová cuyashgantapis ricanga.

12. 1) ¿Imanirtaj pushamajninchicunata cäsucushwan? (Hebreos 13:7, 17). 2) ¿Imanirtaj pushamajninchicuna pantashgancunaman yarparäcushwanchu?

¹² Ancianucuna imatapis ruranapaj nimaptinchega, ganas ganaswan cäsucunanchi. Chayno ruraptinchega paycuna manami laquicäringachu. Bibliapis nin pushamajninchicunata cäsucunapaj y respetanapaj (leiriy Hebreos 13:7, 17). Pero pantarcuptenga öraga sasami canman chayta ruranapaj. Paycuna imacunacho pantashgancunalaman imaypis yarparäcurga, ichic ichiclapa Diospa marcanta pushajcunaman manachi yäracushwannachu y chiquimajninchicunaga chayta munan. Chauraga, ¿imatataj rurashwan chiquimajninchicuna nishgancunata mana creinapaj?

AMA JAGUISHUNCHU PIPIS PANTACHIMÄNANCHITA

13. ¿Imataj chiquimajninchicuna nipäcun Diospa marcanpita?

¹³ Chiquimajninchicuna Diospa marcanpita parlar öraga imayca manacajcunata parlapäcun. Bibliaga claro yachachicun Diospa sirvejnincuna pay munashganno cawacunanpaj, paylata sirvinanpaj y limpio cananpaj. Jina nin pipis mana alicunata rurar cawacuptin y mana arrepenticuptenga congregaciunpita gargushga cananpaj (1 Cor. 5:11-13; 6:9, 10). Chay mandatuta cäsucuptinchi chiquimajninchicuna tumpamanchi runacunata mana cuyashganchita y mana ali ricashganchitapis.

14. Runacuna Diospa marcanpita manacajcunata parlananpäga, ¿pitaj guepancho caycan?

¹⁴ Yarpäshun chiquimajninchicunapa guepancho pï caycashganta. Bibliaga nin Satanás ‘lulakuq kashqanta’, chaychi paypa  munaynincho caycaj runacunaga Diospa marcanpita manacajcunata o lutancunata parlapäcun (Juan 8:44; Gén. 3:1-5). Chauraga alapa almiracushwanchu chiquimajninchicuna lutancunata parlaptin. Unaypis chayno pasarganna.

15. Pushacoj religiosucuna Jesusta y discipuluncunata chiquishpan, ¿imataj rurargan?

¹⁵ Jesusga juchaynaj cargan y achca milagrucunata rurargan, pero Satanasga mana ali runacunata yarpayta gorgan Jesuspita manacajcunata parlananpaj. Pushacoj religiosucunaga runacunata nergan Jesusga ‘supaykunapa mandaqninpa [...] munayninwanmi supaykunata qarqushqanta’ (Mar. 3:22). Nircur paycunaga Jesusta tumpargan y runacunatapis shimita jatipargan, Jesusta acusananpaj guerucho warcushga cananpaj (Mat. 27:20). Tiempuwanpis Jesuspa discipuluncuna yachachicur galaycuptin yapay runacunata shimita jatipargan contranman sharcupäcunanpaj (Hech. 14:2, 19). Hechos 14:2 textupita parlar, La Atalaya del 1 de diciembre de 1998 wilacurgan chiquicoj judiucunaga cristianucuna yachachicushganta wiyayta mana munashganta, jina runacunatapis shimita jatipargan cristianucunapita manacajcunata parlananpaj y chiquir contranman sharcunanpaj.

16. ¿Imatataj rurashwan luta wilacuycunata wiyaptinchi?

¹⁶ Satanás lulacoj captin, canan wichanpis runacunata tucuynopa engañaycan (Apoc. 12:9). Chaymi Diospa marcanpita o pushamajnincunapita mana rasun caj wilacuycunata wiyaptinchega, yarpashwanmi Diospa chiquicojnincuna Jesusta y discipuluncunatapis imata rurashganta. Biblia  nishganno, chiquimajninchicunaga Jehovapa testiguncunata chiquir imaycacunata ruran y manacajcunata parlapäcun (Mat. 5:11, 12). Chaymi paycuna mana engañamänanchipaj luta yachachicuynincunata creishwanchu y paycunapita cuidacunanchi. ¿Imatataj rurashwan cuidacunapaj?

17. ¿Imatataj rurashwan luta yachachicuycuna yurimuptin? (2 Timoteo 1:13; “ ¿Imataj ruranquiman luta yachachicuycuna chayashuptiqui?” recuadruta ricay).

¹⁷ Luta wilacuycunataga wiyashwanchu. Apóstol Pablo claro nimanchi imata rurananpaj chayno wilacuycuna captin. 1 Timoteo 1:3, 4 cajcho cayno nergan: “Lutan yachatsikuqkunaqa kikinkunapa yarpaylanta” yacharcaycächin. Timoteutapis cayno nergan: “Lutanta yachatsishqankunata ama chaskipaytsu” (1 Tim. 4:7). Juc wamra imapis jitaraycajta ricaptin, rasla aptarcur shiminman jatin; pero pogushga runaga musyanmi maypita shamushganta y ima peligro cashgantapis chaymi chayta ruranchu. Chaymi noganchipis luta yachachicuycunataga chasquipashwanchu rasun cajlata wiyananchi (leiriy 2 Timoteo 1:13).

18. ¿Imata rurartaj Diospa marcanta pushajcunaman yäracunchi?

¹⁸ Canan yachacushcanchi Diospa marcanta pushajcuna imano Jesuspa ejemplunta gatircaycan, pero mana chaylachu. Bibliapita cada cadala más yachacuptiqui, quiquiqui más convencido chaypita caycanqui. Yäracoj masiquicunatapis yanapay Jehovapa marcanta pushajcunaman yäracunanpaj. Y ima captinpis Jehovata mana cachaypa sirvir caycanquiman (Sal. 37:28). ¿Manachu alapa cushicunqui Diospa marcancho lapanchi cuyanacuptinchi y Jehovalata sirviptinchi? ¡Cayga alapa jatun bendiciunmi caycan!